傅穎思想透徹戀愛止步
傅穎說自己是個慢熱的人，不容易對人敞開心扉，在娛樂圈搵食會很蝕底。問題是，為甚麼速食才是唯一標準？慢活竟然是一宗罪？米蘭昆德拉在《緩慢》中一句：「速度的高低與遺忘的快慢成正比。」或許值得所有演藝人士參詳。 與傅穎（Theresa）已非首次做專訪，不得不承認她對自己性格的評論，相當中肯，她說：「我由細到大，反應都係慢幾拍，依家改善咗啲，好多人以為我寸，其實我係反應慢，呢種性格喺呢行好蝕底，但性格天生，我係鍾意寫嘢多過講嘢嘅人，有人話起初睇我外表，就以為我好鍾意玩，睇過我寫嘅嘢之後，就感覺我份人好親切，其實我鍾意人哋透過我寫嘅嘢去了解我。」 Theresa還舉出實例說：「有時連我老闆都話需要時間消化我講嘅嘢，唔係我講嘅嘢高深，而係我嘅說話表達能力有問題，可能我平時鍾意思考，一個諗嘢多嘅人，溝通能力會打咗折扣。事實上，只有長輩能夠明白我多啲，同輩好難搵到一個好投契嘅，我同長輩先可以講感情事。有時我覺得我諗嘢諗得太透，結果好難同人拍拖，因為我覺得一個人愛另一個人，其實係為咗想對方錫番自己，所以愛情係自私嘅！」 Theresa這種愛情觀正是英倫才子Alain de Botton《我談的那場戀愛》中所說的「我們心中無匱乏的話就不會去愛」，她說：「覺得每個人心目中都有天使同魔鬼喺度角力，每人都有唔想人知嘅一面，書展我推出嘅文字書其中一部分：Darkness，就係寫人嘅陰暗面，包括點睇當年父母離婚對我嘅影響。我睇番自覺寫得好嘅文章，大部分都係心情低落時寫，但我唔算悲觀，試過好嬲、好唔開心，後來喺Blog度寫寫寫，感覺好似揼低晒所有唔開心，或者呢個係我鍾意寫嘢嘅原因。」 Profile 姓名：傅穎（Theresa） 出生日期：9月22日 身高：167cm 體重：45kg 星座：處女座
Theresa表示愛寫Blog，因彷彿能放下所有不快事。
Theresa坦言性格慢熱，不輕易對人敞開心扉，在娛圈十分蝕底！
自認表達能力欠佳的Theresa，只能與長輩傾訴感情事。
Theresa在新書中抒發人性陰暗面，更自爆當年父母離婚對她的影響。
寫Blog宣洩不快
宅女愛畫畫
Theresa自認是悶人一名：「平日唔使開工，如果留喺屋企，我會上網、寫嘢同繪畫；如果出街，我就會去食嘢，我好鍾意食嘢。」 上網 「我有玩開微博，好多時開工，我都會影張相，然後即刻放上微博，除此之外，我都有寫Blog。」 寫作 「我寫嘢要喺好靜嘅環境同埋情緒要好Depress嘅情況下，先會自覺寫得滿意，但寫Sweet嘢都可以喺開心啲嘅情況下寫！」 繪畫 「寫文章抒發我嘅唔開心，繪畫就平衡番我嘅情緒，我鍾意用Colourful啲嘅色彩作畫，我覺得色彩對我有治療作用。」 覓食 「我細細個已經要煮飯畀屋企人食，依家如非必要都唔入廚，鍾意食人哋煮嘅嘢多，我覺得人生冇得食好嘢，實在係太悲慘啦！」
繪畫
覓食
寫作
留言列表
