彩虹鍬形蟲
最深得好色女甲迷喜愛的品種。理由一眼睇晒：靚。陽光下七彩漸變出色高清效果，養眼到呢！感覺都親民溫馴易入手好 feel啲，最緊要無一般黑古勒特粗線條大鍬形蟲咁似曱甴。
動植物公園
甲鬥
2010年06月10日
穿有時吃有時玩樂有時——本應。但隨着環球科技發展瞬間千百萬里，黃豆可以基因改造，冬天可以食到西瓜，時令限定四隻字，彷彿同中大校方的良知一樣，都變成上世紀的稀有產物。
春分立夏，素來是甲蟲最活躍的季節。金龜子科，約定俗成印象是頭部有一「 Y」形簽名式獨角，威武十足，霸氣非常，由於形態狀似日本武士頭盔，故深得日人鍾愛，賜予至高無上「甲蟲王者」封號，培育鑽研深造改良，點止寵物咁簡單呀，彼邦早三十年已經係一盤年中無休暴利生意，月月有選美鬥大鬥色鬥罕的全民參與賽事。仲將這股如雨乘風勢甲鬥熱狂襲東南亞，香港？中招好耐啦！
鍬兜之別
因為一套咸豐年《甲蟲王者》卡通片，再火上加油由日本爆紅辣着全亞洲，當然非一般 Beetles，獨角仙都只不過是其一品種叫法，要認真分門別類，甲蟲可歸納為兩大派：兜蟲和鍬形蟲。
兩者最明顯特徵，兜蟲有上下對角，普遍命短，平均得一年壽命，所以一完成變態過程，就要立即搵伴交配，在最短時間內為族群留最多後代。鍬蟲呈左右對角，比較命長，個別品種可長達三年，但有得必有失的是，繁殖有一定難度，環境配套有一定附帶條件，唔似兜蟲天生天養容易有滿足感。所以飼育對象都有大分別，兜蟲膽正命平，定價平均幾嚿水街坊價，啱初哥 OL小朋友入門；鍬蟲每每要向高難度挑戰，鬥靚鬥罕鬥級鬥屬鬥繁殖經驗鬥快發現新品種……有價都未必有市，擺明係資深玩家杯茶。
鍬蟲
兜蟲
巴拉望鍬蟲
史上最大最橫最硬最蠻最好揪扁鍬！角鉗如鋸，被佢鉗到痛足一日。天生躁狂力大十級唔好老脾，曾有交配中途發難渣，將雌蟲齊口橫開一分為二切斷紀錄。我只不過用支筆响佢面前撩兩吓咋，嘩即鉗呀！
長戟大兜蟲
史上最長甲蟲，平均一部手機長度。日人近乎瘋狂地，以能夠自家繁殖出最長紀錄為榮。香港甲迷都唔輸蝕，據知成蟲體長達 170mm以上的，身價過萬！
印尼金鍬蟲
來自最龐大好色家族，紅橙黃綠紫青啡灰……真係噏得出都有！ So，是繼彩虹鍬形蟲之後，最受 OL歡迎的品種； But以色論身價咯喎，則反高潮，以黑為貴！
紅背叉角鍬蟲
又名金邊叉角鍬形蟲，又係好勇鬥狠撩是鬥非唔好惹嗰種。雖然講惡一定唔及巴拉望，論色則贏九條街仲有凸。
重男輕女
無論鍬蟲抑或兜蟲，一生要經過卵→幼蟲→蛹→成蟲四個完全變態過程。鍬/兜卵皆白，卵孵化後，便成幼蟲。蛻變過程快慢視乎品種。但鍬/兜幼蟲至蛹最脆弱階段，皆需要製造蛹室。蛹期平均兩星期，直至幼蟲破蛹羽化，完成整個完全變態過程。
不論鍬/兜雌雄，外貌和體形都有兩點共通：一樣雄大雌小。雄有壯角，而出生只為負責啤工生產的雌蟲，因為要鑽土產卵，故無角。
幼蟲階段
自製蛹室
美他力佛鍬形蟲
羽化後，便成美他力佛鍬形蟲。天生長角，線條流麗，是日人頭號冧把溫，亦是甲蟲雜誌封面曝光率最高主角。
蟲匯點
深水埗長沙灣道 226-242號深之都商場 3樓 146號鋪 2386 2366
留言列表
