明星靚相大分享☆

頭髮話明係三千煩惱絲，梗係多嘢煩啦！中醫師葉英良（右）話，脫髮男女都有，根據中醫古書《黃帝內經》記載，女士 35歲就會開始脫髮， 42歲開始長出白髮；男士則 40歲開始脫髮， 48歲出現白頭髮。以上歲數當然未必適用於現今所有人，但可見女性會比男性早出現白髮。
「中醫認為，『髮乃血之餘，血盛則髮潤，血衰則髮衰，血熱則髮黃，血敗則髮白』。身體質素差，血液循環欠佳，自然出現種種頭髮問題。因此要處理脫髮白髮，一定先要改善體質來治本，之後再利用外用的美髮方法刺激毛囊來治標。只要毛囊尚未枯死，一定可以令頭髮再生。」
葉醫師又話，皮膚都可以吸收到中藥的藥效，不過份量要比較多。平時內服的中藥一般 3錢即可，外用就要 5錢先夠力！佢仲推薦了以下 4個簡單易行的外用方法，雖然係由女 model示範，不過男女均合用！

4大護髮
薑酒搽頭

做法：以薑片、薑汁、薑酒或薑水塗於脫髮部位，待 15-30分鐘後洗去。患處會變紅及有發熱感。
葉醫師話，生薑（即平時煮食用的薑）中的薑辣素、薑烯油等成分，可使頭部皮膚血液循環正常化，促進頭皮新陳代謝，活化毛囊組織，有效防止脫髮、白髮，刺激新髮生長。「當中以薑酒（右圖）最見效，因為酒本身有刺激毛囊的作用，所以有啲人搽白蘭地酒生髮都得 o架！薑酒唔難整，以 1份薑、 5份米酒，浸半個月就用得，而愈陳年效果愈勁啦！」

中藥焗髮

做法：何首烏、熟地、菊花、桑寄生、當歸各 5錢，加 4碗水煎 30分鐘（水量可因應頭髮長短酌量加減），隔渣取藥液，待藥液變暖時將之搓勻頭皮及頭髮，並用毛巾包住焗 15-30分鐘，焗完過水洗淨。此方也可平日用來洗髮。
何首烏有促進毛髮生長的功效，更能養血，令白髮變黑。葉醫師表示：「外用護髮中藥的功用，主要是刺激毛囊生髮及強化髮質，好像這款焗髮水，何首烏、熟地是補肝腎藥，其他如菊花能清熱、桑寄生可潤髮，對整個頭皮及頭髮都有滋潤作用。」但注意焗髮時藥液不可太熱，而且一個星期用 1-2次已足夠。

頭部刮痧

做法：用刮痧棒（右圖）的尖端，從頭頂中間的百會穴起，以放射性刮法，由內至外，由上至下，全頭刮拭。
刮痧唔係一定醫傷風，亦唔一定會見紅。例如用呢支刮痧棒刮頭，最多有微痛感，葉醫師話刮得多連樣都靚啲！「頭部刮痧的原理是促進頭部血液循環，刮痧棒只得一個受力點，壓力大，效果更強！頭上是五官經脈匯聚的地方，每天都用刮痧棒刺激經絡，刮完會覺得個樣都精神啲！」不過頭皮嬌嫩，不可猛刮，一日刮 15-30分鐘就足夠。刮痧棒可於國貨公司購買，約$50一支。