呢場係硬仗，為保福將之名，一定要撐 o架！（設計對白）
話晒第一次坐正，今鋪唔輸得！（設計對白）
鄭則士同黃浩然飾演父子，但因鄭對黃愛之深責之切，故令兩人關係緊張。
電視有正嘢
情越雙白線 鄭則士輕騎出擊
2010年06月25日
早兩期講過，無綫對撼世界盃排出嘅劇集陣勢，應該講算係成功。《談情說案》平均 30點，最高收 36點㖭。《蒲松齡》因為有福將馬浚偉坐鎮，收視一樣勁收 30點。而無綫嘅追擊陸續有嚟，下星期，又到另一個福將鄭則士上場嘞。
話鄭則士係福將一啲冇誇張。早年佢喺亞視套《肥貓正傳》紅到開晒巷。重返無綫後，先後演出嘅《金石良緣》、《盛世人傑》及《老友狗狗》，每套平均收視都過 30點，全都係屬於「本小利大」。所以今次無綫又部署喺正世界盃進入高潮期推出佢擔戲嘅《情越雙白線》，繼續追住有線嘅世界盃咬住唔放。
無綫今次好明顯，又係食個「福」字。除咗福將鄭則士外，仲有徐子珊、郭羨妮雙旦，再加黃浩然及曹永廉雙生。睇牌面，雖然係小品式劇集，但亦往往會令人有意想唔到嘅收視同口碑。
鄭則士喺《情》繼續擔正成為主線人物，飾演黃浩然（何加寶）老竇何球，本來係退休的士司機，奈何黃因危險駕駛車死人坐監，為咗生活，鄭不得不重操故業。點知黃出獄後替老竇開工，又再撞車，今次更連累老竇精神及身體都嚴重受創。經過此次意外，黃亦明白揸車最重要係安全第一，可惜神差鬼使，佢每次開工都撞上女交通警徐子珊（高麗芯），而徐又專鍾意捉佢痛腳，不過最後兩個就由誤會到了解。正當兩人開始愛情關係之際，中途殺出黃嘅舊情人郭羡妮（張曉雯）及徐嘅阿嫲李香琴（李淑貞）喺中間搞搞震。
一向主打男二號嘅黃浩然，已升格為一號，喺《情》入面孭嘅戲絕唔比鄭少。另外今次主唱《情》主題曲嘅，係《巨聲》之一嘅劉威煌，都算係《情》嘅突破。
播映日期 6月 28日周一至周五晚 9:30pm翡翠及高清翡翠台
郭鋒飾演嘅牛丸大王魏潮發，因黃浩然醉駕而令其雙手殘廢之後，由好好先生變為暴君，不時打苑瓊丹飾嘅妻子。
郭羨妮今次喺劇入面係車房技工，佢飾演嘅張曉雯既係鄭則士契女，亦係黃浩然青梅竹馬女朋友。為人夠義氣，為咗幫黃搞到自己短暫失憶。
鄭則士飾演嘅何球，同苑瓊丹飾演嘅美芬，既係老街坊，亦係好朋友。
新人鄭俊泓（左一）喺《情》入面飾演郭羨妮同父異母細佬張曉明，因為投資失利欠下貴利，俾李天翔飾演嘅梁逸東脅持。
黃浩然醉駕涉及車禍，遭徐子珊飾演嘅女交警高麗芯指控。
徐子珊喺劇入面，除咗係交通警察外，亦係泰拳助教。
留言列表
