「廟街歌王」尹光，你會記得他的名曲〈數波波〉、〈十四座〉、或者千禧年代的〈少理阿爸〉，歌詞諷刺時弊又通俗，老一輩或後生一代都聽到拍爛手掌，卻不會關心他的私生活。

踏入花甲之年，卻仍然生鬼又活潑的尹光，台上反映時勢、教化年輕人，台下也是一位廿四孝的爸爸，同樣將歡笑與人生哲理灌輸今年二十七歲的兒子Kenny。為了讓兒子獨立，尹光於兒子十六歲時便送他到美國讀書，一去便是六年；結果，往日被標籤為奀皮仔的Kenny，真的長大了、成熟了。最近他更加入創業行列，於跑馬地開設快餐店，從入貨、下廚、送餐至收銀全是一腳踢。尹光語重心長地說：「希望佢搞得好好哋，我依家都晚年囉，佢搞得好，將來嘅生活咪好啲囉。」

尹光的二十七歲兒子Kenny，最近在跑馬地奕蔭街開了一間美式快餐店，尹光與太太也不時落舖幫忙，一家三口同心合力。

○七年，尹光為亞視拍攝劇集《靈舍不同》，當時從事保險業的兒子Kenny前往探班。

父子同心

「佢同個仔以前好似情侶咁，成日都攬住行，冷落我o架！」尹光太太李麗儀投訴。

別人眼中粗鄙、愛唱市井不文歌的尹光，在兒子Kenny眼中，卻是詼諧惹笑又玩得的模範爸爸，更大讚爸爸走對了歌路，「以前細個喺香港讀書，我都冇同老師同學講，我父母係邊個，有啲老師睇雜誌、睇電視見到我先知。因為我成日欠交功課又曳，所以佢哋認定我係因為要上電視而影響學業，其實根本就唔關事。」六歲便跟爸爸合唱〈荷里活〉的Kenny說。

樣貌俊俏的Kenny，小時候已經曾跟爸爸上《歡樂今宵》接受汪明荃訪問，又曾經客串過電影《老表發錢寒》；早年更隨爸爸走到文化中心的舞台上，獨唱一首〈浪子心聲〉，歌藝絕對非一般，他憶述：「我細細個就覺得上台唱歌係一件好自然嘅事，我唱歌嘅時候，爹哋媽咪都有喺側邊畀啲意見我，教吓我點唱。不過，唔係好正式、提點下嗰隻；到依家，我同朋友去唱K，我都仍然係『咪霸』嚟o架！老實講，我曾經想入娛樂圈，但我明白做歌手、藝人一啲都唔容易，我諗我未必夠成熟去處理呢份工作。」

尹光表示，對兒子的任何決定，他都會支持到底，然後詳細分析利與弊，再讓兒子選擇。正如數月前，兒子決定開一間美式餐廳，從未涉足生意的尹光，也找來搞飲食的朋友，給點專業意見，終一圓兒子創業夢，在跑馬地奕蔭街開設快餐店The Fallen Wingels，Kenny說：「我初頭話要開餐廳，爹哋為咗幫我，仲瞓唔着，然後即刻打畀啲朋友攞意見，我知佢好錫我！」

Kenny小時候像個女孩子，因此被姑姐換上裙子拍照，難得兩歲的Kenny，小小年紀已經懂得對着鏡頭擺甫士。

尹光與兒子經常糖黐豆攬到實，圖為Kenny在九歲時，偕同父親到尖沙咀遊玩時攝。

Kenny於美國留學期間，曾於餐廳做兼職，因此懂得下廚炮製美食，當日更親教父親尹光如何整漢堡包。

判若兩人

「我希望創立一個屬於自己嘅品牌，主打雞翼小食，啲醬汁都係自己特別調校o架！我想由呢間小型嘅店慢慢做起，八十後其實唔係個個都咁懶咁冇用o架！」Kenny咬牙切齒的說。

沒錯，生於富裕家庭、父親尹光隨身帶着逾十萬現金的Kenny，從未與「貪威識食」四字掛鈎。從美國畢業後，便返港從事國泰地勤工作，試過連踩三十六小時面不改容；然後又先後當過會計經理、保險從業員等，希望透過接觸不同行業增加個人閱歷、豐富人生，尹太說：「佢最鍾意試呢樣試嗰樣，係雙面性格嘅人，玩嗰陣可以好癲，做起嘢上嚟又好認真、好有自己主見。」

不過，眼前說話頭頭是道的Kenny，原來曾是學校中數一數二的小霸王，令老師、家人頭痛不已，「我細個真係好曳o架，三日一小單，四日一大單，畀阿爸打完又曳過！」他帶點悔意地說。慶幸到美國留學後，Kenny經歷寄養家庭的刻薄、外國同學的排斥，訓練出獨立堅強的個性，更明白到家人的重要性，「我十八歲嗰陣喺美國撞咗車，架車total loss，好在人冇乜事。當爹哋媽咪知道咗之後，佢哋既擔心我嘅身體，又會諗我冇車用點樣可以返學呢？我完全感受到佢哋嘅關懷備至，令我更加感覺到家庭嘅溫暖！」

九六年，尹光一家三口到印度參觀泰姬陵，十二歲的Kenny盡得父親真傳，鬼馬過人。

尹光對兒子百般支持，為了讓兒子創業，尹光更四出找經營飲食業的朋友提供專業意見，絕對是廿四孝老竇。

今日，Kenny已經由百厭仔變成思想成熟的創業青年，當前最希望找到人手在快餐店中幫忙，以免母親每天要提早起牀替他切菜、清潔店舖，尹光說：「我呢個仔總算不過不失喇，佢唔走去追龍、食fing頭丸都偷笑啦！佢依家咁忙，我嚟緊一月十二、十三日喺文化中心舉行嘅時代曲演唱會，我諗佢都做唔到嘉賓囉。依家只係希望佢搞呢間舖搞得好好哋，將來佢嘅生活咪好啲囉，如果搞得唔好，佢第時就要辛苦啲喇，我都晚年囉！」尹光說時無奈又期待，細嚼兒子親手炮製的漢堡包。