咪神徐淑敏意國險被擄劫
「無綫咪神」徐淑敏（Suki）與老公黃浩前日在意大利「驚」險三分鐘，Suki險被劫及擄走，嚇得她大嗌救命，飽食驚風散的她猶有餘悸說：「咁大個女未試過咁驚！」
快將榮升老闆的徐淑敏日前撇低兩名寶貝女，與老公黃浩歐遊公幹，此行Suki學習調製香水，兩公婆順道拍拖鬆一鬆，四出觀光Shopping。前日，Suki與黃浩繼續意大利的行程，在首都羅馬轉酒店時，酒店職員幫忙將行李放進車尾箱，但因行李放置不當，車尾箱閂不合，當黃浩準備開車時，車尾箱燈號隨即亮起，他便行到車尾位置整理。
老外圖衝上座駕
獨留車廂的Suki此時發覺不遠處有十名彪形大漢緊盯二人租用的Benz座駕，其中兩名大隻佬作勢走近司機位，似有所行動，Suki大驚即時嗌救命：「老公，快啲返嚟，佢哋想開車呀！」黃浩聽到老婆呼叫，一個快步跳上車，隨即Lock實車門，極速飆車離開。二人總算有驚無險，但已飽食驚風散。
事後黃浩和Suki接受本報記者長途電話訪問，Suki猶有餘悸地說：「當時好驚，老公話未見過我咁惡咁激動，心情隔一陣先平復到！」她表示事發後都不敢四出暢遊：「之後都好驚，唔敢落車睇風景，只喺車上睇，同埋想盡快離開，繼續其他行程。」
曾計劃保鏢隨行
Suki說到差點被擄走時仍然激動：「係呀！當時如果佢哋一上車，我會即刻跳車o架！（有冇請保鏢跟身？）去之前計劃過，但聽朋友講可能會有不良分子同保鏢聯線打劫，我咁大個女未試過咁驚！」至於會否縮短行程，盡快回港？Suki說：「因為已經Book好機票同酒店，唔可以縮短行程，所以都唔會提早返港。」
第一手消息請下載on.cc東方互動iPhone/iPad/Android Apps
專案組
雖為兩女之母，但咪神徐淑敏繼續性感，如被擄走，後果堪虞！（資料圖片）
徐淑敏與老公黃浩拍拖歐遊。
租車公司以「普通價」租出Benz予徐淑敏兩公婆，不料變成「好帶挈」！
徐淑敏與老公黃浩自爆於羅馬險被劫車，驚到呢！
揸Benz招搖出事
徐淑敏老公黃浩對於在羅馬的「驚」歷，他認為與座駕太招搖不無關係，他說：「原本要求租車公司租架普通車，點知對方話冇晒普通車，反而以普通價錢Upgrade咗我哋坐Benz，可能因為咁，加上又係中國人，所以好多人向我哋行注目禮，都有啲不安。」他表示事發後只會駕車到人多的地方，遠離偏僻地區，如果遇到街上有警車，他會索性將座駕停泊在旁，以策安全。
徐淑敏遊意大利，不料此行又「驚」又喜。
羅馬治安差 華人易成目標
不少藝人愛到意大利旅遊，首都羅馬更是必遊地點之一，然而當地治安欠佳，單是去年已有35宗劫殺案，意警指華人被認為是「最富有的外國人」，故容易成為搶劫目標。今年1月，有華裔一家三口在當地遇劫，父女慘被槍殺，僅母親生還。難怪華人遊意國，會格外提高警覺。
羅馬著名景點之一 — 許願池。
琦琦華哥歐遊破財 失十幾萬貴價相機
經常到歐洲工作及旅行的名模琦琦，認同意大利治安確實差！她亦不只一次在當地被偷錢，又指「賊人」叫人防不勝防：「試過同孟廣美喺羅馬行街，有個婆婆同細路問路，佢哋攞住地圖同報紙問路，我哋好認真幫佢哋，但原來個小朋友隻手喺報紙遮住下拉開我哋個袋想偷嘢，好彩及時發現鬧佢哋，佢哋即時逃跑。」
爹哋被偷一萬歐元
琦琦又指影星老公任達華曾在機場拿行李時，發現行李被開過：「裏面啲嘢唔見咗，老公唔見咗值十幾萬嘅相機。我爹哋都試過喺羅馬五星級酒店畀人偷咗一萬蚊歐元，佢嗰時係去做嘢，諗住帶多啲錢出街。」
她續說賊人鍾意向亞洲人埋手：「因亞洲人會帶多啲錢喺身，所以去意大利真係要好小心，我平時帶嘅袋一定有兩條拉鏈，最好有袋中袋，冇咁易被偷錢。」
琦琦與華哥不時歐遊工作，更曾一同到意大利出席威尼斯電影節。（資料圖片）
歷天災遇人禍
不少藝人出外旅行期間，曾不幸遇上天災或人為意外，幸最後化險為夷。
李連杰
2004年12月南亞海嘯期間，國際紅星李連杰正與太太利智及女兒在馬爾代夫旅行，危急關頭，他手抱當時４歲的女兒偕妻逃難，不小心弄傷腳部。
汪明荃
2006年，阿姐汪明荃與丈夫羅家英到內地打高爾夫球後，駕車返港期間在內地高速公路遇「撞車黨」，有人企圖截停他們，飛車至公路收費處才報警脫險。
賈曉晨
2011年1月底，無綫女藝員賈曉晨與父母遊埃及，遇上當地政局動盪兼宵禁，他們向中國領事館求助，最後乘坐包機返抵北京。
李連杰
汪明荃
賈曉晨
留言列表
