快週刊 607期 Lucas IQ 列資優張柏芝佈陣再生天才 @ 明星靚相大分享☆

恭喜！恭喜！貴為謝家金叵籮的Lucas，據聞最近一次IQ測試中，證實屬於資優兒童，即IQ高達130以上，精靈可愛加聰明，遺傳晒謝霆鋒同張柏芝資優良基因。

而話咁快，Lucas細佬五月就出世，出名愛子心切的柏芝，為保虎兄無犬弟，有傳在高人指點下於家中布下九龍天才陣，誓要再生資優B，又託奶奶拉姑Book定四面佛上契。BB未出世，霆鋒已一搔11年之癢勇奪亞洲電影大獎「最佳男配角」，果然好腳頭。

自07年出世後，Lucas不僅集萬千寵愛在一身，更不斷受到傳媒追訪，難得人仔細細已盡顯大將之風，從來唔驚鏡頭，加上拍得住老竇的俏臉，令Lucas成為童界風頭躉，盛傳有內地廣告商出到一千萬天價請佢拍奶粉廣告。

聰明Lucas

精靈可愛都算，最令其他媽咪妒忌係Lucas仲要好聰明，謝婷婷就曾多番宣揚侄仔的精叻事跡，一歲識嗌爸爸、媽媽、爺爺、哥哥、姐姐，兩歲識叫姑姐兼講英文生字，勝過不少同齡小朋友。

「霆鋒同芝自己讀書唔多，所以好重Lucas教育，唔止俾佢飲幾百蚊罐天才奶粉，由一歲開始就請家庭教師幫佢補習，不過最緊要都係Lucas本身聰明。」知情人稱。

而自從一月開始入讀每年學費六萬七的Sunshine House International School後，Lucas進步驚人，據知，最近Lucas曾接受IQ測試，發現佢係資優兒童，IQ高達130以上，令謝家上下歡天喜地。

九龍天才陣

「大家都知Lucas好精叻，但冇諗過佢係資優兒童，知道呢個消息後最開心係霆鋒，佢一直都唔想囝囝大個後入娛樂圈，家Lucas IQ咁高，做律師、醫生乜都得啦！反而柏芝有愁，哥哥咁叻，怕第時細佬追唔上。」知情人續稱。

不過擔心都係多餘，貴為風水一族的謝家，拉姑有四面佛，霆鋒有種生基，早已為Lucas細佬布下九龍天才陣。據知，芝在高人指點下，於其舂坎角Ocean Bay豪宅的東北位放一道九龍璧，配合多種風水法器襄助，加上已選定5月6或9日兩大吉日開刀生仔，有催生天才之效。

「今年東北方係文昌位，九龍者，九為最大數，龍代表君王，擺九龍璧做風水陣的確可以令準備出世BB更聰明。」玄學家吳佩夫師傅表示。