紳寶 SAAB 9-3 Turbo X 全港四部七折買極罕紳寶 @ 明星靚相大分享☆

SAAB形象實在太斯文穩重，同你講佢都有架 290匹、兼破天荒玩四驅，有力跟掃把佬一戰，你都未必信。不過呢架 Turbo X就真係嚇你一跳， 08年推出時全港僅得四架， 290匹+ Turbo未係最勁， 400Nm嘅推背扭力先最驚人。記者：徐影龍　攝影：楊錦文Model： Paris@Pure Models

最高規格大 T增壓放大圖片
■原裝 19"大軨，「 3U」款式又幾別致喎。

■原裝 19"大軨，「 3U」款式又幾別致喎。

紳寶副 2.8L偈明明夠馬力，玩咗咁多年斯文房車，終按捺不住，卒之喺 07年法蘭克福車展推出引伸自概念車 Aero X嘅量產版。呢架 9-3 Turbo X全球限量 2,000架，香港更僅得四部配額，分別係兩部 Sport Wagon及兩部 Sport Sedan，所以你未聽過 SAAB有本事力拼掃把佬 Impreza劈街，其實一啲都唔奇。SAAB玩開頭偈頭轆（ FF），為省招牌，首度跟 Haldex共同研發四驅系統 XWD，再融入 Turbo X之中，仲要係永遠咁好力嘅全時四驅，令到架 9-3房車突變成一部咬地貼彎嘅猛獸。雖然 2.8L Turbo偈都有幾款，但 Turbo X屬最頂級嘅「大 T」規格，渦輪採用高度增壓（ High Pressure）技術，令極低轉已出現 400Nm扭力，吊住千零轉就開始「黐背」，上到 3,000轉以上，直頭有瘋狂推背能力！不過車行經理 Martin補充番：「為保護波箱同引擎，原廠將 123波扭力極限鎖住，但一上到 4波就好瘋狂，而且彎位依然實淨，絕對有能力贏掃把佬。」以後見到紳寶咪隨意車，睇清車尾有無 Turbo X個車章先好恰佢呀。

有辣味有家庭 Feel 放大圖片
■旅行車夠闊落，座椅亦如歐洲梳化咁軟熟舒服。

■旅行車夠闊落，座椅亦如歐洲梳化咁軟熟舒服。

玩得限量，外表當然跟普通 9-3有所不同。全世界 Turbo X均只提供「噴射機金屬黑」車身，想要其他顏色唔該自行翻噴。 Turbo X遠睇似架黑色沉穩旅行車，行近啲先發覺金屬底油、鈦色噴塗同內櫳碳纖裝飾，辣味由底滲出嚟。內櫳設計偏向闊落舒服，大熱天時嘆住冷氣，聽埋原廠安裝嘅 BOSE音響、 7個環迴靚聲喇叭，再加尾廂隱藏擴音機同特大低音鼓，實在舒服到令人唔想落車。今時今日，好多車主唔會揀齋辣或家用車， Turbo X Sport Wagon有齊兩種車格，特大尾廂極之實用，一家大細去沙灘或野餐又得，熱血爹哋閒時爽吓亦得。最吸引係 08年 10月出牌，只行咗 8,000km，車內車外新簇簇。而且唔夠兩歲，仲有 18個月大昌行保養維修，以及 Check車、換油、換油隔風隔等服務，有 SAAB代理背後 Backup，自然更有信心。

放大圖片
■駕駛艙一貫踏實斯文，唔會嚇親老婆囝囡。