如果2009年度香港小姐競選，可像世界盃般投注決賽組合，即是冠亞軍人馬，我一定會在賠率還有一百幾十倍時，瞓身買冠軍劉倩婷和亞軍李姿敏，然後贏大錢。當然我也承認，劉倩婷那一屆，只是十選一，命中率較高。

自面試的「風騷任葆琳」時期，到終於有名有姓，及至決賽當晚，4號劉倩婷（Sandy）一直是我心水冠軍。這位冠軍剛剛卸任，由「應屆港姐」，變身「無綫藝人」。

「經過今年做過香港小姐嘅嘢，都發覺自己好鍾意、好有興趣喺呢一行嘗試拍劇、拍戲。我唔係為咗錢，我覺得名利係come after你做得好唔好。我唔會為咗想出名而出名，都唔係為咗錢。我鍾意唱歌跳舞，好有表演慾o架！同埋做呢行可以娛樂人哋，睇戲或者睇劇會令到我好開心，或者感受到好多嘢，我都希望同樣用呢樣嘢去感受到其他人。」

我的心水，從來不會錯。正如張舒雅也不是我心水，陳倩揚、馬賽才是我當年的決賽組合，幾多選一？又如何！

▲2002年冠軍林敏俐是劉倩婷表姐，她現身在美國打理由父親創辦的飲食集團。亞軍的左慧琪（右），季軍的胡家惠，全部消失娛樂圈。劉倩婷呀，唔好學佢哋喎。

壓力

身邊不少人歎，即使新一屆港姐誕生，誰是三甲也不是人人說得出，更遑論認得她們。劉倩婷也深深感到，港姐選舉已沒有李嘉欣年代般冠冕堂皇，全城感動。

「呢個真係一個好難答嘅問題，你都可能要問吓無綫有咩救法。我覺得好可惜，我自己都有諗過，如果好似以前咁就好喇。或者我哋啱啱選出嚟嘅時候，啲人未必認識我哋咁深，啲人可能少睇咗。我諗慢慢喺呢行耐咗，希望大家會認識我多啲，香港小姐始終係香港一件好大嘅盛事。」

沒錯，對報紙娛樂版是一件很大的盛事，卻只限決賽舉行前。

「我好記得，第一日面試後，報紙出咗我好大張相，係讚嘅。每一次我都提醒番自己，呢一行，捧得你起，都可以跌得低，呢一行永遠唔係你贏晒，唔會佢話我大熱門就沾沾自喜以為自己贏。佢愈係咁我愈擔心，因為呢樣嘢人哋對我太大期望，都係壓力。

「第一次面試，我係第一個入場畀記者影。見到百幾個記者，我呆咗，原來真係壓力嚟o架喎，唔係之前求其交咗張form就算。」

成為大熱門後，也不免被人狂起底。

「我嗰陣時新聞都多，我自己都冇諗過會咁多，好多當然唔真實、好誇張，有一段時間真係down過，我同媽咪望住份報紙，都唔知嬲好定喊好定笑好， 一次係咁兩次係咁，自己知道唔係真嘅，就由得佢哋講。

「我最主要都係同我媽媽傾訴，我繼父過身之後佢都係我一路嘅原動力。我好多時仲擔心佢唔開心，唔係我自己，因為我啲嘢影響到佢，佢好堅強，佢同我講唔緊要。

「我一路抱住平常心，我係完成爹哋、媽咪同自己嘅心願，做到香港小姐係非常榮幸嘅事，所以我冇猶疑過。」

▲劉倩婷和李姿敏由北海道拍畢外景回港時，一同應記者要求拍照，造就這幅冠亞軍暨家人合照，劉倩婷的同母異父弟弟，比她年輕十幾年，常充當姐姐的心理輔導員。

自信心

劉倩婷十四歲時，在沒有父母陪同下，隻身到英國讀書，後考進倫敦大學經濟系，畢業後晉身高盛當證券分析員。

「喺嗰邊追我嘅，中國人同外國人都有。唔知點解香港啲男仔唔係好埋我身，可能我比我同年嗰啲成熟啲，我又好talkative，佢哋又好怕醜。

「我讀書OKo架，去到嗰邊跳咗一級，同我阿媽慳咗廿幾萬。我攞咗獎學金轉第二間中學，跟住入到倫敦大學。我不嬲都好努力，想讀得好。我鍾意跳jazz同hip hop，跟住跳salsa，大學二年級仲做咗salsa會會長。

「生活都係返學多，星期六日同啲朋友出去，有時都頗苦悶，係做嘢之後先有少少生活。讀完書都攰到唔想做嘢，食嘢然後瞓覺，仲攰過依家。」

在歐洲的自由空氣中，劉倩婷沒有學壞，而是鍛煉到一份自信心出來。

「我表面上可能係一個好遲鈍嘅女仔，其實去英國攞獎學金，入到間好大學，入一間銀行，呢啲全部都係我自己努力得嚟嘅自信心，你估坐屋企睇電視就有自信心呀？我覺得一定要自己爭取！」

不要童話

不是我要抹黑美貌與智慧並重的港姐，但多位劉倩婷的前輩，確實與富豪包養傳聞扯上關係。另一方面，劉倩婷的父母在她三歲離婚，塑造了這位小妹妹堅強的性格。

「你話冇影響就假嘅，始終喺嗰個環境長大，令到我自己唔係相信好童話故事式嘅愛情故事。好嘅伴侶唔容易搵，要好小心去揀，可能驚被傷害，媽咪又被傷害過，我知道條路唔容易走。我自己要獨立啲，有番自己事業，希望將來搵一個真心錫我嘅伴侶囉！

「做藝人滿足感大過做銀行，做藝人可以娛樂到人，令人哋開心，你會代入其他角色，娛己娛人，自己好玩之餘又娛樂到人哋。反而為錢嘅我會留喺銀行。人哋問我係咪諗住嫁有錢佬， 如果係，我就留喺銀行繼續發展啦！

「我覺得幾億同幾千萬，唔會畀到我太大開心嘅分別。我好識知足，講真，銀行都好多追求者。依家絕對唔係我踏腳石，我真係想搵個錫我，照顧到我嘅，你話搵到好多億，但又唔係好理我嘅，我寧願唔要個啲嘞。」

各位有志之士，如果想約劉倩婷小姐傾偈，牢記不必用酒精，事關她不好杯中物。

「飲酒我一杯就醉o架喇，因為我就係飲咁少，有啲人會飲十杯，我會控制到我自己，我都唔係咁enjoy酒啫，一杯就OK囉。我個人會natural high，我飲水都可以好興奮o架喇！」

這樣，事情反而簡單得多。下次只要去劉媽媽打骰的茶餐廳，推門，進去，坐下，說：「畀杯滾水我。」或者會掂。

▲「我本身都唔驚挑戰，以前十四歲自己一個人去英國，無親無戚，咩都唔識，咁細個都咁勇敢。雖然參加香港小姐都係壓力，但我無懼囉！好多人都問我如果輸咗咁點呢，我又冇諗到咁遠！Nothing to lose！」

十五選一

未選出劉倩婷時，是否由hea爆港姐張舒雅加冕，也爭論了好一陣子，終於由第五屆冠軍朱玲玲負責加冕。

「，講真，上屆香港小姐頒畀下屆係一個傳統嚟嘅，呢樣嘢我都係expect咗嘅。當然由朱玲玲加冕畀我，我係非常非常之榮幸同開心，好特別嘅一樣嘢。我覺得攞到冠軍，從邊個手上得到，我都會好開心。」

時光荏苒，一年過去，劉倩婷剛交棒予新鮮出爐的陳庭欣。決賽開騷前，劉倩婷眼泛淚光，卸任有感：「感覺好複雜，呢一年過得好快。」她賽前睇好8號彭慧中，喜歡她笑容溫和。

今年我沒有決賽組合，卻和劉倩婷一樣英雄所見，只得一個心水冠軍8號彭慧中，最後也一同全軍覆沒，豬肉獎也沒一個。

完騷，出過字幕，我想，劉倩婷泛的淚光，會不會另有原因？

劉倩婷這個冠軍，反傳統地由在她三十二屆前的朱玲玲加冕。

劉倩婷勤勤力力，所以返回傳統，為陳庭欣加冕。