抄 Theresa 抄出禍　Stephy 賣碟創新低壹週刊 1066期 @ 明星靚相大分享☆

Stephy（鄧麗欣）同Theresa（傅穎）的牙齒印，自八年前Cookies年代已經積落，即使Theresa過檔星皓，Stephy依然無時無刻咬住死敵唔放。像近日Theresa轉型做「舞女」歌手，Stephy二話不說，搶走同公司好姊妹Kary（吳雨霏）的出碟檔期，照辦煮碗做「舞女」出碟。由於時間倉卒，宣傳唔夠加上唔唱得又唔跳得，高峰期憑大熱hit歌《電燈膽》賣碟過兩萬的Stephy，今次新碟首批出貨四千賣足半個月仍然有剩，今時唔同往日。

中途截擊
在金牌年代俾Stephy玩小圈子放暗箭的Theresa，過檔星皓後終於得寵，公司安排日本攝影大師米原康正為她影性感寫真《About Her》，另外又跟韓國老師學跳舞，鋪路轉型做港版GaGa。死敵事業有起色，睇唔過眼的Stephy即時「做嘢」。據了解，金牌原本安排Stephy八月中出碟，當得悉Theresa書展期間有跳舞新歌面世，於是力sell公司出跳舞碟截擊，由於時間緊迫，金牌方面唯有押後推出Kary同Hardpack合作的新專輯《合家歡》，將檔期讓出俾Stephy迎戰Theresa。
根據唱片公司現行的宣傳手法，即使是當紅歌手如容祖兒、陳奕迅等，至少用兩至三個月時間派歌做宣傳，待樂迷對新歌變得「滾瓜爛熟」才推出專輯，才能保證理想銷量。但臨急抱佛腳的Stephy，由派歌上台到出碟只相差幾日，宣傳攻勢又唔多，首批出貨四千隻，賣咗半個月，四圍賣剩蔗。

收買人心
截胡出師不利，但Stephy一於少理，繼續咬住死敵唔放，新歌MV台前幕後班底全部抄足Theresa，由導演、舞蹈員、以至化妝髮型，指定用埋同一班人。Stephy更使出獨門玩小圈子本領，成功收買化妝師Cyrus，在Theresa拍攝新歌MV《加加夫人》當日，抽空為她化妝出席活動，爭人爭到出晒面。
對於Stephy咬住唔放，Theresa扮大方說純粹誤會一場：「大家都做跳舞歌，完全係因應市場需要，至於化妝同髮型，由出道開始我哋已經用呢班人，可能中途Stephy換過人，先至令外間有誤解！」

挑撥離間
上週三（八月四日）四餅碎（Angela、Helena、Gloria同Elaine）舉行《曲奇Happy2gether音樂會》，由Stephy好姊妹Angela做搞手，Stephy雖然要返大陸拍劇無緣現身，不過亦打定小報告，唔想見到Theresa在「餅碎騷」台上出現。
好姊妹的心意Angela一早收到，所以被傳媒問到有否聯絡Theresa出席時，Angela毫不掩飾說：「我哋幾個都有facebook同MSN聯絡，唯獨同Theresa冇，我冇佢電話，facebook都冇。呢個交俾公司搵啦！」

積怨多年
Theresa與Stephy積怨多年，由餅女年代已因住屋問題結怨，直到各自分開發展，因為爭做「金牌一姐」而明爭暗鬥，即使去年Theresa離巢轉投星皓，二人的不和傳聞仍是沒完沒了。

拒絕同居
家住屯門的Stephy與Miki，原本打算聯同Theresa夾錢租屋住，但當時Theresa跟何韻詩關係密切，於是拒絕租屋提議，為此Stephy一直耿耿於懷。

玩杯葛
餅女分拆後，Stephy率先跑出，零工作的Theresa眼紅死敵，於是聯同Miki玩杯葛，雙方從此勢成水火。

爭一姐
08年，Theresa染金毛戴大眼仔轉走o架妹路線，推出處女寫真《Smiling》人氣大升，相反Stephy因「鄧走音」之名氣勢下滑，Theresa趁大好機會攝位做一姐，令不和升級。

踩場
09年，Stephy主演電影《保持愛你》舉行首映，Theresa忽然大露背真空現身，搶盡風頭，Stephy主角變配角，更拒絕與Theresa合照。

打壓
09年7月，二人於同一時間在書展舉行簽名會，其間更爆出Stephy聯同公司同事，呼籲歌迷聯手打壓Theresa。

陰招踢走
去年金牌大地震，有太子基關照的Stephy，乘機趕絕Theresa，慘被杯葛嘅Theresa被公司投閒置散，最後要發律師信主動提出與金牌解約。