HONDA PCX 125i 停 3秒即熄偈　環保羊 Stand By 慳油 @ 明星靚相大分享☆

樣樣交通工具都排住隊加價，家住元朗的我，每日出九龍上班的交通費差不多要每程$30，有朋友就叫我買隻環保羊，一定慳過搭巴士。原來 HONDA PCX 125i的油耗每公里唔使$0.3，每程油錢$10都唔使。咁慳油全因它配備了 Idling Stop，唔使政府呼籲都識停車自動熄偈，為環保電單車創先河。記者：許維雅攝影：伍慶泉Model： Boo@Zmodel.com

全球首部環保羊

新一代個個都要學踏上環保之路，當你發現連超跑法拉利都玩 Hybrid之際，相信無咩事係無可能。一向以慳油見稱的電單車亦開始加入環保陣營，率先領軍的品牌由 HONDA負責做開荒羊，推出環保羊 PCX 125i，更成為今年的重頭戲，日本零件再由泰國 HONDA裝嵌，無論外形同理念都帶來新鮮感，當中的 Idling Stop功能更是絕密武器，透過 PGM FI電控供油技術，再配合 ACG無制式交流發電機的運作，打造出「停車 3秒會自動熄引擎」的環保電單車新技術。

最啱女仔揸

買了架 PCX 125i回來代步，單是香檳金車身顏色已夠搶眼，大大隻蝴蝶形頭燈唔止外形靚，着大細燈時仲可以兩邊着晒，唔會鴛鴦咁肉酸。加埋感覺年輕的修長車身線條、車架輕盈易托的便利、 14吋輪圈的穩定性，實在啱晒我呢類個子細小女仔的口味。最重要係儲物箱夠晒大，返工帶大袋都唔驚無位放，而且跟車的原廠防盜夠穩陣，泊喺邊都咁放心，設計及配備細緻周全。為環保出一分力，當然要啟動右手邊的 Idling Stop按鈕開車，慢車停燈位，引擎於三秒後便會自動停止進入 Stand By狀態，只要輕輕一扭油門，引擎又會即刻重新啟動立刻開車，感覺有趣。新技術唔止可以慳油，還有低排放效果，騎住 PCX 125i特別醒神呀！

油費慳 1/3 放大圖片
a.3秒自動熄偈的 Idling Stop功能為環保電單車揭開新一頁。

a.3秒自動熄偈的 Idling Stop功能為環保電單車揭開新一頁。

PCX 125i的坐姿夠晒舒適，即使日日揸長途車都唔覺攰。一般 125羊最慳油的型號都要約$0.4/km，但我騎住 PCX 125i返工，由元朗來回九龍都唔使一公升油，加埋約 55km車程，當每公升油$14.25計，嘩！耗油只約$0.28/km，抵過搭車返工之餘，來回走一轉亦比傳統羊足足慳成$6，真係抵呀！

放大圖片
b.用不同角度睇蝴蝶形頭燈都感覺形狀不一，搶眼有型。