扮前後腳到

內地富商黃有龍三年前移情趙薇後，失戀葉翠翠一直冇 着落，雖然一度殺出大茄韋家雄，在電視劇《 4 in Love》戲假情真微博瘋狂示愛，可惜神女冇 feel即時落閘。
但剛踏入三十歲的葉翠翠早有目標，今次講心唔講金，跟細她三年、月薪只有兩萬幾的香港先生高鈞賢（ Matthew）秘密撻 着一個月。週日晚，二人前後腳出席王浩信及陳自瑤婚禮後，唔想男友醉駕，葉翠翠做埋柴可夫，送高鈞賢返將軍澳寓所，逗留至凌晨一點，才獨自返回賽西湖豪宅休息。

早落車扮自到

王浩信及陳自瑤週日晚（十一月十三日）在港島香格里拉酒店擺酒，不少圈中人都有出席，其中跟新郎合作過《飛虎》的高鈞賢，同葉翠翠一齊坐的士出發。為怕同車引起懷疑，高鈞賢提早在酒店外落車，等穿上白色西裝外套、黑色貼身裙的葉翠翠可以單獨出現。
據知，二人是合作電視劇《當旺爸爸》撻 着，拍拖只有一個多月，啱啱拍拖更加難捨難離。王浩信擺酒當晚七點，葉翠翠收工後由電視城駕車到將軍澳君傲灣接男友，過紅隧後，葉翠翠先將坐駕泊返賽西湖寓所。停車場燈光昏暗，附近又無住客經過，二人即放下戒心愈行愈埋，愈講愈興奮的高鈞賢，索性捉住女友的手唔放。之後二人一齊搭的士落金鐘，但明知香格里拉酒店門外有大批傳媒，二人於是前後腳落車避嫌。



接男友葉翠翠跟高鈞賢出席王、陳婚禮，女方先到將軍澳接男友，不過二人先返賽西湖將坐駕泊低。

拖手仔落車後，高鈞賢極速拖住女友手。

行到較光位置截的士，二人又再鬆開手，高鈞賢更不時兩頭望，到香格里拉後，二人扮前後腳到場。

送返屋企男友飲多兩杯，葉翠翠再做司機，由賽西湖屋企出發，送他返君傲灣，兩人見停車場冇住客，即放下戒心，又搭膊頭又繑手。

捱夜做司機

婚宴內，二人依舊保持距離，未有同坐一席。飲到十一點半，葉翠翠先行上的士離開，之後又吩咐司機折返，原來要接走飲到面紅紅的高鈞賢，一齊返賽西湖。之後葉翠翠揸車，親自送男友過海，返將軍澳君傲灣屋企。
到埗後，葉翠翠將座駕泊在君傲灣臨時車位，跟男友在停車場散步，飲大兩杯的高鈞賢全程無停嘴， 氹到女友笑唔停。接近凌晨一點，腳步浮浮的高鈞賢上樓後，葉翠翠才返回賽西湖。



拍攝《當旺爸爸》時，就算跟一班劇中演員合照，二人表現得零舍親密。

二人秘密拍拖，上週更有讀者報料，拍得他們在太古廣場睇戲，男方戴 cap帽，女方則戴眼鏡，刻意打扮普通。

假戲真做

葉翠翠跟高鈞賢先後合作過多部電視劇，無獨有偶，二人次次被安排飾演情侶，終於假戲情真撻着。
「佢哋兩個不嬲都幾好朋友，尤其係三年前翠翠俾黃有龍飛完再俾公司雪藏，心情差得好緊要， Matthew當時都好關心佢，成日陪傾偈約食飯，呢啲翠翠都記喺心。到早排 Matthew同日本女友甩拖，成日搵翠翠解悶，兩個人見面多 咗，撞啱又再合作，咪自自然然走埋一齊囉。其實佢哋都唔算好刻意收埋，翠翠都有睇 Matthew打籃球。」知情者說。
對跟高鈞賢拍拖，葉翠翠未有否認：「我哋係好朋友，佢 嗰日（王浩信 YoYo擺酒）冇揸車，我送佢返屋企 啫。」同女友口徑一致，在內地開工的高鈞賢表示：「我 哋不嬲都好朋友，翠翠見我飲多 咗幾杯，咪送我返屋企。」



拍古裝劇《公主駕到》，二人又再扮夫妻，在宣傳活動上，高鈞賢更拿出手機跟劇中老婆影合照。
大茄韋家雄跟葉翠翠合作《 4 in Love》時，直認愛上女方，更在微博骨痺示愛，不過被女方請食檸檬，他亦知難而退。
大茄韋家雄跟葉翠翠合作《 4 in Love》時，直認愛上女方，更在微博骨痺示愛，不過被女方請食檸檬，他亦知難而退。
在高鈞賢微博，放了他跟前日本女友合照，不過長時間分隔兩地，拍拖唔夠幾個月就散。
在高鈞賢微博，放了他跟前日本女友合照，不過長時間分隔兩地，拍拖唔夠幾個月就散。

千萬女友 VS打工仔港男

葉翠翠
08年，正與內地富商黃有龍拍拖的葉翠翠，豪擲三千萬連買兩個北角賽西湖千呎單位，並先後以$1,610萬及$2,100萬放售，勁賺一筆，之後以月租七萬，豪住西貢竹角四千呎獨立屋；最近又再搬回賽西湖居住。

高鈞賢
月薪只有二萬多的 05年港男冠軍高均賢，從加拿大回流返港參選港男，雖然身家跟女友有段距離，但生活向來慳家，未入行前經常身兼數職賺錢，有指他近年投資方面頗有斬獲，現居住的將軍澳君傲灣單位，是早年與胞姊夾份買，目前已升值至六百多萬。



 

微博傳情

 



葉翠翠鍾意整蛋糕，更特登為男友整英式鬆餅，高鈞賢在微博中大讚女友手藝好。

五月高鈞賢生日，葉翠翠是少數被邀出席生日派對的圈中人。

港男擒港姐

每年《香港先生》選舉，台上肌佬配三角泳褲濕身，電暈一眾台下女藝人；現實生活中，港男冠軍一樣殺食，港姐、華姐手到拿來。

羅天宇 苟芸慧

今年五月，新一代咪神苟芸慧直認戀上年輕四歲、 08年少年組港男冠軍羅天宇，發展姊弟戀。雖然羅天宇入行後連二、三線角色都冇份，但苟芸慧依然勁冧，「我最鍾意佢蠢，同佢一齊好舒服。」



翟威廉 陳庭欣

去年八料港男冠軍翟威廉，被踢爆與港姐冠軍陳庭欣拍拖行商場，女方更不避嫌繑實男友的麒麟臂；事後兩人否認戀情，只稱是十分投契的好朋友。



黃文迪 呂慧儀


08年落選港男黃文迪（ Dickson）當年大熱倒灶，但仍得港姐女友呂慧儀力撐入行，兩人拍拖長達七年，早於入行前已認識；可惜 Dickson事業發展不如女友，女尊男卑情況下，宣告分手。

arrow
arrow
    全站熱搜
    創作者介紹
    創作者 stacylife 的頭像
    stacylife

    明星靚相大分享☆

    stacylife 發表在 痞客邦 留言(0) 人氣()

    E-mail轉寄