TVB同四大公司為錢反目，亞視乘機抽水，冧掂張學友拍咗個《張學友的Private Corner》喺大年初一播，點知收視得兩點，變相摑了反TVB陣營兩巴，而最大鑊係，亞視講就口響，提到錢同樣吝嗇，故至今雙方仍未能達成進一步的合作。

眼見如意算盤打唔響，據知，四大公司態度亦開始軟化，不單頒令叫旗下歌手唔好再談版稅風波，讓事件降溫，又緊急煞停陳奕迅亮相亞視的大計，重新展開同TVB談判。踏入虎年，分分鐘和氣收場。

自去年12月爆出版稅風波後，雙方關係劍拔弩張，先係TVB喺《勁歌總選》向四大嘅歌手派蛋，繼而四大公司亦讓歌手以廣東話接受其他電視台訪問，明剃TVB眼眉。


12月決裂 去年12月，四大公司開記招宣布因版稅問題跟TVB鬧翻，之後雙方關係急轉直下。

學友中伏
中坐收漁人之利嘅亞視頻頻向環球示好，企圖拉攏學友、Eason同謝安琪過檔，而本身同TVB冇約嘅學友率先做爛頭卒，亮相亞視節目《張學友的Private Corner》宣傳新碟，藉以測試水溫。

無奈節目出街後，外界反應麻麻，收視只得兩點，相比TVB同時段播嘅《2010國泰航空新春國際匯演之夜》的19點，歌神想露夠三點都唔得！


慘淡兩點 大年初一，學友接受林曉峰訪問亮相亞視，無奈收視得兩點，只有十幾萬觀眾。

Eason縮沙
連學友都出師不利，加上亞視本身資源緊絀，令四大公司被迫重新審視形勢，「其實收視差，佢哋都預咗，始終學友唔係仙丹，冇可能即刻打破TVB慣性收視，但去到歌唱形式節目，真係上去表演，音響、Dancer樣樣都係錢，唔同清談坐低齋講就得，之前雙方傾咗好多次，四大要質素，亞視講慳錢，有好多細節都未傾掂。」知情人稱。


合作成疑 之前亞視高層葉家寶（左一）高調亮相學友新碟記招，仲話大家有好多合作計劃傾緊，但暫時未有下文。

由於之前要向TVB施下馬威，環球急急放謝安琪亮相亞視全新音樂節目《娛樂紅人館》，節目以新聞報導形式訪問歌手，不過阿Kay嗰Part暫時仲未出街，而本來預定Eason亦會上該節目，但據知已遭環球嗌停，可見雙方合作存在變數。


急急叫停 阿Kay拍咗就話冇辦法，但Eason仲未獻身，故有指環球已叫停亮相亞視的大計

關係轉好
呢邊前景未明，嗰邊同TVB嘅版稅談判反而重新展開，正如陳志雲話齋大家都係輸家，今次再傾雙方態度明顯軟化，「講到尾大家都係商業機構，都係以利益為先，再咁鬥落去對兩邊都冇益，今次大家各自提出咗啲有建設性嘅建議，希望解決事件。」知情人續稱。

隨住關係好轉，學友亦從「叛將」變身親善大使，抱病出席最近舉行的《72家租客》慶功宴，一到場就跟TVB高層樂易玲密斟，又獲委任為TVB代表向記者大派100蚊利是，仲威過同場嘅親生仔黃宗澤。


全程密斟 學友一到《72家租客》慶功宴，就被樂小姐捉住密斟，完全當其他人透明。


高層器重 早前學友的新碟發布會上，雖然雙方關係仲好僵，但樂小姐仍俾面赴會，可見兩人關係非淺。


阿四捧杯 學友要派利是，樂小姐即刻幫手拎走個酒杯，哇！幾好服侍喎！


電影大收 由學友同曾志偉擔正的《72家租客》，勁收二千多萬成為票房冠軍，學友可算是TVB福將。


T記代表 學友俾足面，病都到，TVB亦識做，由佢做代表派100蚊重手大利是。

據知，為彌補雙方就版稅上嘅差距，有人提出多個合作方案，例如合作搞演唱會、為廣告商搞宣傳節目等等，實行有錢齊齊搵。到底四大公司情歸何處？睇怕仲要等多陣。7 E6

亞視奇蹟
雖則話亞視係弱台，收視麻麻，但其實近年佢哋都製作過唔少有收視、有口碑嘅好節目，只係衰在耐力唔夠，往往只能曇花一現，令人大嘆可惜。


《開心大發現》
收視：8點
堪稱亞視的長壽節目，從05年播放至今，差唔多每年都有新一輯亮相，節目以介紹家庭日常生活嘅小知識為主，去到《開心大發現2009》，收視更一度創下8點佳績。


《香港亂嗡》
收視：6點
透過盧海鵬、林超榮等人扮鬼扮馬去諷刺時弊，令《香港亂嗡》於Youtube熱爆，仲誇到出DVD，當中鵬哥扮周秀娜、木村拓哉更可謂技驚四座，收視有成6點。


《亞洲星光大道》
收視：8點
雖然被《超級巨聲》追住打，但《亞洲星光大道》依然口碑不俗，收視高達8點，且捧紅了羅力威等新一代未來之星，依家經已播緊第2集。

無綫亞視對對碰
貴為本地兩間免費電視台，無綫同亞視鬥足幾十年，期間爆出唔少是非不和， 遠嘅有《成吉思汗》、《包青天》鬧雙胞胎，近嘅一樣鬥得萬分精彩。


抄劇潮
繼之前《老友狗狗》爆出抄襲疑雲後，最近無綫本來想開套講巴士情緣嘅新劇，起用前亞視監製關永中嗰Fit，佢之前喺亞視拍過套劇叫《8號巴士站站情》，主角有陳庭威、李婉華，但為免再捲入抄潮，據知，計劃已暫時擱置。


頭淡湯
當亞視宣布舉辦《亞洲星光大道》，無綫火速搞咗個《超級巨聲》，同樣以歌唱比賽形式作招徠，不過就加入古巨基、哈林等多位巨星做串星，仲安排喺星期日硬碰。


刪片段
舊年「金像獎」喺無綫播，當亞視人鮑起靜勇奪影后時，無綫竟刪去對方多謝亞視的得獎感受，惹來各界嘩然，當中導演爾冬陞更炮轟此舉係奴才行為，結果要勞煩總經理陳志雲出嚟道歉，平息事件。


鬥搶人
去年無綫為迎戰亞姐，整咗個《無敵獎門人惡鬥美女廚房》節目，仲請咗周秀娜等多位性感女神壓陣，而亞視亦唔執輸，邀請周秀娜擔任亞視決賽當晚的表演嘉賓，出現周秀娜打周秀娜嘅有趣場面。


玩封殺
金牌監製鄧特希喺08年幫亞視拍電視劇《法網群英》，請咗吳啟華、蘇永康等舊將幫手，有傳兩人變相倒戈的行徑，令無綫甚為不滿，鬧出封殺疑雲。

明星靚相大分享☆復活板娛樂八掛週刊雜誌★娛樂八掛大放送★ 為食譜識飲識食街★ 任逍遙旅行萬里路 ★ 科技電玩一線通 ★ 寵物地帶 ★ 潮流男女打扮★ 健康之道★ 財經投資★ 五行玄學八卦風水★ 娛樂猛片放送站★ 伴我奔馳 賽馬貼士 提供★
明星靚相大分享(4月刊)★ 明星靚相大分享(5月刊)★ 明星靚相大分享(6月刊)★ 明星靚相大分享(7月刊)★明星靚相大分享(8月刊)★ 明星靚相大分享(9月刊)★ 明星靚相大分享(10月刊)★ 明星靚相大分享(11月刊)★ 明星靚相大分享(12月刊)★ 明星靚相大分享(01月刊)★ 明星靚相大分享(02月刊)★ 明星靚相大分享(02月刊)★ 週刊 及 雜誌(4-11月刊)☆ 週刊 及 雜誌(10-2月刊)☆
arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄