明星靚相大分享☆

 "懷孕五個多月的栢芝，肚子已經十分大，但她仍親力親為照顧兒子，不假手他人。"
有求必應
栢芝揼本　鬍鬚勇開娛樂公司
2010年03月11日
五月將榮升第二任媽咪的張栢芝，近日已閉關安胎，將全副精神投放在老公謝霆鋒和囝囝 Lucas身上。成為謝家新抱後，有指霆鋒不滿栢芝一家大細不事生產，黐飲黐食，落 order叫栢芝「閂水喉」，搞到細佬張豪龍、張栢文，以及同母異父家姐戴碧芝要自力更生。
不過，做慣生神仙的栢芝，對家人仲係有求必應，已經絕跡香港多時的親生老豆鬍鬚勇（張仁勇），近月忽然回流香港，更計劃開娛樂公司，安排藝人到馬來西亞及內地登台、剪綵。據知，栢芝已答應背後科水，支持老豆做生意人。
移居馬拉
絕跡香港多時的鬍鬚勇，有關其行踪傳言滿天飛，有指栢芝兩父女早年鬧翻，又有指鬍鬚勇「著草」北上，但實情是呢位超級星爸去年回流香港，並已另組新家庭，近月更有意開娛樂公司大展拳腳。
「栢芝份人唔計較，以前佢搵到，覺得養晒屋企人係應該嘅，有個女照住，勇哥乜都唔使憂，不過，自從個女嫁咗，栢芝分完身家之後就閂水喉，加上呢兩年顧住生仔，又發生過淫照件事，栢芝都停晒工無乜收入，有段時間，勇哥都去咗馬來西亞生活。」知情者說。

近月，鬍鬚勇不時到佐敦茶餐廳打躉。
 
老公霆鋒搵得到，栢芝亦唔介意助老豆鬍鬚勇闖新事業。
 
張豪龍跟家姐栢芝感情要好，兩姐弟食完飯，豪龍仲同 Lucas四圍玩。

進身娛樂界的鬍鬚勇，去年十月，搵嚟大班藝人包括陳惠敏、盧惠光、林國斌、譚小環、梁靖琪、張崇基、張崇德、張豪龍等，到馬來西亞一間海鮮酒家剪綵，不過，鬍鬚勇刻意低調，即使擔任搞手，亦未有出面兼露面。

保持低調
唔想手停口停，跟唔少娛樂圈中人相熟的鬍鬚勇，決定開娛樂公司，安排香港藝人到馬來西亞及內地登台、剪綵和開演唱會，轉行做生意人。
「其實勇哥舊年開始籌備搞娛樂公司，佢份人好低調，只係託中間人幫佢做聯絡，好似舊年十月，佢搵咗陳惠敏、林國斌、盧惠光，仲有佢個仔張豪龍，去幫馬來西亞一間酒家剪綵，酬勞仲好好添！雖然呢次只係試金石，但因為反應好，陸續有人搵佢安排香港藝人登台剪綵，令佢更加覺得娛樂事業有得發圍。」知情者說。
雖然未幫娛樂公司改名，未正式開門做生意，但在馬來西亞住過一段時間的鬍鬚勇，識落唔少生意人，人際關係唔錯，故他打算將馬來西亞作為基地，並計劃拓展到香港及國內開分公司。
「因為唔想俾人睇死，所以勇哥今次開娛樂公司好積極，佢都有出面搵圈中人幫手，栢芝見老豆生性，都答應俾錢入股，不過，間公司未正式成立，勇哥唔想將件事傳出去，驚影響到栢芝！」知情者說。
雖然處於半息影狀態，不過老豆有難一定幫的栢芝，加上老公霆鋒明年約滿英皇，亦有意自組公司，相信在家做湊仔婆的她，唔做幕前，一樣有本事搵錢。
張栢芝與家人關係要好， 02年栢芝拍戲，鬍鬚勇亦陪伴左右；女兒演出受傷，鬍鬚勇與張豪龍更不斷進出醫院探望（左圖）。 

演藝世家
謝霆鋒與張栢芝皆出身演藝世家，兩家人多年來與娛樂圈息息相關。

謝賢
五十年代粵語片小生，與甄珍有過一段短暫婚姻，後與狄波拉相戀，誕下霆鋒、婷婷。近年四哥間中會拍劇拍廣告，並擔任澳門賭場貴賓廳公關。
 
狄波拉
76年憑電視劇《狂潮》走紅，與謝賢離婚後， 00年拉姑下嫁新加坡機師江耀城（綽號鬍鬚 Kong）。
 
謝婷婷
大學畢業後入行做 model，去年與王晶公司簽約成旗下藝人。
 
Shally Davies（栢芝媽）
栢芝媽現幫手打理男友有份投資的火鍋館，更在鋪頭親力親為，執枱執碗招呼客人。
 
戴碧芝
曾經拍過電影的戴碧芝，早年出嫁定居加拿大，並誕下一女。
 
張豪龍
曾演出《自從他來了》、《陰陽路十五》等電影，其後轉行開班教滑水，更於滑水比賽獲得唔少獎項。
 
張栢文
做過公關、拍過戲，但無份工做得長，近年在夜場做 DJ打碟，兩小時收 3萬人工，終於可以自己養自己。