話晒《Splinter Cell》好耐都未出過新作，所以本地代理都相當重視最新一集《Splinter Cell：Conviction》，早在3月中已經在地鐵站甚至巴士車身賣晒廣告做宣傳。今集主角Sam Fisher更學精咗，識得引敵手入局從後偷襲，仲可以匿在暗位發動一連串攻擊，單人匹馬潛入敵陣唔再難如登天！
在今集遊戲中，Sam Fisher只係單人匹馬出戰，原因係自從佢個女在上集《Double Agent》時意外身亡後，就愈來愈覺得成件事係一場陰謀，所以佢喺《Conviction》入面脫離咗所隸屬的第三梯隊，以一人之力調查事件真相。 Sam Fisher一向都好身手，爬牆、飛簷走壁樣樣皆精，但係就算潛入技術再好，都總有被敵人發現嘅時候，咁唔好彩畀敵人用電筒照中嘅話，就要第一時間匿入畫面上嘅黑暗位置，如果避得過嘅話，畫面就會變成黑白。呢招匿入暗位嘅招式仲可配合今集新增嘅動作系統「Last Known Position」使用，所謂「Last Known Position」就係當玩家臨匿入暗位時會留低殘影，敵人就會第一時間圍住呢個位置開火，只要識得把握當中嘅時間，就可預早繞到敵人身後伺機施襲。 雖然遊戲內可以跟敵人正面駁火，但始終敵眾我寡，靜靜雞潛入施襲先至係遊戲嘅精髓。今集另一新動作系統名為「Mark & Execute」，玩家可以先匿在暗位諗定一連串嘅進攻動作，例如解決敵人的先後次序及所使用嘅武器等，如果配合埋刁鑽嘅走位就真係事半功倍。 不過要發動「Mark & Execute」都有一定限制，好似不同武器嘅使用次數有限，又要考慮埋連擊期間會唔會引來更多敵人，所以要在短時間睇清楚當前形勢兼作出判斷，其實都幾困難。 今次遊戲嘅合作模式，改由美國特工Archer同俄羅斯特工Kestrel負責，兩人要合力搵番4枚俄製EMP彈頭；至於多人連線模式「Deniable Ops Missions」，就有4種唔同玩法及6張地圖畀大家揀，雖然最多只支援到4人同時對戰，但以《Splinter Cell》系列嚟講已算有突破，好在無論完成任何遊戲模式及任務都可儲積分，儲夠分就可升級裝備或購買制服同配件，提高耐玩度。 類型：動作冒險 開發：Ubisoft 平台：Xbox 360 推出：4月13日 售價：$359（普通版）$499（特別版）
放大圖片
特別版會送齊手辦模型、鎖匙扣電筒、服飾及武器下載卡。
放大圖片
匿入暗位 伺機突襲
Sam Fisher身手敏捷，爬水管潛入屋都係等閒事。
被敵人電筒照到會即時現身，要再等待機會才可進攻。
畫面會轉為黑白，提示用家已成功逃到黑暗位置匿埋。
事先計劃 發動連擊
角色動作做得相當仔細，像真度十足。
在雙人合作模式中，玩家們會分別扮演美國及俄羅斯特工，主要靠盔甲顏色來分辨。
想查出真相有時都要使用「適當」武力，更可因應身處環境而有唔同的「審問」方法。
二人合作 搵彈頭
機檔案
放大圖片
留言列表
