39歲的宣萱在無綫做足 20年，由花旦變中旦，有名有利，卻欠一個夫姓，不過她去年情陷老外獸醫男友 Ruan後，寂寞芳心隨即被燒得火燙，萬大事以拍拖為先，女強人頓變跟得女友。具備大女人和小女人雙重特質的宣萱，熱戀未夠半年已冧爆 Ruan，令男友開腔求婚，她也準備好做人妻，趕做幸福媽媽。 撰文：比華利
其他娛樂名人影片
無綫近年為谷劇集收視，起用中生中旦孭飛，播映中的劇集《掌上明珠》就是最佳例子，一數就有宣萱、商天娥、陶大宇、滕麗名和林保怡等。宣萱早於 90年初出道，隨即受無綫力捧，過去近 20年活躍幕前，由花旦升呢中旦，事業狂飆的她一直為事業往前衝，其間雖曾出現過多段燦爛的感情生活，可是情花最終仍未結果。已屆中女之年、 39歲的宣萱，有見同輩花旦蔡少芬、郭可盈和陳慧珊先後結婚，郭可盈和陳慧珊更升呢為母親，宣萱近年思想急轉彎，開始密謀結婚造人。她去年底展開一段新戀情，與貌似碧咸（ David Beckham）的外籍獸醫男友 Ruan撻着，她更選擇在舊愛羅嘉良再婚當天公開戀情贈興，因為她已認定 Ruan是最具潛質做老公的人選，所以她索性戀愛大過天，盡情享受二人世界。
男友已求婚
雖然宣萱近日要落力為有份主演的無綫新劇《掌上明珠》谷宣傳，但她也不會忽略男友，她日前接受本報記者訪問時說：「以前初出道，真係好鍾意演員呢個職業。」想當年，她全副精神放在事業上，拍劇日夜顛倒，同時賠了健康，先後多次進出醫院，卧病在床的日子令宣萱開竅，她說：「拍攝《尋秦記》時病咗入醫院，我當時同個天講，我乜都唔要，我只係要健康，就算有一億身家畀我都冇用，所以從嗰次開始，我提醒自己唔好只係掛住做嘢。」宣萱的右手腕有瘜肉，她日前到醫院進行小手術，現正康復中。隨着身邊好友被癌魔帶走，令她逐漸懂得在工作與作息時間取得平衡，她說：「我安排自己接劇唔再一套緊接一套咁密，接劇要求睇對手，盡量夏天唔開工，太熱真係頂唔順，尤其拍古裝。」隨着踏入高齡產婦之年，蜜運中的宣萱準備隨時出嫁，但不會奉子成婚，男友 Ruan拍拖未夠半年，已向她求過婚，她說：「佢有提過吓，我始終係女仔人家，呢方面我唔會主動行多步，應該男仔出聲。我好相信緣份係天注定，次次拍拖都想最後。我會話佢係最夾嗰個，我哋大家諗法一致，步伐都向住同一個方向。」
放大圖片 
宣萱和外籍男友 Ruan愛得如膠似漆，日前更漏夜陪男友到養和看醫生。 資料圖片
放大圖片 
宣萱近年為健康着想，拍劇重質不重量。
拒大排筵席 放大圖片 
戀愛大過天的宣萱，樂做跟得女友。
既然如此，相信距婚期不遠，宣萱暗示有意明年披嫁衣，她說：「結婚要隨緣，要係時候先會發生，希望大家 100% ready。」那對婚禮有甚麼憧憬？她說：「我嘅夢想婚禮最好簡簡單單，乜都唔搞，唔好大排筵席，我好鍾意吳彥祖同 Lisa S.嘅南非婚禮。」宣萱將男友和家人並列第一位，到底 Ruan有甚麼優點令女友狂加分？她說：「我哋有共同嗜好，佢有幽默感、心地好，對我爹哋媽咪都好，工作又認真，佢嘅諗法都同我好一致。」不過 Ruan的善良性格，竟同時成為最大缺點，她肉赤地說：「我嫌佢有時仁慈得滯，好多時都俾人利用，所以醜人都係等我嚟做。」為免男友被欺負，宣萱經常變身正義女友，她說：「適當時候就會由我出聲。」
睇好楊怡、胡定欣上位
無綫近年花旦氾濫，眾女爭崩頭上位， 99年已憑劇集《刑事偵緝檔案 IV》一嘗視后寶座的大師姐宣萱，可有留意哪個小師妹演技較標青，有望跑出做接班人？宣萱表示睇好楊怡和胡定欣。
「做戲好投入」 放大圖片 
新一輩花旦中，宣萱看好楊怡（左）和胡定欣。 資料圖片
楊怡去年憑《宮心計》奸妃姚金鈴一角奪得我最喜愛的電視女角色和最佳表現大獎，她的表現吸引宣萱注意，她說：「我平時好少睇電視，但早年同楊怡合作過《賭場風雲》，最近又睇過佢主演嘅《宮心計》，我覺得佢做戲好投入。」宣萱最近跟胡定欣合作新劇《刑警 2010》，她力讚這位後輩的工作態度，她說：「佢每次埋位都做好晒功課先嚟，我又睇過佢跳舞表演，佢 sexy又得，形象多變。」場地提供： La Brasserie of Gateway Hotel髮型： Bluedy Wong of Hair Culture服裝： Ted Baker 
宣萱把男友放在第一位，但同時不會忽略家人，每周必陪雙親打麻雀，幾乎每次都鬆章進貢。 攝影：陳志嵐
留言列表
