以後冇得同班靚女一齊煮餸囉！（設計對白）（《忽然1周》圖片）
香港人一直講求男女老嫩要平等，可惜作為全港最大電視台的無綫，卻帶頭年齡歧視！○六年擔任《美女廚房》評判走紅的名廚周中，近年成為遊戲節目常客，更擁有個人的飲食節目。但好景不常，年過七十的他最近成為無綫棄將，周中在收費台主持的《星級廚房》亦「關門大吉」，全因一個字，「老」！
拒簽藝員約
早已退休的星級名廚周中，自從做過《美女廚房》評判後，因為說話夠抵死啜核，加上一雙似足卡通片《蠟筆小新》的烏黑濃眉，成功展開事業第二春。當年獨具慧眼發掘周中加入《廚房》的監製錢國偉，還在收費台安排他主持《星級廚房》教煮餸，閒時亮相綜藝節目做嘉賓，曝光率相當高。「嗰陣無綫搵過師傅簽約做藝員，但我哋勸佢唔好，一把年紀，又唔係等錢開飯，簽咗就乜嘢都要做，師傅志在玩啫，所以最後決定唔簽。」周中身邊人透露。
不過，自從「伯樂」錢國偉離開無綫，接任的監製不久後又離職，周中寵兒地位開始不再。據知，有無綫節目部高層在監製大會上，對周師傅主持的節目諸多不滿，「嗰個高層嫌周中師傅年紀老，雖然佢煮餸有料到，講嘢又鬼馬抵死，但『老』係最大問題，高層開會講明要換人。」知情人說。
帶挈師傅搵銀
據知，無綫已換上同樣靠《美女廚房》出位，但年輕貌美的「美女廚師」Kit（麥潔兒）頂替周中。
「師傅做主持雖然只係玩票性質，但呢排少咗出鏡，多少影響佢出面接events嘅次數；個心當然有少少唔舒服。」知情人說。的而且確，周師傅近年豬籠入水，不但年年推出烹飪食譜，還不時帶旅行團出外飲飲食食，日後曝光率減少，搵錢機會自然同樣大減！
對於被無綫棄用，周中大方承認：「係呀！個節目換監製吖嘛！冇所謂喇，騷錢又唔係多，我哋呢啲退休人士，玩吓啫，而且都拍咗成千集，煮咗幾千款餸，夠晒皮囉！」
上位靠「食」力
飲食節目一向受一家大細歡迎，尤其多師奶捧場客，但係由藝人講飲講食始終感覺唔夠專業，所以近年會安排飲食界人士助陣，因而造就出唔少星級名廚名食家。
黃永幟（熾哥）
年輕時入行僅3年便成為星級食府最年輕大廚，入廚經驗超過20年，05年夥拍黃麗梅於亞視主持《覓食新煮意》、《鮮入為煮》等飲食節目，贏得不俗口碑。直到09年轉到無綫主持《熾哥熾教》及《為食總司令》，知名度進一步提升。
余健志（Jacky Yu）
廣告界出身，00年轉戰飲食圈開設私房菜「囍宴」，以新派fusion菜為賣點，得到不少名人食家青睞，因此被電視台睇中，邀請他夥拍黃德如擔任《近廚得食》主持，令他人氣大增，近年「囍宴」分店更成功打入新加坡市場。
梁文韜（韜韜）
19歲學廚，現為元朗大榮華董事總經理。主持飲食節目《日日有食神》大受歡迎，觀眾大讚他食嘢時表情夠滋味，令人睇見都想食，肥嘟嘟身形令其食神形象更深入民心。
做《美女廚房》評判時，周中經常有靚女投懷送抱爭取分數，其中以Amanda表現最勇。（《蘋果日報》圖片）
身為張太的蔡少芬，一展實力煮番茄炒蛋，並請周師傅評價。（《蘋果日報》圖片）
《美女廚房》不但捧出一班「味之天使」，還有這位外形古怪，說話鬼馬的周中師傅。
周師傅近年出書又帶團，豬籠入水，少了無綫一份工又何妨。
周師傅最鍾意指點靚女煮餸，當日林莉參加比賽，周師傅還扮鬼扮馬，走到旁邊教煮餸。
阿Kit主攻西式烹調，當日亦有份做《美女廚房》評判，跟年紀相若的鄭中基、方力申打成一片。（《FACE》圖片）
留言列表
