Lara Croft and the Guardian of Light 搶鏡羅拉行孖必尋寶－明星靚相大分享☆

點解今集唔再掛上《Tomb Raider》嘜頭？原因係遊戲開發小組想突破以往框框，所以直接用上「盜墓者羅拉」Lara Croft個名。除此之外，連遊戲視點、玩法同埋發售方式都改埋，無論係今個星期三推出嘅Xbox LIVE Arcade版，或再遲多個幾月出嘅PSN版，都會改為數碼下載，唔使出門口都可以同Lara四圍冒險！

雖然今集唔再用《Tomb Raider》個名，但內容其實都離唔開盜墓同尋寶，遊戲背景設定在中美洲嘅叢林廢墟，講述Lara捲入一場魔鏡的爭奪戰中，仲唔覺意喚醒咗2,000年前嘅邪靈同大魔王，而原本保護Temple of Light嘅戰士Totec，亦因為咁而復活，仲由最初怪Lara攪亂檔，變成最後二人合作闖難關。

解謎成分跟以往一樣咁重，兩人分頭行事，事半功倍。

採用新45°俯視視點進行，感覺同以往《Tomb Raider》好唔同。

喺Lara跟Totec嘅冒險旅途中，想搶魔鏡嘅邪靈一直虎視眈眈。

提供支援同掩護

遊戲分為單人同雙人模式，單人模式仍舊只可揀選Lara冒險，想特別啲就可以改玩雙人模式，一個玩家扮Lara，另一個就做Totec。不過最初Totec只能使用長矛同盾牌做武器，攻擊同防守力一般，好在玩玩吓會學識用槍，為Lara提供足夠嘅支援同掩護。為配合新增嘅雙人模式，遊戲內有唔少機關同難題都要二人合作先能完成，例如Lara想企高的話，Totec就要將盾牌放在頭頂畀Lara踩上去；而Totec越過深谷時，又要靠Lara拋出繩索，然後再踩鋼線咁行過去，仲要鬥快搶分搵寶物，先可以開啟到封鎖的物件。

初期Totec只識得用矛同盾，火力一般，遠距離戰鬥靠晒Lara。

Lara可以使用繩索飛簷走壁，而Totec唯有企定定得個睇字。

連恐龍都出埋？今集都玩得幾大喎。

45度視點更易睇

遊戲另一項新設計係一改以往《Tomb Raider》嘅3D動作玩法，換上45度俯視嘅固定視點，呢個改動好唔好就見仁見智，不過新手就更易上手，而且雙人合作時亦更方便，外國有評論仲話呢個設計令人諗起《Diablo》添。此外遊戲畫面亦處理得唔錯，用上《Tomb Raider：Underworld》嘅遊戲引擎，動作表現同場景設計都做得有板有眼，中美洲叢林、遺迹同地底世界的場景都幾有睇頭。今集仲改以數碼下載方式發售，好似三日後推出嘅Xbox LIVE Arcade版，就可在Xbox LIVE上下載，大約只係一百多元，趁暑假Download嚟玩都唔錯。