在城市大學就讀的應屆港姐亞軍張秀文，原本尚有一年便畢業，當選後決定休學一年，履行港姐任務；日前她已回校辦理休學手續，今年全身投入工作，瞓身搵銀，改善家庭環境。
暫時停學一年
居於馬鞍山公屋的張秀文（Sammi），因為家庭環境麻麻，平日要做兼職模特兒、售貨員、補習老師幫補家計；預科畢業之後，雖然成績足以讀香港大學，結果因為負擔不起交通費，轉而入讀距離較近的城大工商管理學系，一邊工作一邊讀書。
當選港姐亞軍後，Sammi本亦不打算休學，「佢諗住繼續返學，因為一向都係半工讀，不過後來有個前輩同佢講，做港姐成日有活動，偶然又要出埠做親善訪問，肯定會影響讀書，所以勸佢休學一年，做埋今年港姐先算。」Sammi朋友說。
日前Sammi返城大辦理休學手續，暫別校園生涯；原本升讀大三的她，打算完成未來港姐任務後，便重返校園。「Sammi本身好鍾意讀書，當初咁辛苦先入到大學，唔會話放棄就放棄，佢話一定會讀完呢個大學課程，攞番個學位。」
靠津貼幫補
獲選港姐除了出席贊助商活動，無綫亦會為她們接洽工作，「Sammi冇得再做兼職，不過無綫方面有車馬費同服裝津貼幫補，加上做活動都有收入，佢最想趁今年唔使返學，搵多啲錢幫吓屋企。」雖然Sammi出身公屋家庭，但跟一班富貴落選港姐一樣做到朋友，尤其K號李文瑄和N號的李俍嬿，大家不時有聚會見面。
早兩個禮拜（八月十一日），多位落選港姐應邀上《獎門人》，港姐三甲陳庭欣、莊思明和Sammi便約埋李文瑄等人到現場打氣，之後更兵分兩路繼續下場，Sammi和李俍嬿、何樂翩等去打邊爐，其他人則約港男兵團唱K。「佢哋相處得唔錯，因為有時都好難約到咁齊人，咪趁機聚一聚囉。」
中途轉軚
靚女出路多，令近年港姐質素普遍低水，搵個嘩一聲睇吓都冇，超班索女唔慣鬥靚做跳板，反而唔少「U女」就趁後生搏一搏，攞到獎，停學入行，經常有！
馬賽
憑《女王辦公室》君女一角火速上位，成為宅男純情女神，08年透過優才計劃從內地來港，於浸會大學修讀電影電視系。當選季軍後，向大學申請休學一年以履行港姐任務，並將其學生簽證轉成工作簽證。現時馬賽在不影響工作的情況下，以兼讀形式修讀餘下學分，完成學位。
何傲兒
07年參選、得過旅遊大使獎，本於香港大學專業進修學院（HKU SPACE）攻讀法律課程。雖然參選時表示會繼續升學，但卻傳出因與講師高Sir關係密切，令她順利升讀2年班，最終何傲兒轉軚休學，並修讀無綫藝訓班。
李詩韻
03年由多倫多返港參選港姐，向多倫多大學申請休學留娛圈發展。事隔6年，李母一直催促女兒完成商科課程。去年9月與鄧健泓分手後，李詩韻向無綫請假返加國繼續學業，並於去年年尾畢業回港繼續拍劇。
當選亞軍後，雖然不可再像以前做多份兼職搵銀，但Sammi可以經無綫接洽工作，孭住港姐亞軍銜頭，叫價自然高一些。
原本在城大升讀最後一年大學課程的Sammi，日前專程返回九龍塘的大學校舍，辦理休學手續，並打算完成港姐任務，才重返校園。
私交甚篤的張秀文和馬賽，同是熱愛求學，據知馬賽最近重返浸大，以兼讀形式繼續學業。
李俍嬿、彭慧中等落選港姐早前上《獎門人》，陳庭欣（中排右二）、莊思明（中排左一）和張秀文（後排右一）到現場打氣。
錄完節目，張秀文、何樂翩（右）和李俍嬿（左）約埋一齊打邊爐。
成功奪得港姐后冠的三甲陳庭欣、張秀文、莊思明和最上鏡小姐李文瑄，當選後便要履行一年港姐任務。
留言列表
