呢排講起Smartphone，唔係iPhone 4就係Android手機，小記寫都寫到悶，相反Symbian系統就愈來愈少人提，唔通Nokia放棄智能手機市場？非也，其實老大哥一直靜雞雞研發全新智能系統Symbian^3，首部搭載嘅手機N8更有齊1,200萬像素鏡頭、720p高清錄影、HDMI及Dolby 5.1環繞音效，影音功能勁過iPhone 4多多聲。N8預計9月中就到港，尋日官方搞咗個傳媒試玩會，就等小記帶大家睇吓呢部機王有幾勁！
美國Smartphone市場佔有率排名於今年第2季重新執位，Android第一、黑莓（Blackberry）隨後，排第三則係iOS。雖然以全球計，Nokia仍穩坐智能手機一哥位置，但此消彼長下，優勢已明顯收窄，故此無論官方或擁躉，也視N8為省招牌的重點大作。 好多人買iPhone 4都係貪有型，Nokia N8呢方面一啲都唔輸蝕，雖然仍是採用N記最傳統嘅直板機身，但外框就採用磨沙鋁金屬，並提供銀、黑、綠、橙、藍多色選擇，比非黑即白的iPhone搶眼得多，而最重要係機背微微彎曲，使用時更貼手。屏幕只有3.5吋，以Smartphone來說唔算大，但就採用了AMOLED背板，顏色比TFT芒亮麗鮮艷，當然佢亦支援Multi-Touch，雙指開合就能縮放相片。惟留意iPhone畀人插爆嘅一體成形設計，佢竟然學足，即係話冇得自行換電，SIM卡又要從機側插入，官方謂這樣做能夠把厚度偷薄至13.3mm，可謂有辣有唔辣！ iPhone 4鏡頭提升到500萬像素大家已拍手叫好，但相比起N8簡直小巫見大巫，事關佢像素高達1,200萬，為目前N記手機中最高，並採用Carl Zeiss鏡頭，支援28mm廣角、f/2.8光圈及自動對焦，配合Xenon閃光燈，唔好話Snapshot，DC仔都要行埋一邊。另外，N8可錄影每秒25格720p HD畫質短片，拍完後仲可以用影片編輯器作簡單剪接，唔使另外裝App咁麻煩；小記更建議睇片時用埋機頂個HDMI介面輸出，不單影像更清晰，仲可以聽埋Dolby Digital 5.1聲道音效，聲畫都有絕佳享受。 Nokia係Symbian掌門人，自然對系統不離不棄，N8另一賣點就係內置全新的Symbian^3作業系統。齋睇介面，跟目前S60 5.0很相似，首頁都有個「六嚿腹肌」的Widget列，但桌面總數就加至3頁，並且每版可使用不同桌布，向橫一撥就迅速變臉。新系統亦改善了播歌介面，資料更詳盡之餘，橫置機身時唱片封套仲會變成類似Cover Flow的Flick Scroll形式，揀歌更方便。至於程式兼容問題，官方話舊有嘅S60 5.0程式一般都支援到，手機亦細心地預載了大量網絡電視Widget，按個掣就睇到ontv同其他Flash短片。 制 式︰ GSM四頻、WCDMA 用戶介面︰ Symbian^ 3 屏 幕︰ 3.5吋nHD AMOLED，640×360解像度 鏡 頭︰ 1,200萬像素Carl Zeiss 記 憶 體︰ 內置16GB、支援microSDHC記憶卡（最高32GB） 對外連接︰ 藍芽3.0、Micro-USB 2.0、Wi-Fi、10.2Mbps HSDPA 通話時間︰ 12小時（2G）、5小時50分鐘（3G） 備用時間︰ 390小時（2G）、400小時（3G） 體 積︰ 113.5×59×13.3mm 重 量︰ 135g 查詢：2136 6338
由於內置了Flash Lite播放器，所以可直讀ontv的新聞短片。手機還預載了CNN及National Geographic等網絡電視的Widget。
提供簡單的剪片功能，可剪接、加入字幕、聲效及過場效果，功能唔差過《iMovie》。
貼手微曲機背
跟機送HDMI轉接線，一駁就可把機內短片輸出至大電視。試播《Tron》720p預告片，流暢唔窒之餘仲有5.1聲效，媲美家庭影院。
放大圖片
機面只有一個Menu掣，按一下進入功能清單，長按則進入Multi-tasking頁面。
聲畫絕佳享受
採用一體化設計，SIM卡及microSD槽被移至機側，此設計為Nokia手機中首見。
配備1,200萬像素蔡司鏡頭，並繼N82後再用Xenon閃燈，Nokia手機中影相佢至叻！
機身雖偷薄到13.3mm，薄過直立兩毫子，但以直身機來說又未算薄。
N8還支援USB On the go技術，只要駁上附送的USB接線，手機便能直讀外置硬碟上的資料。
全新智能系統
機檔案
9月中首賣時會先推出銀、黑、綠三色，稍後再追加藍同橙。
留言列表
