明星 iPad 星戰－明星靚相大分享☆

「呢度有冇得賣 iPad 4？」全城瘋了，大家已不理會 iPad、 iPhone 4、 iPod、 iTunes的分別，總之有個 i字，便急不及待到櫃位付賬。自命潮人的明星們，更是機不離手，當然他們玩 iPad自有原因：陳法拉隨時 check email怕薛公子急 call；張敬軒心血來潮記低樂譜； Juno秒秒鐘傾生意幾廿萬上落；還是官恩娜最好，貪 iPad夠環保。撰文：王崇穎、李珮洳、王連連

本報記者日前訪問買了 iPad的潮星，解答以下四條問題：Q1： iPad最常用來做甚麼？Q2：覺得 iPad有甚麼缺點？Q3：用甚麼款式 wallpaper及保護套？Q4：有沒有 iPhone 4？

陳法拉方便 Check Email

A1：我主要貪佢畫面夠大，因為我成日都 check email，而且打字比較方便。A2：睇唔到片，如果可以有睇片功能就更加好。A3：我都係用原裝風景相，而且自己又冇時間搞。A4：都有用。

官恩娜睇雜誌環保放大圖片

A1：我平時會用 iPad上網買時裝雜誌，同埋鍾意上 YouTube睇片，因為網上買雜誌唔使堆到成屋都係書，環保好多。A2：我覺得 iPad唯一缺點就係有啲音效檔播唔到，唔係個個 file都得，變咗有時聽歌睇片唔係咁方便。A3：我呢張 wallpaper就係一張劇照，係我彈緊結他；個套就係原裝套。A4：我暫時唔會轉用 iPhone 4，因為仲有合約，同埋都覺得未有需要轉。

黎耀祥睇報紙寫 Blog 放大圖片

A1：主要 check email，同埋可以上網睇報紙，而且我都會成日上網寫 blog。A2：我又唔覺有乜問題，因為我本身對電子產品冇乜要求。A3：部機主要都係我太太用，佢放我張相做 wallpaper，我地恩愛嘢係咁 o架啦，唔恨得咁多。A4：都有買。

張敬軒隨時寫新歌放大圖片

A1：我當咗佢係輕便版電腦，用嚟上網寫嘢多。有個寫樂譜嘅 Apps，咁我可以用嚟寫吓歌，靈感到又可以即時記低。A2：我 facebook有玩餐廳遊戲，最衰 iPad冇 Flash功能，搞到我唔可以用 iPad玩遊戲。等到返屋企先玩到，我煮緊嘅嘢食整燶晒喇！A3：我除咗有個原廠套之外，仲買咗兩、三款，包括白色鱷魚皮套。A4：本身我係 Apple迷，所以佢出 iPhone 4我都有買。

關心妍最愛睇 MV 放大圖片

A1：我平時最鍾意用 iPad上網睇 MV，或者係上網睇報紙雜誌。A2：我到現時都唔覺 iPad有乜唔好嘅地方。A3：我個 iPad套係一個白色皮套， wallpaper係一隻卡通兔仔，因為我好鍾意兔仔。A4：我暫時未諗過要出 iPhone 4，本身我部 3GS都仲用得，唔想花錢買新電話。

林二汶嘆冇 USB頭放大圖片

A1：我成日都會拎住部 iPad打機，最鍾意係玩 Angry Birds同 We Rule。A2：至於 iPad嘅唯一唔好處就係冇 USB頭，如果有嘅話就 100分啦！A3：個套就係一個纖薄嘅黑色套， wallpaper就係我同 Ellen做騷嘅相。A4：我都好想出 iPhone 4，希望阿哥送畀我做生日禮物。

Juno大芒傾生意放大圖片

A1：通常用嚟睇新聞同 check email，我同其他公司品牌用 email聯絡，會有好多圖，佢個芒夠大，咁樣我 check email時可以睇圖睇得清楚啲。A2：最可惜係冇 multi tasking（多作業處理），如果有呢啲 function就好喇，做嘢會更方便。A3：本身我好鍾意木紋嘅嘢，所以我部 iPad同電話個套都係木紋。A4：買咗 iPad之後先換 iPhone 4。

MC Jin打機好好玩放大圖片

A1：我部 iPad係朋友送嘅，我平時多數用嚟玩 game，因為有多個 game都好好玩，消磨時間一流呀！A2：我覺得 iPad暫時都冇乜缺點，幾好用，幾方便吖。A3：朋友送畀我時連埋個原裝套，個 wallpaper就係一開機嘅畫面。A4：冇打算出 iPhone 4，因為我本身唔係咁鍾意 touch screen嘅電話。

關楚耀睇波追劇集放大圖片

A1：經常出咗街做嘢，睇錄影唔暢快，所以我最常用嚟睇外國電視節目，好多時我會睇足球直播，同埋其他運動比賽，間中都會追吓劇集。A2：其實對我嚟講佢嘅 function都已經夠用，大致上都完美，但最衰佢哋成日出咗一排又有新款，追唔切。A3：我係用皮套，咁樣襯埋 iPad會靚仔啲。A4：家我部 3GS都好夠用，所以冇諗住換 iPhone 4。

田蕊妮儲相兼念佛放大圖片

A1：主要用嚟儲相，唔使吓吓開電腦，同埋可用嚟 check email。A2：我暫時未發覺到，因為我都係普通咁用。A3：用佛祖做 wallpaper，我覺得佛祖個樣好慈祥和善，所以成日都想望住。A4：有。

陸永嫌冇得打繁體放大圖片

A1：家最常用係 check email，有時我要交歌畀人，有乜可以喺 iPad即刻寫低。家變得責任感大咗，以前有藉口可以遲啲交，家人哋知我有 iPad，冇得太遲交喇！A2：最衰係冇得打繁體字，快啲畀我打到啦，家只得簡體字，同埋得手寫唔係太方便囉！A3：我冇用套，家咁樣都 OK，手感幾好。其實佢個面同個底都有保護功能，唔會咁易花。A4：有，我三個月內變咗科技人，之前我仲係用緊十年前出產嘅型號手機，家一次過轉晒！

Donald即時改劇本

A1：呢排用得最多係排劇，最近我幫緊張繼聰個劇做嘢，所以用 iPad嚟排劇好方面。啲劇本可以即時改，仲可以用嚟 highlight，咁樣就唔使拎住厚厚嘅劇本，又環保唔使用咁多紙。A2：到現時為止，打唔到繁體中文字係最麻煩囉！其他都 OK，我家學緊打簡體字。A3：用緊原裝嗰個套，佢有得架起部機，而且個原裝唔會咁易刮花，所以已經唔使買其他套，夠晒實用。A4：買 iPad之前已經換咗 iPhone 4，我之前用嘅 3GS，就畀咗屋企人用。

放大圖片
資料圖片