滾熱辣
爭產後遺 二房補飛 超瓊夾超儀冧賭王
中秋節是一家人慶團圓的日子。今年 92歲的賭王，一如以往輪住到各房做節。其實自前年爭產事件後，二房與賭王關係大不如前，近年四太更乘機攝位得寵。
不過，今年二房與賭王關係開始有轉機，更搶得中秋節正日與賭王一同慶祝。上周四（ 19日），記者就拍得賭王與何超瓊及超儀等二房家族成員，先後現身位於渣甸山的二房大宅。今次二房再次攞番個靚位，完全歸功於細女何超儀。
超儀個性一向我行我素，但據知為了修補與老竇關係，超瓊不斷背後發功，局超儀做說客，令細妹慘成磨心。近日因為做節，兩姊妹更起爭拗。求證超儀，她無奈說：「我一向逆來順受！」
賭王四房各太太及兒女不時戮力爭取與賭王見面，搞到今年 92歲的他變成人球，經常穿梭於各房大宅。《蘋果日報》圖片
多年來，二房在何家一直佔主導地位，可惜 11年，何家爆發爭產風波，對賭王與二房的關係產生極大的衝擊。當年賭王希望攞番將已轉讓俾二房的澳娛股份，但二房長女何超瓊不肯讓步，最終辣㷫賭王，入稟高院禁制超瓊處置股權，更聲言對超瓊十分失望。
轟動一時的爭產風波持續多個月後結束，四房表面和解，但賭王和超瓊兩父女難免心存芥蒂。爭產風波後的中秋節正日，由三房及四房輪住攝位與賭王慶祝。
姊妹電話開火
不過今年中秋節，二房卻扭轉劣勢，重奪正日做節，原來多得超儀從中斡旋。知情人士說：「賭王同超瓊嘅關係，呢兩年真係麻麻，兩父女已經好少嘢傾。超瓊為修補同老竇關係，已一早叫定細妹超儀冧老竇，話保證今年正日做節係最人齊！因為之前超儀冇參與爭產，加上賭王對佢最近拍嗰套新戲《豪情 2》好讚賞，仲同超儀講叫佢拍多啲呢類題材嘅電影，所以兩父女多咗好多話題。賭王亦心軟，今年恢復同二房正日慶祝。」
其實個性一向我行我素的超儀，曾因為今年做節，與家姐超瓊鬧得甚不快。知情人士說︰「有日聽到超儀好忟憎對住電話另一方講︰『點解一家人食餐飯要咁勞師動眾，又話孝順應該係擺喺個心度，依家好似交功課咁』，佢仲話唔想再做小丑𠱁爹哋！」
二房正日做節
超儀黑面
中秋節正日下午，賭王乘坐七人車由三房抵達二房大宅。超儀乘坐七人車搶先到達，但她心情麻麻。
陳子聰當晚與老婆超儀分開抵達大宅，記者發現陳當時面紅紅，更向鏡頭藐嘴。
超瓊耷頭
四太終極贏家
雖然點燈二房，但記者連日來發現賭王於中秋節前夕及追月當日，都陪實四太。單計時間贏晒！
全身包冚
上周三（ 18日）下午 4時多，賭王由工人傍實離開四房大宅，身穿樽領冷衫、風褸加冷手襪的他，精神似乎唔錯。
黐實傾偈
賭王上車期間，四太全程在旁指揮，更雞啄唔斷與他對話，講足十多分鐘才讓賭王離開。之後才出發往三太大宅。
花園迎接
賭王正日陪完二房，上周五（ 20日）便折返四房。當日下午 3時，四太與大仔猷亨相繼返回大宅，二人於花園密斟，做足準備迎接賭王到達。
食飯過夜
四太與大仔猷亨返家才十多分鐘，賭王便由看護傍住到達，坐住輪椅由看護推入大宅，直至凌晨時分亦未見賭王離開。
嬲爆爆做節
雖然超儀個性耿直，但最終都妥協就範，於正日返二太家做節。上周四（ 19日）傍晚，賭王的車於黃昏時分已到了二太渣甸山大宅，而超儀與超瓊則各自各乘車到達。記者發現，坐在七人車內的超儀樣子嬲爆爆，明顯心情麻麻。
超儀谷住道氣，皆因她多年來被超瓊和母親藍瓊纓管束嚴厲，經常忍氣吞聲。知情人士說︰「超儀每次返二太屋企都要俾人訓話，嫌佢唔識講威水史𠱁老竇，好似佢今年套喪屍片《 Open Grave》，係繼《維多利亞壹號》令佢再次入選角逐西班牙電影節『最佳女主角』。有人話要佢講多啲威水史冧賭王，但超儀就好反感，佢唔想喺老竇面前吹噓。不過有人依然日哦夜哦，搞到超儀好冇癮，寧願少啲返二太度食飯。」
超瓊為穩定自己地位，費事再刺激賭王。據知她和俞琤來往一事，從來冇在賭王面前提起半句。《壹週刊》圖片 
何超儀去年跟鞏俐經理人公司 ICM簽約，旋即被欽點喺喪屍恐怖片《 Open Grave》做啞女。更獲提名角逐西班牙影后。雖然未知能否摘后，但超儀早前亦興奮說：「有提名已當贏！」
無奈逆來順受
其實一向愛看笑片的賭王，對愛女超儀自組製作公司開戲大表支持。知情人士說：「賭王話娛樂事業都係一盤生意。之前超儀攞咗個西班牙影后，賭王都鼓勵拍啲有 noise嘅戲，佢都覺得好有面。」
就與家姐超瓊因做節起拗撬，記者致電超儀求證，她無奈說：「一向以嚟都冇拗撬，家姐一向最多主意，我只係逆來順受嗰個。做細嘅，都係遷就屋企人，最緊要大家開心！（係咪唔想正日做節？）你影到邊日咪邊日囉。（賭王支持你拍《豪情 2》？）係！佢好鍾意個題材，我做咩佢都支持！」
豪門恩怨，一家人就算幾唔啱，都係私下拆掂佢，槍口對外，更何況對手仲係四太，二房當然要局住上下一心。
阿媽冇影
何家二房四姊妹向來感情深厚。 2010年，超儀自資的《維多利亞壹號》舉行首映，超瓊當時亦帶埋超鳳和超蕸撐場，但多年來卻未見過二太出席超儀的電影宣傳活動。
首奪西班牙影后
超儀憑《維》片獲提名金像獎影后，更令她奪西班牙 Sitges電影節影后，演技備受肯定。但原來賭王對此片有意見，除嫌場面血腥外，亦唔鍾意戲中有諷刺地產商抬高樓價的情節。
趙啷啷響朵
04年，超儀憑《豪情》北姑趙啷啷一角贏得金像獎「最佳女配角」，十年後，超儀再搵人寫劇本開拍《豪情 2》，大玩日本色情夜生活。
反叛千金
「何家淑女」向來新聞多多，除了三、四房女兒的戀事七國咁亂，二房細女何超儀的行為亦夠晒娛樂性。鍾意拍戲玩音樂的她，一向我行我素，多年來都咁激，出位過唔少藝人。
豪情噴酒
09年 5月，她出席網站兩周年 party，於台上又唱又跳。邊唱邊隊啤酒的她，突然 high到不得了，向上狂噴啤酒。
撩龍心拍戲
自資開獨立電影製作公司的她，去年尾有意搵行為騎呢的龍心（林克霖）拍戲。其間超儀被對方拍下多條片段放上網，包括她被撩「上牀」片段，之後超儀上載假陽具相反擊，揚言：「切咗你！」
留言列表
