約朋友上網一齊打足球Game，通常都係「一打一」或「二打二」，但有無諗過依家竟然可以做到「十一對十一」？新推出嘅《FIFA 11》就突破上集嘅限制，畀玩家做埋守門員，除咗可以成家人齊齊玩之外，仲可以自創球員落場踢，屋企人個個都變成球星。
始終呢個扮演守門員嘅玩法係由《FIFA》系列首創，所以今次EA Sports簽埋車仔門將施治做代言人，遊戲入面仲會戴住招牌頭套上場添，而且遊戲系統已依照《World Cup》版作出改良，譬如射12碼時可以窒步再射，但今集再加料，有埋扮演球員、球員經理人同球隊領隊嘅職業模式，設計相當完善。 响遊戲入面做龍門會唔會好悶？咁就要睇吓班隊友爭唔爭氣啦！筆者試玩過「Be a Pro：Goalkeeper」育成模式扮演曼聯嘅雲達沙，結果變成觀眾，成場波一球都未撲過，要成日將畫面Zoom到比賽區域睇波解悶。不過一般嚟講，作為一位守門員要在對方開角球時成功打出手槌解圍的話，玩家除咗要預早封位外，仲要喺千鈞一髮時按掣撲波。講就容易，但正式落場就一定會手忙腳亂，好在《FIFA 11》都預備咗全輔助以及半輔助模式畀大家揀，可以交由電腦AI幫你去瓦解攻勢。 《FIFA》系列一向都賣真實球員、真實球衣同真實聯賽等設計，《FIFA 11》就再加入「Personality +」系統，令球員嘅球值、能力同踢波風格更為真實。EA Sports透過龐大嘅資料搜集系統，設計出36種屬性同57種特徵去為球員分級，除咗以前嘅射波、速度等屬性外，仲反映出每個球員嘅踢波風格，好似朗尼在場中走動會較多，然後拉開同防守球員嘅距離搵位射門，相反貝碧托夫就踢得較Hea。「Personality +」系統亦會應用到守門員身上，例如施治嘅把關技術就比較平實，唔會好似筆者守龍時成日走出禁區助攻咁玩嘢。 今次《FIFA 11》仲提供埋應用程式幫玩家創造同管理原創球員。玩家只需到官網下載程式，再由外貌開始選擇唔同嘅配搭和屬性，就能打造原創球員，既可擺落單人模式入面使用，亦可借埋畀朋友用，有心機嘅話，仲可以將每個屋企人變成原創球員，一齊落場鬥波。除自創球員外，《FIFA 11》亦可以畀大家設計主場嘅歡呼聲同奏樂，打造自己心目中嘅足球場。 類 型：運動 開 發：EA Sports 平 台：Xbox 360、PS3 推出日期：9月28日 售 價：$329（Xbox 360）、$380（PS3） 查詢：3166 6001
《FIFA 11》嘅遊戲設定跟之前嘅《World Cup》版幾相似。
巴塞對阿仙奴邊隊會贏？真係要打過先知。
AI協助撲波守龍
卡卡嘅獨特傳球，在新「Personality+」系統下將能完美重現。
《FIFA 11》賣點仍然係收錄咗大量真實球隊同球員，臨場氣氛一流。
今集可以上埋官網下載專用程式創造同管理原創球員同球隊，仲可以同朋友分享。
做龍門時好睇走位同按掣時間，尤其對住如杜奧巴嘅近距離勁射，就更加難救。
重現球星踢波風格
自創球員落場踢
遊 戲 檔 案
留言列表
