小時候，我們上作文課時都寫過「我的志願」。

蘇施黃當年的志願，是當警察，除暴安良。然而長大後，才發覺這個願望不可能達成，「原來我係唔認得人o架！」阿蘇一臉認真說。

蘇施黃

個案一：「當年做電台DJ，有日在停車場見到一架好靚的積架跑車，車內個靚女校低車窗向住我：

『喂！』我看着她，真係唔鬼識佢喎。然後她說：『你有冇搞錯呀，昨日才在我屋企打了十四圈麻雀！』我望真啲，連忙耍冧：『唔好意思呀美人（鄺美雲），昨日你着牛仔褲又沒化妝，今日咁靚，點認得你吖？』」

個案二：「有年張國榮生日，擺了四圍壽宴。食食吓飯，我問坐我隔籬的阿嫂：『隔籬枱那女人，我們認識嗎？』

阿嫂答：『阿蘇呀，不止我們識，全香港人都識，她是陳寶珠呀！』」

「認人」失敗，阿蘇不得不放棄夢想，由警察變了食家。

唯一值得慶幸是，朋友，阿蘇或許會掛一漏萬；愛人，她卻一定不會忘記。

早前，她就公開承諾，會照顧金燕玲下半生。

這天，她延續愛的承諾，聲言要令對方每天也開心，至死不渝。

「當日我追求她時，承諾要令她每日都開心，所以我要make sure日日都去問她開不開心，而這（令她開心）是我覺得我直至死那天，都絕對做得到的。」

明日天地，哪怕漫天黃葉遠飛，兩鬢變得斑白，她仍會認得，長街燈影下那張微黃的臉，及那個未完的約定。

買股票 不如賭大細

阿蘇一生最難堪，是○五年收到哥哥送來的三十萬支票。「我拿着張支票，好難過。五十歲人，以為自己好掂，原來屋企人仍覺得我唔掂。」自此發誓要「好好做人」。○九年，她一年內賺了一千一百萬。今年，她的目標是十年搵二億。

為了宣傳《我要賺兩億》的第二輪講座，蘇施黃這天連做三個訪問。下午三時，她才有空叫了個高級餐廳的雞王飯外賣，但卻邊食邊鬧：「呢個飯一百七十蚊呀大佬，難食到死！渣到咁！」不失惡人本色。

做了多年食家，阿蘇從不吝嗇於「彈」人。五十五歲了，對於衣食住行，她向來有一套自己的標準。

「工作咁辛苦，我唔會刻薄自己。早排拍飲食節目到八點幾，成身都臭，我第一件事返屋企由頭洗到落腳，然後叫按摩上門按兩、三個鐘，再食個廿幾頭的鮑魚送公仔麵，幾過癮呀，起碼叫獎勵吓自己。」

人生走了一半，她從不作沒把握的投資。買樓買股，她認為是人對自己最大的懲罰，故寧願月花八萬，租住中半山玫瑰新村。連埋兩個工人一個司機兩名助手，聲言每年花費三百多萬。

「我現在住那層樓，市值四千萬左右，當我畀千二萬首期，都仲要供二千八百萬，除二十年，每月點止供八萬呀？我住得落的樓，又買唔起；買得起的樓，又唔想住。租咪最解決到問題囉！預備生仔女就話要留番層樓畀仔女，我唔使留嘢畀人嘛。

「買股票呀？我又唔識研究，靠聽冧把喎，不如去澳門賭鋪大細啦，係咪先！你知我EQ幾差啦，仲要被外來嘢影響？實死梗！」

老竇保命 照顧阿媽

阿蘇的母親是校長，有兩兄三姊，她是孻女。她做過電台、B & O和通利琴行的市場推廣，亦做過保險。自恃聰明，五十歲前目標只有一個：「開心」。「每日哈哈哈一輪就收工，一星期打足八、九場麻雀，落disco、劈酒，咁就過咗五十年！」

聲大夾惡，是阿蘇的形象。唯獨說到下個月便九十歲大壽的父親，及早年發現患上老人癡呆的母親，她的臉上，才添上幾分柔情。

「阿媽有十六個兄弟姊妹，她排第十五。在一眾老表中，我排第三十四。老竇九十歲嚟緊，仲記得那幾十人的名字，記性好到不得了。係隻眼差啲啫，矇吓矇吓仲有打牌o架，靠甩牌囉，斷估無痛苦！」

劉父（阿蘇原名劉高琮）打理家族的鞋業生意數十年，七十多歲退休後，以為可安享晚年，卻遇上妻子患老人癡呆。命運不許他「退」，他就惟有繼續向前行。

「自從阿媽七十幾歲發現有老人癡呆，老竇就好努力去照顧自己的身體，好肯去睇醫生。每個月又去吊兩次水，清洗血液內的毒素。為的，是要保住條命，活得長過阿媽。」

父母相依相伴大半生，兩老每句對話，每個動作，都令阿蘇有種莫名的感動。

「他們一起成長，很多經歷，只有兩個人知道，但突然有一日，其中一人乜都唔記得晒。老竇頭幾年真係好難接受，他會陪老婆一齊讀報紙，逼老婆讀字：『呢個係花園個花呀，蘭花又係呢個花，打牌一枱花又係呢個花……』但當他發現所有努力都唔work時，確實幾失望。」

近年，劉母病情加重，不能說話，亦不認得人。今年四、五月時，更因肌肉失控，在醫生建議下插胃喉，只能進食流質飲料。然而堅強的劉父，一直沒放棄過。

「老竇簡直是愛妻號。三年前，阿媽入院割膽，老竇在房門外騰來騰去，騰足幾個鐘。阿媽一推番出來，他即刻拖住阿媽隻手，喊晒呀。

「老竇為了同阿媽多些相處時間，我們食飯時，就讓媽媽坐在隔籬吊住樽奶。每晚他又會像o氹細路般，拖住阿媽隻手，大家碰一碰頭才睡覺，真係好sweet。」

七八年，阿蘇於加拿大University of Alberta唸畢心理學返港後，在舊同學俞琤（後排右三）邀請下入商台做DJ，並與朱明銳、曾路得（後排右一、二）、鍾保羅（後排左二）及陳少寶（前排左一）等組成「六啤半」。

愛人 就是一個咕o臣

父母的深情，令阿蘇近年對愛情亦有了新的詮釋。「我覺得人的戰場應該在市場上，但對屋企人，是要包容和包涵、要很多愛。」

與金燕玲相戀五年，最初二人會為芝麻綠豆的事而嗌交，「飲完嘢個杯唔丟落垃圾桶又嗌，眼鏡點樣擺又嗌，去完廁所唔沖廁又嗌……」

○五年阿蘇患乳癌，金燕玲一直在其身邊患難扶持，從此她承諾要令金燕玲一世都開心，現時每晚都會問對方：「你今日過得開唔開心呀？」

○五年，阿蘇患上乳癌。被推入手術室那一刻，金燕玲哭得呼天搶地。經歷過患難的愛，叫人特別珍惜。

漸漸地，她在金燕玲身上學習「愛」，當中包括「大方」。「以前有朋友約我們食飯，她不肯去，我會唔開心。但換轉有朋友約我鬥地主，她會好大方同我講：『好吖，你玩得開心啲喎，我自己搞掂得喇。』於是我諗，點解我去鬥地主她不會嬲，但她不陪我食飯我要嬲呢？既然當日我承諾要令她每日都開心，若她和我朋友食飯唔開心，咪由得她去做她開心的事囉，這才是真真正正好大的愛。

「正如我問朋友，頂唔頂得順老公去滾，大部分人都頂唔順。但我再問，咁頂唔頂得順老公每日同你做愛兩、三次？更加頂唔順啦！哈哈哈，答晒啦！」

自十七歲初戀至今，阿蘇坦言不能一刻沒有愛。由當初「男男女女都愛」，至今天選擇定了，她自信是個百分百好情人。

「愛人就是一個咕o臣。當你坐一張櫈時，有個咕o臣會令你覺得好舒服；而愈長途的車或飛機，無咗個咕o臣愈令你覺得頂住頂住。不過，咕o臣的作用只是令你舒適，若你想要一張櫈，不如請個工人。作為伴侶，我自問令到對方好舒服。」

然而濃情，總會轉淡。最好的咕o臣，也有洩氣時。誰又可保證，一段情可以恒久不變？

「如果大家對大家咁好都變心，由她走啦。其實當有一日，某個人對你變心，而你又真的想她開心，讓她走吧。一世人又不是只識一個女人，香港有七百幾萬人，起碼有三百幾萬個女人啦，可能仲多啲添。哈哈哈！」

愛到分離仍是愛，怎說，也是一種福氣！

老，可怕嗎?

「唔該你幫我拎張紙巾！」訪問途中，阿蘇嘗試由紙巾盒取出紙巾，但失敗。

○五年是阿蘇的噩夢，除患上乳癌，又發現子宮較常人大一倍，還被類風濕關節炎苦纏。

「日日起身都痛，已經嚴重到唔係好行得，手亦唔係好郁得。水樽又開唔到、房門又開唔到，今日連扣褲鈕都扣唔到，要工人幫手。」

日復一日，痛苦漸漸已變成一種習慣，甚至是生活的一部分。

「怕死嗎？」我問。

「你放心。阿爸阿媽兩邊親戚加埋成百人，由兩歲開始，我身邊就不停有人瓜老襯，自細已出入大酒店，成日被人叫『 殯儀之星 』。」

生死，她早看慣了。老，她倒有些怯。

「死得就唔怕啦，最怕是老而不死，又無錢。」

老來，只要有個「她」，陪伴共踏遍地黃葉。

老，還可怕嗎？