遠如《宮心計》、近如《隔離七日情》，李國麟無論演繹奸到出汁的馬元贄抑或是「疑似露械」的綁匪首領萬波，也都入木三分，眉頭一皺，令人心寒。不過，眼前帶着八歲女兒Cherry的李國麟，卻又如此柔情似水，略帶點嬌媚，壓着聲線對着女兒笑意盈盈！

雖然李國麟縱橫電視圈逾三十載，但出奇地他竟堅持不讓女兒看電視劇，因為怕她污染了純真思想，於是乎，Cherry難得地擁有八歲兒童應有的童真，她說：「我大個想做小學老師！」李國麟即時用鼻尖哄着心肝寶貝說：「點解係小學呀？唔做大學老師？幼稚園都好喎！」奸人都有可愛的一面。

李國麟的女兒兩年前開始學畫畫，卻是第一次與爸爸一齊畫畫，感覺特別開心。

李國麟視女兒為心肝寶貝，將來只希望她做一個開心的平凡人就好了。

思想污染

今年五十六歲的李國麟，四十八歲才為人父，卻不認為與女兒李沅薐（音：元玲）、Cherry有着大隔膜。「囡囡係黐頭芒嚟嘅，由細到大都鍾意黐住我，事無大小都想我參與，雖然我成日要返工拍劇，但唔使做嘢嘅時候，就一定畀晒個女，接送放學呀、帶佢周圍去玩呀，咁佢就唔會投訴爹哋成日唔喺屋企囉。」

李國麟以慈父自居，囡囡嗲一句便心都軟埋，不過，卻嚴禁女兒睇電視，「一睇電視就會老積o架喇，你知我哋有啲電視節目幾污染啲細路仔o架啦，尤其是夜晚嗰啲節目，其實係畀大人睇，大人理解性高啲，會明白呢啲係做戲，但小朋友唔明白嘛，啲情愛又亂晒龍、啲關係又亂晒龍，又殺人放火咁，依家啲細路模仿力好高o架，唔想佢睇嗰啲節目變得太老積，但我會畀個女睇兒童台，所以佢比較童真啲。」不過，問到Cherry有否看過爸爸主演的電視劇，她即時數出爸爸近年的數套劇集，並謂知道爸爸在電視台工作，見到爸爸飾演的奸角也不害怕，「因為我知爹爹係返緊工，扮一啲嘢。」

Cherry三歲開始學拉丁舞、五歲開始學鋼琴、六歲開始學畫畫，不過最近因功課繁重全部暫停，李國麟說，他從不強逼女兒學這學那，「佢有興趣就畀佢學，唔想學亦唔會逼佢，我唔需要佢有咩才能，我只想佢身體健康，做一個開心嘅平凡人就得喇。」