說起來，其實也要多謝廖碧兒。

要不是她去年底為了新歡而把六年情劃上句號，陳豪這個筍盤大概也不會留意到陳茵媺；要不是她在事情淡化後，在全城正為男的有新對象而獻上祝福之際，忽然以受害者姿態出來接受訪問，亦不會彰顯出其他人的清者自清。

路遙知馬力，日久見人心，生得樣靚身材正並非大晒，當下聰明的觀眾，已改為看重藝人的德行，心腸差不差、是否愛以解釋來做掩飾、是否愛搞風搞雨等，日積月累的娛樂報道，都足以讓大眾留下印象。故此，為何有些藝人可以如此討人歡心，有些藝人稍為露出狐狸尾巴，觀眾緣即時一鋪清袋。

本來屬於兩個人的感情事，外人是沒資格當判官的，但這一趟，相信大部分旁觀者也不得不牙鬆弶了，唯獨作為當事人，陳豪卻言之有物地反過來安慰大家：「千祈唔好將過往一啲唔好嘅經歷，成為將來嘅障礙，呢個好唔公平！」

好氣量，絕對是成為筍盤的其中一個要素，有人不懂得珍惜不打緊，然而各位男士請學嘢！

她與她

廖碧兒與陳茵媺，兩者都來自加拿大，兩者都是選美出身，但形象卻南轅北轍：一個事事表現出其上進心，兼且時刻一副戰鬥格；一個安守本分、實實在在、甜美親民得幾乎成為了大眾家嫂。

陳豪自從去年底被人狠撇後，他坦言，這幾個月來已沒有跟廖碧兒見過面。「都係嗰句，關於佢嗰啲嘢，我唔會回應太多啦，因為我唔想再畀任何評論關於嗰方面嘅嘢（對方搭上富二代被撇）……」說着說着，他的語氣慢慢沉重下來。

接着，我冷不防直接問他：「那陳茵媺呢？」他即時睜大眼睛看着我，一臉通紅地大笑起來。「嘩……哈哈哈！我同佢係喺《心戰》度認識，佢都歎過我啲咖啡，其實我都欣賞佢，佢真係一個好女仔，佢短頭髮又好睇，我同佢係啱傾嘅，講真，我覺得佢Ok，對佢有好感！」

他說，在感情上，他的作風從來都是低調，都是隨遇而安。「呢啲嘢冥冥中自有主宰，一早已經set好晒，係等人去埋位，自然就會發展落去，所以我覺得依家乜都唔需要做，只要好好哋過我嘅生活。」但對於最近有傳陳茵媺正被新劇拍檔蕭正楠狂追，可會加倍發力嗎？女仔始終要追呀。「追係一定要追，我都係一個正常嘅男人，都一樣會咁做，所以我咪喺度密謀睇緊筍盤囉，哈哈哈！」

最近有說蕭正楠力追陳茵媺，陳豪早前趁母親由澳洲回港見準「新抱」箍實陳茵媺。

有些關係，既然早已得到觀眾認定了，何解有些人還要求公開宣布多此一舉呢？

陳茵媺最近公開表示，陳豪有機，男的應該收到了吧！

去年底受情傷，陳豪惟有忍痛繼續開工。

陳豪說，拍《點解阿Sir係阿Sir》，笑位場面，他幾乎佔了九成多戲份。

筍不筍

就外界反應而言，很多人均認為陳豪跟陳茵媺性格和外形都頗合襯的。「好多人都係咁講。」他臉紅地說。那去馬吧！「好！」女仔要追o架！「無錯，哈哈哈！」即係點呢？「筍盤囉，有邊個唔鍾意筍盤呢？我都鍾意筍盤嘅。」說罷又發出了一陣尷尬的笑聲。

他說，對於女筍盤的定義，早已未必一定要樣靚身材好。「我反而會追求對方啲性格、對人對事嘅態度，大家睇嘅嘢、價值觀同channel係咪一樣，呢啲會緊要啲囉，當然，冇人唔鍾意靚仔、靚女，但真係搵到時，又會發覺，咪又係咁，係咪先？」

但陳豪自己也是一個有外形兼形象討好的筍盤典範呀！「吓？我覺得大家睇得我太好啦，講真，我唔係乜嘢筍盤，林峯呢啲，後生靚仔，又羅曼蒂克，唱歌又好聽，我係女都冧佢啦！男人係要講本事、做到嘢、搵到錢，叻嘅話咪係筍盤囉，但我覺得我唔係囉，我只不過係一個普通人，一個普通盤，少少向海、有少少View咁啦，哈哈哈！」到君臨天下的級數未？「嘩！有排啦！我仲係將軍澳嗰啲！」那陳茵媺居住的清水灣半島級數應該有吧！「我仲慢慢摸緊上去啦……哈哈哈！」他鬼馬地笑起來說。

負責任

陳豪說，無論對哪方面，自己都是一個很負責任的人，亦因為曾經嘗過苦，所以更懂珍惜眼前的好，例如工作。「我九四年入行拍《晚九朝五》開始，就拍成三十幾部電影，雖然話拍電影唔少錢，但當你今日唔知聽日事，個心就會慌！我試過一個月、兩個月、半年冇工開，試過做傳銷，又試過爭落成身卡數，畀人打電話嚟追數鬧我，左卡冚右卡，右卡冚左卡，又用credit卡嚟撳錢，呢啲時間維持咗好耐，老實講，如果唔係自己喺人工方面好啲嘅話，根本還唔到錢！

「○○年入咗TVB之後，我個人終於定晒，因為我終於有固定收入，每個月有糧出，雖然嗰陣人工得幾千蚊，兩嚿水使三、四日，食餐飯都唔敢，我試過由旺角去銅鑼灣，淨係坐咗程兩個二的渡海小輪，全程都係行！冇錢嘛，咪乜都要慳囉，但我卻覺得好腳踏實地！」

因此，這十年來，他一直留在TVB盡忠職守，公司安排他一年拍一百一十集劇，他從來都沒有推過。「我唔可以話係忠誠，只可以話我個人比較有責任感，既然我係TVB演員，我嘅工作就係要幫TVB拍好套劇。」

但最近有員工投訴TVB拍劇工時過長，十年都努力地拍劇，不辛苦麼？「電視製作模式由始至終都冇變過，劉德華、梁朝偉個個都係咁拍，嚟到我哋呢代都一樣咁辛苦，但我阿Mo係個捱得辛苦嘅人。你話啦，有乜嘢工係唔辛苦先？入得電視台拍劇就預咗辛苦o架啦，我自得其樂從來唔諗太多嘢，亦唔會諗有冇獎攞，講真呀，如果我係為個獎而工作嘅話，我人生目標會變得非常渺小！一個獎算得係乜呢？我寧願多啲人鍾意自己！」

陳豪去年尾獲得馬來西亞「My Aod我的最愛電視男主角」獎，可見他人氣有幾勁！

陳豪將於馬來西亞開cafe，為自己未來鋪後路。

鋪後路

上月十六日，陳豪踏入四十歲。他說，活到這個年紀，必定要為自己的穩定生活作打算。「我以前有好多計劃，搵幾多錢、三十歲前結婚生仔，但依家……哈哈，你見到我仲係一支公！哈哈！不過做呢行，我慢慢發覺好多嘢已經唔係自己可以控制到，你睇吓羅樂林，邊會諗到佢突然會因為一日死五、六次，就成為咗國際焦點？所以我三十幾歲開始，已經覺得時間好緊逼，我諗我唔夠時間做好多嘢，雖然我仲想繼續拍劇，但我呢個年紀，仲可以辛苦得幾多歲？我亦都預咗花無百日好，大家睇到依家嘅我，都係好嘅一面，我唔好嗰陣，又有幾多人睇過？老實講，我依家仲係喺手停口停嘅階段，萬一我突然有乜嘢事，冇收入，我就係得咁多o架咋。」

最近正忙於籌備在馬來西亞開的cafe，應該算是後路吧！「都可以係咁講，始終呢個係我夢想，都籌備咗好耐時間，我都希望可以成為side business，等第日唔使咁辛苦，始終我年紀唔細啦，我都唔想將來仲係手停口停。」

所以話，男人要成為筍盤，並不是一朝一夕的事，亦不是單靠靚仔有型高大威猛，當中要訣，男士們，請自行在字裏行間領悟。

Specialty Coffee

別以為陳豪愛咖啡，只是用來經營他的筍盤形象，其實他真的比很多人稱得上是咖啡專家，而且一提到咖啡，他就可以喋喋不休。

例如，訪問期間，陳豪忽然拿起擺放了良久的Cappuccino，輕輕力用杯底在枱面上敲了敲。餐廳職員看見了，緊張地問他要不要換過另一杯，他親切地笑着解釋：「咁樣做可以將啲咖啡同泡融成一體，飲落口感會好唔同，有啲似棉花。」

又例如，當問到他自己屬於哪一種咖啡時，他又會認真地細想，然後說：「應該是Macchiato吧！因為我覺得我人生中苦嘅階段已經過去，依家嘅生活可以話係豐盛，就好似呢種咖啡，佢其實係Espresso，加入啲奶泡，令佢味道甜、唔苦、口感濃滑，餘韻非常之好！你知嘛？一杯用正宗製作方法整嘅Espresso，係唔會苦o架，反而係甜……（下刪五百字）」

陳豪這杯Specialty Coffee，真係嗒得落o架，各位姊妹們。