一首《那誰》在Youtube點擊率逾一百六十多萬，十一月初開的兩場個唱也告爆滿了，蘇永康再戰香港樂壇便有這樣的成績，他說，所有都是在「冇數為」之下發生的。

「最初簽東亞大岳時，本來只打算發展大中華市場，拍多啲電影，經理人提議不如試吓入紙紅館呀，點知批咗；咁開得個唱，應該要整首歌派台喎，點知首歌又話成為咗小弟今年代表作，點知就係咁要出張廣東大碟！有冇壓力？哈哈，我都冇嘢好輸！我有乜嘢輸呢？」

的而且確，對於四十四歲的蘇永康來說，即使《那誰》不受歡迎，即使個唱飛賣得再差，怎樣也不會比過往十年所經歷的更起起伏伏：藏毒被捕、勒戒、離婚、暫停唱歌返內地拍劇過冷河，接着認識了現任女友Anita、重回台灣開個唱成功收復失地、與許志安、梁漢文和張衛健組成Big Four大受歡迎，然後，離開了金牌大風唱片。

這一切一切際遇，當事人沒有忘記，而且全都緊緊牢記着，更從中領略到甚麼叫「變幻才是永恒」。「只要習慣咗變幻，就唔會有嘢好執着，情緒上亦唔會有乜嘢需要波動。」

所以，他今天跟我說起的，無論是好的壞的，他都彷彿在說着別人的故事。

○二年藏毒被捕，他一直表現得從容，只因：「我係犯咗錯，就要面對懲罰！」

離開了金牌，蘇永康對恩師黃柏高仍然十分尊重。「我到依家仲係叫佢做老闆。」

勒戒

二○○二年六月八日，蘇永康在台灣因涉嫌藏毒被捕，兩個月後，他主動提出返回台灣接受強制戒毒，被判勒戒十一天……

香港同台灣冇遣返條例，嗰陣如果我唔返去台灣，佢哋吹我唔脹！

但我呢件事於道德同法律上都係錯誤！好簡單，我係犯咗錯，就要面對番個司法程序！勒戒呀？勒戒囉！只要接受到個後果，就係一條好漢！

我返去勒戒時，所受到嘅對待都係友善嘅。入到勒戒所，因為我係公眾人物，佢哋要保護我人身安全，將我囚喺一個專畀前警務人員坐嘅倉；嗰陣冇人影到我喺勒戒所着住件核突衫嘅相，因為嗰度啲人同我講，勒戒所外面個天台，有幾十支鏡頭對住我，如果放風時，我唔想出去，可以畀我喺走廊度行，就係咁，我每日放風時就喺走廊度散步。

我最記得，有次有個兇神惡煞、成個殺人犯嘅人攞飯畀我食，佢竟然同我講：「你只係勒戒十幾日，返出去咪又係一條好漢！我都唔知仲要喺度幾多年！」後來我先知，呢個人本來係個警察，因為屋企有問題走去打刧，潛逃咗好多年，最後都被捉到——一個完全唔認識你嘅人，做乜要鼓勵你啫？後來我有首歌叫〈老死〉，就係寫呢個人！

將於十一月初舉行的個唱，已告爆滿。蘇永康說，每次舉行他的個唱，股市總會有很大波動，所以揸貨的人請醒水。

以千萬身價轉會加盟華星唱片，成為大岳旗下藝人，他說一切都是賺回來的。

冷眼

蘇永康坦言，這件事之後，當時有很多傳媒高層都着他恩師Paco黃柏高放棄自己。「Paco同我講：『阿康，我點都唔會放棄你o架！不過你依家喺香港唞啖氣，啲傳媒都會話你錯，金牌又暫時冇位畀你，不如你返去內地拍劇啦！』」

結果，○四至○六年，他沒有唱歌，一直留在內地拍了一百三十集的電視劇來餬口。

嗰陣，我冇諗過要退出娛樂圈，因為我覺得蘇永康唔會就咁埋單！

老實講，呢件事最令我感受到冷眼同蜚短流長嘅，並唔係嚟自街外嘅市民，亦唔係嚟自海關，而係香港某啲傳媒！

我好記得出咗事之後，有啲傳媒全程跟住我入海關，睇我有冇畀人搜身，點知個海關對住我笑，叫我：「行啦！」又有一次去海天堂買龜苓膏，對方又會同我講：「唔緊要o架！邊個冇錯過呀？由頭嚟過囉！」

半年後我返台灣攞番工作證，個海關一見到我就話：「蘇先生，歡迎你返嚟台灣！」上節目，小燕姐、吳宗憲個個都叫我：「別提啦！事情都過去啦！」返到內地，佢哋直情當冇發生過，叫我唔好講，因為大家唔需要知呢件事。

點解三地嘅傳媒朋友，可以對我呢件事有咁唔同嘅對待同睇法呢？其實呢件事係part of my life，任何傳媒問我，我都唔介意去提，我冇得去拒絕或逃避，但係香港某啲傳媒嘅心態好怪，硬係想你死！

離婚

跟新加坡前妻阿Jane馮麗清的一段婚姻，是蘇永康另一個不能不承認的錯誤決定。「我當時發仔瘟，好想生仔！冇諗清楚對方係咪可以同自己走落去嘅對象，就話結婚，呢個係一個好naive（幼稚）嘅想法！」

最後，這段婚姻只維持了不夠五年的光景。

我九八年認識前妻，九九年九月廿七日就結婚。

我好記得九九年四月，我哋喺英國飲住cappuccino傾住偈，我問佢，係咪要計劃一吓結婚呢？因為我覺得自己事業都守咗咁多年，生命裏面有啲step似乎已經做晒，既然遇到佢，係時候要做埋另一個step。

結婚之後，佢一個女人攞住個篋就嚟香港，冇朋友，得我一個，佢又唔係圈中人，唔習慣我嘅生活圈子，同我啲朋友完全唔夾——喺責任上，我一定要包容佢，我咪惟有留喺屋企陪佢囉！唔鍾意香港呀？咁我咪畀錢佢返新加坡開舖頭做生意囉。

但我哋慢慢發覺，大家喺生活上面有好多嘢都好唔對勁，大家一直都盡好大努力去挽救段婚姻，如果唔係○二年發生「fing頭丸」事件，佢仲肯捱義氣同我頂多年，其實我哋喺○一年已經離咗婚！估唔到最後頂到○三年五月十號，我哋終於要簽署離婚協議。

我同前妻依家已經冇聯絡，佢唔係我老婆，唔需要再活喺蘇永康陰影下，亦都唔係公眾人物，所以希望大家唔好騷擾到佢嘅新生活。

紅顏

蘇永康花了好幾年時間才走出離婚的陰霾，直至○六年在陳奕迅和徐濠縈的婚禮上，遇到現任女友Anita，他才放膽再開始第二段戀情。

嗰日係三月廿三號，好易記，因為我阿媽生日。

我第一眼見到佢，已經「叮」一聲！我估佢應該係時裝人——唔好意思，以我一個咁樣衰嘅人，我都會以貌取人o架，哈哈哈——OK，然後上至主人家，下至歐陽德勛、劉浩龍，個個都睇住我嗰晚係咁坐喺個陌生女子旁邊，都知我狗上瓦坑有條路！

我嗰晚攞咗佢電話之後，第二日我就返上內地拍一個月戲，我哋就傾足一個月電話！我臨返嚟香港之前同佢表態，但我亦都同佢講明：「如果你想結婚嘅話，我哋就做番朋友啦。」點知佢咁樣都可以接受，我哋就開始咗！

我冇諗過，佢竟然願意同一個仲有婚姻創傷後遺症嘅人開始，○八年，我有首歌叫〈紅顏知己〉，就係寫畀佢。

同之前段婚姻比較，我最大分別係有耐性咗，亦明白到一定要appreciate對方依家所為你付出嘅，唔可以take for granted！依家我哋共同生活咗幾年，大家所有生活細節嘅嘢都適應晒，佢又同我媽咪好夾，成件事好似好合理咁……或者對嘅人，真係會喺對嘅時候先會出現，我諗，呢個就係嗰個對嘅人。

跟前妻阿Jane的一段婚姻，蘇永康說彼此拉鋸了好幾年，最後還是要離婚收場。

現任女友Anita，蘇永康大讚她個性隨和大方。

年前開始跟許志安、張衛健和梁漢文組成Big Four，大受歡迎。

假使有日能忘記

「舊記憶，講不出有多重……」這是蘇永康多年前一首叫〈假使有日能忘記〉的副歌歌詞。不知怎的，當我跟他做訪問時，這句歌詞便一直徘徊在我的腦海中。

曾經在電影裏，聽過一句說話：「人之所以有煩惱，只因為記性太好。」蘇永康的記性真的很好，然而我卻看不出他有甚麼煩惱，因為他就算舊事重提，表達時都彷彿不痛不癢。所以，我用了另一個角度問他：如果可以刪除人生其中一年，你會選擇是哪年？

「○三年。」他想也不用想便說。「嗰年，所有發生嘅嘢都好差，對香港人嚟講，對我嚟講都係：沙士、哥哥離開，然後阿姐（梅艷芳）又走埋，我自己……（他大力歎氣）又離埋婚，嗰年全年都冇單好嘢！」

然後，我知道我已經不用再問他，勒戒和離婚，哪件事對他打擊比較大。