洛文終極妖Look出晒位
【方傑澳門直擊】洛文終極妖Look誰與爭鋒！上周五一身「騎呢絲巾Look」抵達濠江的洛文，昨日又再大發神經，化身花面貓「胸」襲賽前記者會。期間妙語連珠回應傳媒提問之餘，散場後更識做留低任由記者影相，略施小技便輕鬆砌低柏賓、夏達威及佩頓等球星成為全場焦點，即使全體經典球員於記者會尾段齊齊亮相，亦慘成洛文背後的活動布景板，「妖蟲」果然識出風頭。
「美國傳奇球星亞洲之旅─澳門站」記者會昨午2:30舉行，4位人氣最高球星洛文、柏賓、夏達威及佩頓負責擔大旗，抵澳後一直渾渾噩噩的洛文，昨日「做番自己」繼續標奇立異，遲遲未亮相一度被以為甩底，豈料卻突然以妖Look壓軸登場，惹來全場記者喧嘩。
語出驚人：「過兩日或畀人拉！」
洛文貫徹「妖蟲」本色，將原先一頭啡髮噴成粉紅、橙及紫3隻顏色，畫上「花喱碌」面譜及塗上金黃色嘴唇，並以開胸Look造型艷壓記招，就連席上的柏賓及夏達威都「頂佢唔順」，不斷低頭喪笑。被主持人問到對於洛文的造型有何意見，多年公牛戰友柏賓苦笑稱：「習慣了！」
4大球星平起平坐，不過包括澳門及海外行家均追住洛文發問，冷落了另外3位球星，被問到會否繼90年代舊作《Double Team》後再闖大銀幕，洛文抵死回應：「真係唔知喎，可能過兩日我已經畀差佬拉咗去坐監呢！」及後洛文記者癮上身，突然搶咪向職業籃球舊友聯會（PBAA）主席兼行政總裁史密夫發問，勁識搞氣氛。
40分鐘化行妝博出位
連日表現Cool爆嘅洛文，喺記者會散Band時，仲特意留步謀殺菲林，再一次向傳媒展示其「騎呢」造型，似乎對這身妖艷Look十分滿意，洛文透露：「我用咗40分鐘時間裝身，點解要化個咁嘅妝？想特別啲，博出位囉！」
開胸衫露晒心口嘅紋身，真係嚇人。
柏賓（右）見到洛文都忍唔住笑。
洛文夜晚打波嗰陣又將塊面油成金色，同下晝見記者時唔同款。
留言列表
