Gaile Lai黑色釘珠織網掛頸晚裝$99,000 Versace
cover face
樂基兒 Me First
又見樂基兒！卸下「天王嫂」金冠， Gaile的話題仍然綿綿不絕，應該說，機會仍然綿綿不絕。
回歸單身後，久不久聽到她有意、將會、正在搞生意的消息，飲食啦！海灘啦！
終於，拿出來見人的，是珠寶設計。
咁突然？！緣來峇里，點燈人正是其澳洲女室友，早前經常遊澳，不是拍拖，是傾生意。
這個被她形容為「 my baby」的項目，十月於美國發佈，聖誕系列已上場，新鮮熱辣，好玩的代價，便是沒覺好瞓，又畫圖又趕工廠又兼顧澳洲美國峇里三地市場，還要學電腦整理網頁，幾季後的新作構思好了，準備投入生產云云，名模變女強人，不止我，連她自己也意料不到。
Gaile揚言找到新歸宿，疊埋心水做個藝術家，男朋友也要靠邊站。
「依家 me first，唔諗得咁多。」乾脆兼實際。
Profile
Gaile Lai
原名：黎嘉儀
出生日期： 1980年 8月 22日（處女座）
出生地：澳門（父為中國人、母為越南人。）
身高： 5呎 8吋
體重： 110磅
三圍： 33-24-34
語言：廣東話及英語
學歷：香港藝術學院藝術系學士
簡歷： 1歲，隨家人移民美國三藩市。 14歲，兼職模特兒，曾於紐約時裝周行騷。 18歲，來港發展。 08年，跟黎明結婚。 12年，二人離婚。
主要作品：廣告「和記手提電話」（ 00），「修身堂」（ 07），「 Neutrogena」（ 08-13）。電影《 I do戀性世代》（ 01）。
模特兒公司網頁： http://www.calcarries.com.hk 
想做 vogue.com
好難想像， Gaile會做生意，她一向隨性，「在峇里，日日滑水；返到美國，朝早跑步後再游十個塘。」還不止，得閒又飛來飛去探朋友，這種人，定不下來。
世事無絕對。
好易想像， Gaile會做生意，她一向善理財，對未來總有打算，「 No.1穩健投資，一定係物業，美國、東南亞我都有。」究竟黎明有沒有付贍養費？我唔知，只記得 Gaile曾說，自己唔算大花筒，靠做 model收入儲儲埋埋已在美國買樓，留給媽咪收租當家用，安頓好家人，準備再買，保障自己未來，當時，二人新婚愛正濃，我好奇為何如此 sad？「依家開心，但邊個知道聽日會發生甚麼事呢？」當時甜笑戲言卻一語成讖。
愛情沒法子計算，生意卻有數得計。
撤出香港，搬去峇里生活這段日子，認識了澳洲珠寶設計師 Ozlem Esen，大家一拍即合，齊齊搞網上珠寶生意，「呢個女仔真係一個 angel，珠寶之外，佢自己仲會出唱片，兼任時裝設計師，又有朋友設計 sunglasses，成班人聚頭好 inspiring；「 So far我畫嘅 drawings，個個都話 very original。」品牌「 Smoky Roses by Gia」順利誕生，「我唔想以 Gaile名義去做事， Gia係我個真名，好讓一班唔識我的客戶，只為產品而來。」店鋪設於峇里和澳洲，美國網上銷售，唔預香港和大陸開鋪，「大家喜歡一樣可以上網買。」電腦初哥的她，網頁仍趕工中！
13年在峇里，生活簡單，運動完，就去買餸，「我食好多魚、新鮮蔬果，唔使節食都好 fit。」羨慕呢！ 
13年早於年初， Gaile已嘗試將自己的名牌衫放上美國二手時裝網站賣，以試市場反應。 
13年好友網頁內戴上飾物影 styling，「我跟 Ozlem係 sister label，對方 hip hop，我傾向波希米亞。」
見慣精品，自家珠寶也找來加籍印尼工匠操刀，「佢幫 Rick Owens和 Beyoncé做珠寶。」現在，由畫圖、搵物料、製作以至宣傳一腳踢，忙到做瑜伽都唔得閒，「來到香港，夜晚跟美國開會到天光，約人畫 drawings，返到美國，輪到跟印尼廠傾公事，又係晚黑開始，瞓得好少。」首個系列，銀、鍍金和水晶為主，之後，每年做 50件，「春夏和秋冬兩季各 20件， 10件 for Christmas；「 First collection我全部用碎鑽， second collection就用純銀， third collection我用 stone或窩釘，跟住就會有齊整個 market。」除了珠寶，還有其他，「準備開啟個人購物網頁，亦會 carry好多澳洲衫牌，到時將會係一個 fashion supermarket；「一向都想做到好似 vogue.com，自己做呢行，識咁多人又去咁多地方見識事物，點解唔做埋一份？」滿口生意經，到底你係咪真 Gaile呀？！「朋友成日笑我淨係掛住 creative，應該學習點樣用一蚊製作拿去賣四蚊，唔係掉轉頭，用四蚊製作賣得一蚊；「珠寶可以隨時溶咗啲金，搣走啲石，從頭再造過，可塑性更大，衫褲就唔可以啦！」
還有誰會說樂基兒爛玩？「我本來就係一個工作狂；「原打算搞飲食生意，太忙要擱置……」但話口未完，「我發現成個峇里都沒一間好的雪糕店，點解呢？沙灘多、遊客多，應該好有商機……」我再問多一次，到底你係咪真 Gaile呀？
Gaile Lai彩色織花刺繡連身裙$49,000紅色併皮尖頭高踭鞋$6,000both Valentino白色陶瓷雕刻吊墜金鏈$25,950Bottega Veneta 
Gaile Lai黑色蟒蛇皮貼身 jacket$69,900黑色蟒蛇皮鉛筆裙$39,900 both Gucci
我未必會有家庭了
33歲的 Gaile，事業再現契機，生活上，「上年有點煩，依家好忙， but happy，我對 love已沒想法，依家，要 me first，唔諗得咁多。」
做女人，幾時都應該先令自己開心，才可讓身邊人開心，「 Happiness首要識得選擇正向朋友。我曾經都係一個好有耐性的人，慢慢變得沒有，一個朋友如果沒 positive energy，唔好再拖大家時間，要分開。」如此撇脫，更見女強人硬朗，她搖頭輕嘆，「我最重視家庭，偏偏父母離婚，自己亦走上同一條路，呢個係命運。」
回顧前塵，年紀小小已一個人闖天下，十數寒暑，到頭來，依然孑然一身，怎不教人欷歔？
「可能我未必會再有 full family。」我唔知點答！
「在我來講，做人只有兩個 age，出世和死，當中條路點行，全在乎你自己。」這才是真 Gaile！「唔理咁多，投入去做令自己開心的事情吧！」
個性總帶兩分視死如歸的儍勁，投入時很投入，甚至不惜一切，「係呀！一排鍾意煮餸就煮得好叻，一排鍾意 surfing就日日去玩，一排鍾意畫畫就去讀書。」好一副盡地一煲，今生無悔 feel！
現在，熱情盡投珠寶設計，我估 model出身，更有成功把握？「我唔覺得 modeling訓練到個人自信，全世界都知，呢一行最沒 security，不過，可以讓我認識一班叻人；「讀書影響最大就真，我畫畫唔靚，但學到點樣將一件簡單物件變出十幾個樣，技巧可以用於設計珠寶上；「 As a model讀到書，係一個好大 achievement，當年，我唔 enjoy，因為時間 manage好辛苦，依家，終於明白知識可以 link up其他工作；「我只係開始，可能六個月後發現沒人買，但唔緊要，呢個係一個 learning experience。」
Gaile Lai白色立體刺繡雙層連身裙$10,420黑色綴金色圓釘腰帶$8,000黑色綴金屬方釦長 boots$19,900all Alexander McQueen黑色圈形耳環 stylist's own 
Gaile Lai黑色針織背心$5,750藍紅條子拉鏈薄絨背心$7,950藍紅條子薄絨半截裙$7,450銀色腰帶$3,250Metallic彩藍色併金色高踭鞋$8,150all PRADA
後記
當日， Gaile一邊影相訪問，一邊拿住電話覆 email，忙到呢！一埋位，即自動波交表情兼向客戶交貨，連聲對新產品讚好，醒到呢！
女人煩惱，離不開男人與年齡，前者她已半收埋，至於後者，她亦直言至死不怕老，「 18歲係靚，但我依家更成功更有自信，做人更開心。」看到嗎？忠於「我」，「我」自然活得瀟灑自在。
Shop List
Alexander McQueen尖沙咀九龍站 Elements 1032B號鋪 2649 3098
Bottega Veneta中環置地廣場 G06-07號鋪 2973 0882
Gucci金鐘太古廣場 368號鋪 2918 1778
PRADA中環歷山大廈 G4號鋪 2522 2989
Valentino中環置地廣場 103-104號鋪 2523 8035
Versace尖沙咀海港城海洋中心 117A號鋪 2737 2628
撰文：伍淑嫻
形象： Annie Hung
攝影： Kenji Leung
化妝： Jacqueline Ma@CK Makeup Beauty
髮型： Hin Wan@IL COLPO
Ads by Google
留言列表
