關心妍豪掃補品催生龍B
關心妍曾揚言完成紅館騷便和老公出埠度假全力造人，日前她便豪花3萬元狂掃補品，包括男士補品鹿尾羓等貴價藥材，似乎她已上定「彈藥」，務求一擊即中。
關心妍（Jade）下周五（20日）將圓8年紅館夢，舉行《關心妍Jade Sings演唱會2012》，近月作地獄式減肥、堅持每天做8小時運動的她，忙到老公都出言投訴，為氹回老公及證實自己以家庭為重，減到僅得96磅的她趁錄影電視節目前1小時，在3位唱片公司的同事陪同下，急急腳往銅鑼灣的樓上燕窩莊入貨。
自言做師奶是強項的Jade，甫入店即開行「Turbo」推購物車掃貨，見她撇下同事，一個箭步到凍櫃睇「男士恩物」鹿尾羓，雖然一盒要約7,000元，但已躍升為闊太的她毫不肉赤，急急放入車內。鹿尾羓向有壯腰益腎功效，坊間更視為生育良品，不一會她又睇有滋陰補血功效的婦女良藥阿膠，似乎恨做阿媽的Jade，實行雙管齊下，夫婦同時進補，為生B做足準備。
埋單3萬面不改容
不消半小時，貨品已堆滿一車，埋單逾3萬元，雖然兩大袋補品「重甸甸」，但Jade堅持自攜離開，絕無「唱片公司一姐」的架子。本以為Jade會趕開工，但她反而步行到對面的超市買生果及鮮花，最後她到景福珠寶買金飾，先研究約80萬元的龍形金飾擺設，再要求店員給她試戴約2吋闊的足金手鈪。Jade看見店內有BB金鈪時即雀躍地拿上手把玩，隨即扑錘碌卡買下一對，難道她希望生對龍鳳胎？
昨日記者致電Jade問是否買補品催生B？她說：「都講過我想生BB，但呢啲冇得強求，睇吓上帝會唔會畀我，順其自然啦！」問到家庭、事業兩兼顧是否很辛苦？她表示不苦，覺得做人老婆便要負上持家的責任。
音樂組
闊太Jade試戴金手鈪時盡顯貴氣。
細心挑選藥材的關心妍，對鹿尾羓的成分功效都細看一番。
為生B大出血的關心妍，親自拿兩大袋戰利品離去。
關心妍看BB金鈪時一臉凝重，似乎非常心急做阿媽。
留言列表
