卓韻芝拒被標籤：我唔係「性女」
早前爆出攬仔床照的卓韻芝認為性事本身並不污穢，她強調自己守身如玉，對於不少年輕人屢遭批評，阿芝力撐到底，並為他們發聲，希望外界不要標籤他們。
其實我唔係「性女」，我守身如玉，比較享受拍拖，估估吓同曖昧嘅階段最開心，都話我係鱷魚頭、老襯底，近期嘅「床照」亦只有咁多。依家啲人覺得後生仔女對性事開放，但以我所知就唔係，佢哋睇完我啲書會傳電郵畀我問：「唔知同唔同佢做愛好？我應唔應該畀佢？」佢哋有好多質疑，當然有人會好瘋狂，但仲有大部分人非常保守。性事本身唔係污穢嘅嘢，如果佢哋心裏面有好多禁忌同考慮嘅話，就千萬唔好畀，咁緊張就唔好搞。
我都算「80後」，唔鍾意啲人話依家啲後生仔女，大家知唔知呢個年代做嘢愈嚟愈艱難。喺咁嘅情況下，佢哋點可以用以前嘅自己，對比依家啲後生仔呢？啲大人實話後生仔冇用，但我從來唔會話佢哋冇用，我有句嘢在心中：「我唔係80後、唔係90後，我係我！」我唔係代表晒「80後」所有附帶條件，我唔鍾意標籤。
白羊座的盲頭烏蠅
我諗我代表咗某部分人心裏面想追求但唔敢追求嘅形象，佢哋見到你好自由同有自信生活，希望都有咁嘅機會，毅然離開最舒服嘅環境去試新嘢，有電台唔做去做棟篤笑。我唔係一個好有才華嘅人，只不過係一隻「盲頭烏蠅」，願意去衝，願意撞落塊玻璃度，佢哋話白羊座係咁，只要一個決定就不惜一切去跑。（全文完）
後記：開心芝大放正能量
經歷過幾年前的人生低潮後，卓韻芝重獲新生，臉上掛着自信笑容，她說：「我依家嘅成熟度係70分，唔想過分地成熟，好驚自己人生觀定實咗，唔能夠再郁，我想避免呢樣嘢，我想保持開放態度。」開心嘛？「開心，所以先想生小朋友拯救地球，要以倍數去生，發放多啲能量。」
口述：卓韻芝
筆錄：專案組
卓韻芝最近被拍到與老外新歡漫步街頭，非常甜蜜。
早前開騷的卓韻芝在眾目睽睽下抽鄭伊健水。
卓韻芝早前與半裸的白健恩合作，毫不尷尬！
留言列表
