無綫《宮心計》收視報捷，連隨開拍續集《公主嫁到》，而且因為飛起咗形象欠佳嘅鄭嘉穎，戲份順理成章落晒喺陳豪身上，而且加入咗靚女陳法拉做侍婢，同陳豪重有唔少對手戲，不過陳豪雖然有靚女為伴，睇落好似豔福無邊，但咪以為陳豪好過癮，佢喺戲中嘅角色係駙馬爺，經常俾刁蠻公主凌辱不特止，連陳法拉飾演嘅侍婢都經常對佢動手動腳，不過唔係抽佢水，而係打到陳豪變豬頭。
日前好姨喺美孚公園見到陳豪、陳法拉一行人喺度拍外景，當時正好係無綫總經理陳志雲被捕翌日，一班演員人人刨報紙新聞，重一臉嚴肅咁嘅樣，好姨都明白嘅，萬一笑咗出嚟，咪俾人話落井下石，重分分鐘秋後算帳添，陳豪都係寧願花時間同附近街坊傾偈拍照，原來陳豪唔止係師奶殺手，連小朋友都爭住同佢合照，粉絲層面咁廣，抵佢得到無綫力捧啦。 
陳豪對於嚟探班嘅街坊十分Nice，合照簽名完全冇托手爭。 
陳豪口花花撩女仔，不過唔好誤會佢為人，其實佢係同個小妹妹玩下啫。 
對於中女粉絲，陳豪一樣甚為識做，重請對方食零食。 
一班演員齊齊睇陳志雲被捕新聞，冇人敢露出笑容。
同場另一位女星陳法拉，雖然早排受到同諸葛梓岐嘅罵戰困擾，但係薛家落咗封口令之後，法拉對呢件事就提都唔想提，雖然法拉對早已下嫁男友薛世恆嘅傳聞採取「既不承認，也不否認」嘅態度，但有男友痛錫嘅佢，心情梗係勁靚，拍攝當日只要一停機休息，法拉就急急打電話同男友煲電話粥，不過法拉雖然係豪門少奶奶，但佢對工作就非常認真，重不時喺劇本上做筆記，呢種咁認真嘅工作態度，真係值得唔少圈中小生花旦學習。 
陳法拉不停喺劇本上做筆記，唔止有靚樣重夠晒勤力認真。 
法拉係停機休息時，即打電話同男友薛世恆煲電話粥。 
《公主嫁到》嘅劇本畫咗勁Cute嘅公仔，幕後人員原來都幾幽默。 
法拉與陳豪各自心有所屬，所以拍戲咁耐雙方都未傳過緋聞。
留言列表
