上個禮拜四（11日），米雪連同尹佬嘅生前好友，一齊去到灣仔修頓球場舉行第二次紀念尹佬嘅足球賽。由於上次紀念賽米雪未有露面，所以今次佢一出場就成為全場焦點所在。但原來唔單只傳媒朋友係咁諗，就連尹佬嘅摯友都係咁諗，大家當日爭住輪流問候米雪，好似明星足球隊成員兼前南華領隊李潤華、體育主持蔡育瑜等等，都全程守候住米雪側近，似係擔心米雪會觸景傷情。
結果，就因為大家都好關心米雪，所以米雪身邊積聚嘅人群越嚟越多，甚至有人因為過於熱心，想俾啲溫暖米雪，所以連換衫都唔記得走開一邊避忌下。但始終男女有別，遇到咁嘅情況，搞到米雪都有啲愕然同尷尬，所以米雪最後無奈自己行開下，避避風頭。
但其實米雪比大家想像中堅強，而佢似乎亦己經走出咗尹佬離世嘅陰霾，因為當日佢可以面帶微笑，面向幾百個球迷，同大家一齊以1分鐘拍掌方式來悼念尹佬，之後球技麻麻嘅佢，重唔介意「獻醜」，落場同尹佬父親主持開球禮，而離開前，米雪重同球迷揮手道別。見到米雪姐堅強嘅一面，好姨都不禁要講個「服」字！ 
尹佬生前好友似乎過於熱心，輪流問候米雪嗰陣，連換衫都唔記得行開一邊避忌下，搞到米雪都顯得有啲愕然。 
其實米雪比大家想像中堅強，而遇到尷尬情況，佢都主動行開一邊，避避風頭。 
當日，大家都好擔心米雪，好似明星足球隊成員兼前南華領隊李潤華咁，都不時陪伴米雪，同佢聊天解悶。 
當日米雪不時笑臉迎人，重面向幾百球迷，主持「拍掌1分鐘」悼念儀式，似乎已經走出咗尹佬離世嘅陰霾。 
球技麻麻嘅佢，重唔介意獻醜，同尹佬父親落場主持開球禮。 
其後，李潤華（右起）、蔡育瑜及施建熙重致送一隻寫有「永遠懷念你」嘅銀碟俾米雪，向尹佬致上最後敬意。 
全站熱搜
留言列表
