快週刊 609期黎姿急移澳洲保孖胎入住億元產宮 @ 明星靚相大分享☆

封面故事入住億元產宮黎姿急移澳洲保孖胎

去年10月，黎姿傳豪擲30萬接受人工受孕成功陀孖胎後，一直深居簡出專心休養，據知，原計劃在港待產的她，經歷之前沙塵暴襲港之憂，現居半山蘭心閣寓所外又進行修路工程恐不利胎兒，在高人指點下準備移居澳洲悉尼，入住夫婿馬廷強價值逾億港元的10萬呎莊園豪宅，安心待產。

億萬莊園有指黎姿移居澳洲後，將入住老公價值逾億港元的豪宅莊園，靜待小生命降臨。

更有最新消息指，黎姿腹中孖胎初步檢測是龍鳳B，倘陀第一胎就有男有女湊成一個「好」字，「黎珈而」可以收工咯！

去年初，黎姿閃電宣佈結婚下嫁富商馬廷強，從 TVB當家花旦搖身一變成為豪門闊太，更揚言最少生三個，全力為馬家繼後香燈。

擇日植胎
無奈歲月催人，眼見已屆38歲高齡，為求盡快榮升媽咪，黎姿傳於去年中開始嘗試接受人工受孕，當時本刊曾發現她巨肚出巡，但當事人事後否認有喜，原來係人工受孕食詐糊，據傳，黎姿總共經歷過兩次失敗，終在高人指點下成功。

「之前試過兩次都唔得，雖然醫生話係正常，因為佢年紀唔細，相對成功率會低啲，但GiGi自己就好心急，有人再請教『改名』高人幫手，為佢擇咗個吉日做手術，唔止成功，仲整個孖，高人真係好勁！」知情人稱。

風水法寶
為生仔黎姿可謂出盡法寶，不單被指於家中佈下求子風水陣，更請高人將名字由「姿」變「珈而」，新名共有33畫，大利子女運及夫妻運，兼有「加兒」的諧音。據傳今次僅花30 萬手術費就連中兩元，果然厲害。

風水奇陣一直有傳言指黎姿於蘭心閣家中佈下求子風水陣，唔夠一年就有喜，個陣又幾靈。

自從有喜後，貴為高齡產婦的黎姿幾乎絕跡公眾場合，直至上月中待胎兒穩定後，才與老公到日本暢遊五天慶功，就連有喜消息亦只係透過好友樂易玲等人發放，貫徹低調作風。

傳龍鳳胎
而話咁快黎姿已懷咗六個月身孕，預產期最早係六、七月，據知，早前黎姿照4D超聲波，初步顯示腹中係龍鳳B。

「GiGi本身鍾意囡多啲，老公就鍾意囝，今次一次過滿足晒兩個願望，佢哋全家都好開心，不過GiGi就話唔夠，最少要生多個，兌現生三個嘅承諾。」知情人續稱。

寓所修路
本來為免舟車勞動，黎姿計劃留港待產，不過之前香港經歷沙塵暴吹襲，雖然足不出戶，但心情難免受影響，尤甚者係半山蘭心閣寓所外正進行修路工程，動土恐不利孕婦，而且寧靜受擾，環境變差，難免令人擔心。

不利孕婦蘭心閣外正進行修路工程，恐會影響風水，尤其對孕婦不利，難怪黎姿想搬。

「佢哋見香港嘅空氣愈嚟愈差，都擔心會影響BB，到早排出面整路，GiGi即刻想搬去酒店暫住，高人話蘭心閣今年犯三煞，依家再加上整路，不宜孕婦居住，建議佢過澳洲生，嗰度會利 GiGi個胎多啲。」知情人透露。

據知，為方便老婆，馬廷強一早已預訂舊山頂道嘉諾撒醫院的頂級豪華產房，作黎姿生BB之用，埋單最少過百萬，但如今只好改Plan B。

移居澳洲
其實結婚之初已有報道指黎姿將會移居澳洲，徹底告別娛樂圈，兩人婚禮亦於當地教堂舉行，大宴親朋，之後才回港補擺喜酒，但由於當時黎嬰情況尚未穩定，黎姿為多點時間陪伴胞弟，令移民一事不了了之。

翻查資料，馬廷強旗下的「寶蘭實業有限公司」，在澳洲業務覆蓋房地產、醫療及金融等等，市值逾億元，單是馬生名下在澳洲便擁有多項物業，當中位於悉尼小海灣區的莊園豪宅，面積達10萬呎，價值逾億港元，正好可留作黎姿安胎之用。

澳洲安胎老公旗下業務主力集中在澳洲，連兩人婚禮都喺嗰邊搞，今次要過澳洲安胎，話咁易啦！

「高人都咁講，佢哋梗係信啦！依家等馬生搞埋少少手尾就會陪GiGi過嗰邊安胎，講真佢哋兩個都鍾意低調，喺香港好難完全避開傳媒，所以生完之後，可能索性留喺澳洲長住，GiGi仲諗住接埋細佬過嚟休養，轉換咗環境希望對佢好啲。」知情人稱。

保安嚴密馬家一向低調，黎姿自入門後，為保安全試過有多名保安護駕。

傳媒騷擾雖然經已退出娛樂圈，但黎姿無論去到邊都受到記者追訪，不勝其煩。

Book定產房
而馬廷強已訂了當地鄰近馬家大宅的皇家阿弗雷德王子醫院（Royal Prince Alfred Hospital），醫院離寓所約只有20分鐘車程，RPA更屬全悉尼規模最大兼產房設備最完善的醫院，生仔全包宴僅需約20萬港元，比香港平一大截。

有錫自己的老公，又即將達成做媽咪的心願，咩叫幸福少奶奶？黎姿就係最佳答案。

恩愛夫妻黎姿同老公唔止暢遊日本，未有B之前仲成日結伴出街食飯，大晒恩愛。

澳洲大旺
到底過澳洲生仔係咪好啲？本刊請來玄學家程仲蕎師傅幫手算一算，得出大吉答案，「澳洲屬火，為黎姿八字喜用之地，唔單止有利子女宮，亦會帶旺丈夫投資運，相比佢住嘅蘭心閣，今年犯三煞，動土更不利孕婦，澳洲好得多。」

而對於黎姿生唔生到三個，程師傅話冇問題：「佢依家行緊嘅大運係傷食生財，只要佢想生，生到42歲都OK！」

玄學家程仲蕎師傅

家庭醫生關嘉美

幸運之神
本港現有兩種人工受孕的方法，一是「體內受孕」，而另一種則是「體外受孕」。「體內受孕」是以導管運送精子到子宮腔內，以協助懷孕，而「體外受精」則以手術將卵子抽取，並先與精子結合培育為胚胎，然後才把胚胎植入至母體內，讓之成孕。

初現大肚去年中，本刊發現黎姿大肚Look遊街，原來當時她已進行人工受孕，可惜未竟全功。

而以胚胎植入成孕之方法，通常每次會植入兩個，如其中一個胚胎不幸夭折，還有另一個頂上，家庭醫生關嘉美表示，如植入了兩個胚胎，兩個均成孕，簡直是幸運之神的眷顧，她說：「呢個方法最後能否成孕，其實都好講身體狀況，同埋真係要趁嫩做，一次唔得，仲可以做第二次。好似黎姿呢個情況，其實真係好好彩，醫生植入兩個胚胎，只不過係本着多一個機會令成孕機會增加，而兩個都成功，簡直係幸運之神眷顧。」

稱職人妻婚後黎姿不僅完全告別鎂光燈，仲積極學做煮婦，多次被發現去買?學做煮飯婆。

家庭為上黎姿出名顧家孝順，當細佬出事時，佢就日日同父母到醫院探細佬。

關係和洽黎姿唔止同老公恩愛，同男家關係亦十分好，不時被發現全家出動舉行家庭飯局。

完成心願講得出做得到，婚後黎姿承諾努力追B，如今一陀就陀孖胎，實在可喜可賀。

澳洲休養雖然黎嬰病情係好好多，但早前記者發現黎媽媽幫佢買尿片，所以黎姿希望帶細佬過澳洲休養。

逐漸康復自07年車禍後，經歷多次手術，黎嬰身體開始逐漸好轉，最近仲可以坐輪椅出街添。

生意轉好在黎姿出錢出力下，黎嬰的皮膚中心生意已逐漸好轉，早前更有指未來可能搞上市。

做生招牌黎姿出名錫細佬，為幫黎嬰索性做埋生招牌，幫皮膚中心拍廣告。

有錢未必有用
雖則話現今醫學發達，只要有錢可以搵代母，又可以接受人工受孕，生仔全冇難度，無奈近年娛樂圈卻不斷湧現追仔族，有人追咗十幾年都係得個桔，黎姿真係好幸福嘅。

劉嘉玲梁朝偉
為傳宗接代，兩人於08年拉埋天窗，可惜之後一直冇下文，最近更有指44歲高齡嘅嘉玲，狂打排卵針都搞唔掂，終於決定順其自然放棄強求。

李嘉欣許晉亨
同樣係08年結婚，嘉亨一樣咁大鑊，雖然嘉欣話生唔生都冇所謂，但繼早前發表代母論後，最近又有指佢決定去美國嘗試人工受孕。

關詠荷張家輝
雖然已有一女，但關詠荷仍未放棄為張家繼後香燈嘅心願，最近當被問到會否考慮人工受孕時，張太好大方咁話：「等我攞啲資料睇睇先。」

郭藹明劉青雲
結婚12年，劉生劉太一直追唔到B，早排仲傳出係因為青雲身體唔得，要靠中醫調理身子，及後又有傳兩人轉睇西醫，但一切仍在努力當中。

外地安胎族
為逃避神通廣大嘅狗仔隊，同香港嚴重嘅空氣污染環境，唔少女星選擇到外地安胎，靜待新生命出世，順便為子女攞埋當地居留權，一舉兩得。

梁洛施加拿大
自從到美國讀書後，Isabella逐漸淡出娛樂圈，及至去年4月突然誕下囝囝李長治，驚動全城，在當地調理身子後，早前Isabella回港見老爺，最近仲傳出再度有喜的消息。

王菲內地
96 年同竇唯奉子註冊結婚，自此王菲一直留在北京安胎，期間多次傳出老公偷食消息，翌年1月竇靖童出世，吸引大批傳媒湧上北京追訪，至99年竇王終於宣告離婚。

呂麗君英國
早前被指打入冷宮敗走英國，實情原來呂麗君係要避開傳媒安胎，及至胎兒穩定後，呂麗君陀住4個月肚返港，又去Shopping，又同大劉食飯，繼續開心正印遊。

趙薇新加坡
去年底宣傳電影《花木蘭》後，趙薇突然人間蒸發，之後被踢爆秘赴新加坡待產，更被拍下大肚照，雖然有指佢將會母憑子貴嫁入豪門，但最近卻不斷傳出豪門夢碎的報道。