《波斯王子》打不死，早兩日又出新系列。新一章《遺忘之砂》（Prince of Persia：The Forgotten Sands）就將故事設定在03年《時之砂》（The Sands of Time）之後嘅背景，波斯王子再次掌握到「時之砂」嘅奧義，可以在瀕死時倒帶回魂之外，最有趣係加入自然魔法，能將水點短暫凝結、把水柱變成單槓或者令瀑布變成冰牆！
今集一開始就講述波斯王子完成了Azad嘅冒險之旅前往探望兄長，點知發現兄長的王國被怪物圍剿，為咗拯救國家同兄長，又要再次使出時空力量完成任務。 玩得《波斯王子》都預咗要有體操運動員嘅身手，隨時在城牆之間跳來跳去，一時在牆上奔跑，一時又要好似玩單槓咁作大幅度跳躍，加上落腳點有時都幾隱蔽，一唔小心就好易係咁先。大家玩到中後段會見到好多噴泉或者瀑布之類嘅場景，感覺好似走投無路，呢個時候就要配合新加入嘅4種自然魔法幫助過關。好似使用水魔法時，可以於令到水柱或瀑布暫時結冰，變成支撐點畀大家借力跳出重圍，但當中嘅時間性唔係咁易掌握，各位預咗有排練。除此之外，玩家仲可以使出火魔法遠距離燒死怪物、以土魔法造出護身牆、或者用氣魔法彈開身邊嘅敵人，玩落又幾過癮。 開發小組更將遊戲「無雙」化，怪物唔再係零星疏落地出現，而係成群結隊一擁而上，經常要以一敵百。雖然主角被怪物攻擊時會扣血，太高跳落地又會跌死，不過今集波斯王子可以用上「時之砂」，時光倒流到遇險前的一段時間，但次數有限，要慳住使。跟以往一樣，遊戲設有大量機關，解謎成分相當重，要花唔少精神去拆解。另外，每關頭目亦依舊相當難打，大大隻又身手敏捷，硬碰注定冇好結果，記住要用腦先有機會打低怪物同拯救國家！ 查詢：2725 3338
睇吓03年《時之砂》年代嘅波斯王子造型，就知道依家嘅機能進步咗幾多。
借助四大魔法脫險
飛簷走壁係遊戲嘅指定動作，難度分唔高。
被逼埋牆角時，可運用土魔法暫時阻隔敵人。
今集都幾有「無雙」Feel，隨時有幾十隻怪物齊齊招呼你。
「時之砂」要慳住用
將瀑布凝結變成冰牆，就可借力跳出去。
裝飾用嘅噴泉可以變身成欄杆，但記住凝結時間有限，玩單槓時唔好三心兩意。
使出氣魔法將身旁所有怪物彈開，似出超必。
遊戲檔案
類型：動作
開發：Ubisoft
平台：Xbox 360、PS3
售價：$359（Xbox 360）$388（PS3）
留言列表
