明星靚相大分享☆

黎耀祥由舊年拎視帝開始，一直幫一家超級市場拍咗一個系列嘅廣告，舊年嗰輯同個仔拍檔，今年兩輯就同太太 Julia合作，今次佢兩公婆夫妻檔接廣告搵銀，價錢應該唔錯，祥仔笑住話：「我只係加少少，冇乜特別傾，我覺得拍呢一系列廣告嘅意義大過錢，對屋企人嚟講，係一個唔錯嘅回憶，第時一齊睇番都幾得意，亦可以等我老婆知道吓拍嘢有幾辛苦！」 Julia即刻詐嬌話：「我知辛苦，我覺得今次第二輯拍得好好多。」

專掃紅酒慳番唔少 放大圖片

祥仔兩公婆（中）同 o靚模及肌肉男玩遊戲，一早商量好對策，專攞貴價紅酒，最後贏埋。

除咗廣告有錢收，噚日祥仔同 Julia喺寶琳做宣傳時仲即場玩咗個比賽，佢兩公婆同 o靚模隊、肌肉男隊比試用一分鐘時間鬥掃最多貨，最後祥仔兩公婆合力智取紅酒，贏得冠軍，仲攞走總值八千幾蚊嘅貨品，祥仔話：「我哋一早商量好，第一時間專攻紅酒，呢個月又多慶祝活動，拎紅酒就最啱！」 Julia掃貨不忘囝囝，佢話：「我哋飲紅酒，個仔都有份食薯片。」

怨時段差影響收視 放大圖片

小儀做主持都交足戲，見到同場有肌肉男，仲提議搬埋自己等佢哋拎返屋企。

《巾幗梟雄之義海豪情》成績中規中矩，祥仔仍然打算請食飯慰勞台前幕後，佢話：「一定要請，家掃咗咁多紅酒可以慳番唔少酒水，個劇收視係冇辦法，八點半播真係一個困局，好多人都趕唔切返屋企睇，不過聽聞網上點擊率爆燈，有成過百萬，出面口碑又唔錯，惟有希望大結局喺星期日播時大家會支持，可以打破《大長今》嘅紀錄，大家一齊創造一個完美嘅結局！」


祥仔人氣急升，仲帶挈老婆 Julia拍廣告，兩公婆有銀齊齊搵。