生完孖女唔再追馬廷強專訪：黎姿好辛苦壹週刊 1064期－明星靚相大分享☆

去年10月有喜的黎姿，本週六（24/7）在舊山頂道嘉諾撒醫院開刀誕下一對孖女，雙喜臨門，護妻情切的馬廷強接受本刊專訪，開腔親述有感老婆佗B辛苦，暫無意再追。
「佢係個賢妻，同我結婚咁耐，做足晒老婆本分，對細佬同父母亦照顧得無微不至！」馬廷強大讚老婆黎姿，做足滿分！
有富豪老公錫到燶，加埋一對金笸籮，黎姿名副其實係幸福少奶。

仔女無所謂
婚後一年半，黎姿成功做咗媽咪，打孖生了一對孖女，大孖體重六磅多，細孖體重三磅多。
「其實喺四月，黎姿照超聲波時，已經知道孖B係女，佢兩公婆都無失望，因為佢哋覺得咁快可以有自己小朋友，係天賜俾佢哋！只要BB可以健健康康成長，仔女都無所謂！」黎姿身邊人說。
黎姿分娩後，丈夫馬廷強接受本刊記者電話專訪，對於這位太太，他讚不絕口，還公開承諾要為太太建立一個幸福家庭。
壹：有冇去產房陪太太生BB？
馬：我冇入產房，因為黎姿要打麻醉針，加上我揸住枴杖，唔係好方便，所以留喺產房外邊等，佢生完BB，喺手術室出嚟，我就即刻去睇佢。
壹：老婆幫你生對孖女，有冇覺得佢好偉大？
馬：我唔敢講佢好偉大，因為生兒育女對好多女性嚟講係天職，不過佢一定係個賢妻，同我結婚咁耐，做足晒老婆本分，不但只照顧得我好好，對細佬同父母亦照顧得無微不至，名副其實係個好女人。

相士改名
馬廷強說，老婆黎姿屋企本來係大富之家，但阿爺有兩房太太，黎姿阿嫲係二房，黎爸排行第九，到阿爺過世時，已經冇乜可以剩到給他們一家。黎姿十五歲出身拍電影養家，搵錢供養父母，對細佬供書教學，等到細佬有少許成就，總算可以鬆一口氣，點知又出事故（交通意外），這種打擊，並非人人都捱得住。
壹：咁而家佢（黎姿）可正式收山，專心做家庭主婦。
馬：我同得佢結婚，就要好好對佢，俾佢一個幸福家庭。見到佢對家人咁照顧，就知道佢會係個好媽媽。一般剖腹產婦要兩日先可以落床，但佢唔夠廿四小時就即刻落床睇BB。我幾十歲人先搵到一個咁好嘅女人，一定會好好珍惜。
壹：會唔會再追？
馬：暫時唔會諗！佢今次佗對孖女好辛苦，唔想佢咁辛苦，都係抖吓先！
壹：BB改咗名未？
馬：仲未，想等BB大個啲，性格出咗嚟，先再改個適合嘅名。
壹：會唔會搵相士幫手？
馬：我都識好多相士，到時都會睇吓點配合金木水火土，先幫佢哋定個名嘅。
壹：老婆幾時出院？
馬：要醫生決定，不過細孖仲要瞓箱（氧氣箱），等到足五磅先可以出院。

產後面尖尖
預產期在八月的黎姿，與老公馬廷強其實一早商議好採用剖腹分娩，為免孖B作動時要順產，對卅九歲的黎姿較為吃力，馬廷強一早book定嘉諾撒醫院頂級產房，七月底迎接小生命。
「馬生為人低調，為咗唔想俾傳媒追踪，BB出世日子，佢哋一直守口如瓶，只係同親戚同幾個要好朋友講！入院前夕，黎姿仲請咗幾個朋友去佢屋企食飯傾偈，等心情輕鬆啲。佢喺廿四號凌晨先入院，馬生仲搵人預先去醫院視察，等啲傳媒收晒工先出發。」知情者說。
由於懷有雙胞胎，加上要返美容院工作，黎姿產前體重高達一百八十磅。
「嗰時佢只係水腫，醫生都話個肚好多都係水，生完好快會輕番，依家生完BB，佢真係無乜點肥，連個樣都係面尖尖，我哋都笑佢得天獨厚！」黎姿好友說。
BB要提早開刀出世，大孖體重已有六磅多，但三磅細孖則要瞓氧氣箱。
「通常孖胎都會輕啲，體重有距離亦屬正常，其實一路照超聲波，都知細孖體積較細，不過醫生話係正常唔使擔心，依家細孖得三磅幾，所以出世之後都要瞓氧氣箱，醫生建議俾BB住院三個月，視乎進度，等BB女體重去到五磅先出得院！」知情者說。
孖女健康出世，馬廷強親自在醫院向傳媒公布喜訊，由六人保鑣開路，初為人父的他，笑到見牙唔見眼。

送澳洲大屋
翌日（廿五日）中午，馬廷強再現身醫院，更帶了不少老婆喜歡的食物慰勞太太，廿四孝老公。「休息咗一晚，黎姿胃口好咗，不過，因為依家每兩個鐘要餵一次人奶，所以佢比較攰。」知情者說。
當日下午四時，黎姿父母亦帶備靚湯到醫院探望寶貝女及兩個孫女。一直希望盡快探家姐的黎嬰，因為醫院門外有太多傳媒，未有現身。
「佢細佬好想去醫院探家姐，又想快啲睇吓BB，但醫院咁多記者，為免混亂暫時都唔會去，不過黎姿生完BB，都有第一時間打電話俾細佬，同佢傾偈！」黎姿好友說。
○八年底息影宣布下嫁馬廷強，為馬家開枝散葉歸於平淡，馬廷強除了一擲七千萬買下蘭心閣送給愛妻，更先後再贈送遊艇及一個澳洲豪宅。
「黎姿最感動，都係馬生打本擴充細佬間美容院，馬生對佢家人一樣咁愛錫，雖然BB啱啱先出世，但佢已經講話希望三個月後可以返美容院，對細佬盤生意，黎姿真係緊張！」

有得揀
據知黎姿以人工受孕成功懷孖女，其實人工受孕在香港十分普遍，不少公立醫院如瑪麗、廣華及威爾斯均有為不育夫婦提供此服務。香港大部分私家醫院也有人工受孕，但由於香港、英國、澳洲及大部分歐洲等國家，基於宗教、人權及醫學操守等原因，均有法例規定接受人工受孕的父母，不能選擇BB性別。
家庭醫生關嘉美醫生說：「只有美國部分地區及泰國等地可以選擇性別，去泰國最好，乜都可以揀，收費便宜但設備落後啲，客人要承擔風險。」

孖女使費
三十九歲的黎姿屬高齡產婦，剖腹產孖女使費超過百五萬，三磅的「細孖」更要留院三個月，住到有五磅幾才能出院，條數好襟計。

人工受孕植入胚胎3次（每次$10萬） $30萬
嘉諾撒醫院產科病房20日（每日$5千） $10萬
3磅細孖瞓加護病房3個月（每日$3千） $27萬
手術費、麻醉費、藥費等 $40萬
儲臍帶血 $12萬
陪月兩個（每個$2萬） $4萬
看護兩個（每個$3萬） $6萬
參茸燕窩補品 $30萬
共約：$159萬

家道中落
黎姿祖父是香港電影之父黎民偉，老牌演員黎萱是其姑母。出生大戶之家，但自從嫲嫲死後，黎父因患上腦膜炎導致耳朵只有三成聽力，更遭其他兄弟姊妹欺壓，不獲分家產，持家重擔落在靠開貨車養家的黎母身上。黎姿十三歲，許冠傑在健身室認識了黎父，得知他有個漂亮女兒，於是推介她到電影公司試鏡做臨時演員，處女作是《開心鬼放暑假》，當時靠着黎姿兼職的收入，才有能力供胞弟黎嬰讀書。

八六年，黎姿十六歲結識了大她二十年的黃玉郎，九一年黃因詐騙罪入獄，雙方感情告一段落。及後，黎姿在十八歲與大她九年的許晉亨亦有過一段情。
不乏裙下之臣的黎姿二十歲已作歌、影、視發展，九三年她以玉女形象進軍樂壇，一曲《白恤衫》為人熟悉，曾獲多個頒獎禮新人獎。九○年起，她主力參與電視演出，作品包括《倚天屠龍記》、《新楚留香》、《O記實錄II》、《武尊少林》及《我愛牙擦蘇》等，電影方面拍過《獄中龍》、《戀戰沖繩》、《小李飛刀之飛刀外傳》、《九星報喜》、《97家有囍事》及《倚天屠龍記魔教教主》等四十多部，九六年在電影《古惑仔》系列飾演的細細粒，令人留下深刻印象。
○三年，黎姿與「東方報業集團」創辦人之一，馬惜如的兒子馬廷強同遊倫敦，戀情初曝光，她同時重返電視圈，O四年憑《金枝慾孽》奪「最佳女主角」及「我最喜愛的電視角色」成雙料視后。其後獲力捧拍《妙手仁心III》、《胭脂水粉》、《火舞黃沙》、《寫意人生》及《通天幹探》等劇集。

一直擔家的黎姿，對胞弟更是全力栽培，終有所成，成為皮膚科名醫，可惜好景不常，黎嬰在○七年遇到嚴重車禍，一度危殆。○八年黎姿宣布拍完《珠光寶氣》便退出娛樂圈，專注照顧弟弟及代打理其診所。至去年二月，黎透過TVB向外宣布嫁給拍拖六年的富商馬廷強，至今誕下孖女。

愛妻誕下一對孖女，馬廷強每次現身都有問必答，十分友善。

09年1月，黎姿與富商馬廷強在半島酒店連擺兩晚喜酒，宴請男女家親友。

25號下午四時，黎姿父母帶備靚湯探寶貝女。

傳媒長駐守候，馬廷強由六人保鏢開路，日日到醫院探老婆。

孖女出世一天，好友蔡加敏已急不及待到醫院探望。

馬廷強為在醫院等候的傳媒，準備西餅及飲品。

上月初，黎姿撐住180磅巨肚返細佬美容院坐鎮，馬廷強出動看護及菲傭貼身照顧。

拍《珠光寶氣》時，細佬黎嬰遇上車禍，黎姿仍撐住為劇集埋尾。（《忽然1周》圖片）

07年台慶頒獎禮，黎姿奪「內地觀眾最喜愛TVB女藝人」獎。

黎姿為栽培胞弟黎嬰（左一）成才，花盡心思，二人感情要好，未發生意外前，不時孖住出席活動。

黎姿出道不久已經迅速走紅，直至決定做馬廷強太太及專心照顧黎嬰，才甘於放棄事業。