我問廿二歲的「浸大E神」楊梓瑤（Carol），小時的志願是甚麼。

「唔……做一個成功人士啦。」

選港姐呀？據資料顯示，○六年港姐冠軍陳茵媺和還未過氣亞軍李姿敏，參選時的志願都是「成為成功人士」。

Carol心目中的「成功人士」，形象是如此的。

「即係類似係着suit去傾生意嗰啲。」這天Carol也穿了suit，但前面有個swim字。而我也想和她傾生意，可惜生意這一門，我懂個屁。

現身方健儀主持的《晚間新聞》又算不算成功？差一點，因為只播了胡心諾和周秀娜的訪問。

「期望都係賣好本書先，可以加印加印再加印！

「出書唔係一個目標，只不過係踏腳石。因為出完本書如果成功嘅話，多啲人識，就可以做多啲job，咪可以賺多啲錢養家囉。除咗有錢人之外，都冇人會唔等錢使。」

我也等錢使，但我既不是靚女，也沒有E cup，穿suit又好，swimsuit又好，也該賺不到甚麼。我肯定，本錢多多的Carol很快會成為成功人士。

縮胸代言人

Carol澄清，她其實沒有E Cup，只是D Cup，所以「浸大E神」名稱不甚準確，大家最好改口叫她「浸大咪神」。之前仍在讀副學士時，被人狠抨她扮大學生。

「副學士冇得當大學生o架喎，出面啲人插到飛街！」

今年九月正式入讀學位課程，堂堂正正做個大學生。這位大學生咪神，身材十分驕人。

「夠喇吓嘛？順其自然啦！由細到大都想着多啲型嘅衫，依家好麻煩，好多局限，如果有咩縮胸代言人可以搵吓我！縮一個cup，有啲玲瓏浮凸，又着到啲型衫就最好，如果再瘦啲就仲好。

「細個好肥o架，都用咗好耐時間去減，最肥係十七至十九歲，肥到百二磅，着廿七廿八褲頭，肥o架！報紙咪登過囉，pizza面吖嘛！為咗瘦，乜都唔食呀，淨係食烚菜，唔食油呀、鹽呀，又各種減肥藥呀，無論內服外敷都試過！畀人摷番pizza面啲相，我依家都唔知幾自豪呀！

「如果有男朋友叫我去減肥，我會叫佢bye bye，叫女朋友整容隆胸減肥嗰啲，飛咗佢啦！我身邊朋友有好多男朋友都會咁講，佢只不過鍾意一個fantasy。」

到《超級遊戲獎門人》作客，與同是有料之人的黃婉曼同場，問Carol有否交流養顏或養生心得？「冇喎，全程拉高衫領，因為唔同team，玩嘅時候就碰面，冇點樣傾到偈。」

未被叫做「浸大E神」前，Carol（左一）到《美女廚房》做美少女廚神，隔鄰的對手比她更低胸。

被禁止舉行簽名會，易容入場避過保安耳目，再以真身宣傳，效果一樣。

豬乸會上樹

娛樂圈，何嘗不是個fantasty？Carol一直視這個fantasy只是part time job。

「唔誇張就冇嘢寫，現時全力做好呢份job，我返咗學之後都係一份part time嚟嘅啫，順其自然啦，因為太多新面孔，人咁貪新鮮，人係一定要新鮮感，單靠外表唔會last得耐，一定要讀書o架喇，我唔會志在呢一刻所賺到嘅嘢，因為可能last一兩年。讀完書幫自己買完個保險，我真係想喺呢行發展就返番嚟，就算唔得我都有學歷可以搵一份工，女仔梗係要幫自己打算，男人靠唔住！男人靠得住，豬乸會上樹！哈哈！呢個年代太多唔爭氣嘅男人，好似我細佬咁，二十歲都仲咁鍾意玩online game，又唔讀得書又鍾意玩，冇辦法！算啦，費事踩佢！」

做part time可以做到像Carol般狂上娛樂頭條和雜誌封面，似乎比不少同年紀少女優勝。

「嘩，唔敢講，都係搵餐飯食啫！講真一個女仔都唔鍾意人地focus落去身材。呢個係踏腳石、播種期，其實都希望自己可以更上一層樓，你去見工，冇經驗，冇可能第一個職位就做manager，點都由低做起o架。」

這位娛樂圈小職員，推出的寫真集《HUGE》，啜意粉玩冰粒扮除bra半裸全裸……樣樣皆齊，絕對是話題之作。

「好底線o架喇！都係為件事靚嘅，要大家信任，大家覺得嗰張相靚嘅就做到嗰樣嘢。如果諗住做一樣嘢，梗係去到盡、做到最好，如果有保留不如算啦！

「有心理關口o架，說服咗自己一段時間，好簡單，take it or leave it。你揀咗take it嘅時候，你就要全力以赴去做好嗰樣嘢啦，你冇可能臨埋門先話唔得，咁就成班人畀你蹺起。本寫真集係影你，但冇側邊個班人本書唔會成事，你一個人話唔得就成班人棟喺度O咗嘴。」

有錢的定義

Carol可以說是當代八十後的人辦，說話時予人的感覺，和我見慣的一般藝人分別很大，年代真的不同了。幸好，她也承認，貪玩的Carol已是歷史。

「以前硬係覺得有人會幫你執手尾，做咗先算，但係依家人大喇、老喇，做嘅每一步牽涉唔止自己，仲有身邊嘅人，因為自己太多角色，人愈大角色愈多，所以顧慮嘅嘢多咗。我諗每個人都會試過貪玩，貪玩過咗咪要認真囉！冇可能成世都要人哋執手尾o架嘛！

「中二、三成績最差，反叛期吖嘛，跟住啲成績都OK，但都升唔到中六，會考成績唔OK囉，得四分咋嘛。我任性到諗住出嚟做嘢，儲幾年錢就去讀arts school。儲儲吓儲個桔！原來出嚟做嘢，又要食又要着，有時同啲同事玩吓食吓，都儲唔到！」

推出寫真集，踏進娛樂圈，緣份到時嫁個有錢人，便不用怕儲不到錢吧。

「吓？有咁嘅需要咩？人各有志囉，我依家都有拍緊拖，有冇錢其實好虛無飄渺，咩叫有錢？你家族有錢定係你自己有錢？你家族有錢唔代表你有錢，你家族有錢唔代表你有能力搵錢，有錢呢樣嘢太空泛喇，咩叫有錢啫？揸部林寶叫有錢吖？定係揸部Maserati叫有錢先？唔同囉，我覺得有冇錢都好，最緊要有上進心，一個人冇上進心根本唔會去fight你自己嘅將來。我自己鍾意嘅人一定要有上進心，有冇錢都係其次，有上進心，就算冇錢都一定會令自己生活過得好。」