大孖試食人奶唔成功黎姿飲魚湯谷奶忽然1周 783期 @ 明星靚相大分享☆

去年花30萬成功植入胚胎的黎姿（Gigi），上周六（24日）在舊山頂道嘉諾撒醫院剖腹誕下孖女，丈夫馬廷強當晚9時即公布喜訊，其後更表示黎姿佗B好辛苦，決定暫時唔再追。
據知產後仍重150磅的黎姿堅持親餵人奶，由於奶水不夠，因此6磅幾的大孖雖然已試啜人奶但唔成功，最終要和3磅幾的細孖一齊飲醫院奶粉。周一（26日），兩名護士便在育嬰室抱着疑似黎姿孖女食奶，B女眼仔碌碌，相當趣致。
據知黎姿現時每日狂飲魚湯，務求盡快谷奶，滿足兩女需要。馬廷強見老婆咁辛苦，除公開大讚黎姿係賢妻外，仲話佢要咩都會送，錫到燶！

39歲的黎姿去年懷孖胎，為令老婆安心，老公馬廷強一早訂定舊山頂道嘉諾撒醫院豪華私家病房。
由於黎姿產前體重高達180磅，主診醫生何永超曾提議提前於6月底剖腹，不過最後因為胎兒太細，又不是吉日而延至7月24日開刀。

擇日開刀旺馬生
知情人士透露：「Gigi產前個肚過大，本來book咗6月底開刀，但之後醫生話其中一個BB體積好細，早生會冇咁健康，馬生希望可以足月先開刀，最後佢搵咗高人揀咗7月24日夜晚7點呢個吉時做手術，聽講呢個吉時好旺馬生。」上周六（24日）早上，黎姿在老公馬廷強陪同下秘密入院，為了令愛妻免受騷擾，馬生更豪花近60萬請約28名保鑣，分三更輪流守醫院，相當大陣仗。黎姿生產前馬生一直陪她傾偈減壓，直到6時許，黎姿準備推上手術室前，二樓病房氣氛突然變得緊張，約10名保鑣齊集在黎姿的病房前，其餘幾名則留守在電梯口、主要通道及三樓手術室。6時45分黎姿的主診醫生何永超為她進行產前檢查後步出病房，馬生亦坐上醫院輪椅陪黎姿上三樓手術室，這時保鑣表現得更緊張，其間更有保鑣向病房內的人大叫：「記住拎攝錄機呀！」

醫生：大細孖大細孖爭營養
婦產科專科醫生靳嘉仁表示，一般雙胞胎出生時嘅體重差10%至20%屬正常，「如果兩個BB相差成50%咁多，多數因為佢哋喺胎內爭食。因為人工受孕嘅雙胞胎係以『雙卵雙胞』方式生長，兩個雙胞胎中間有無數血管連接，兩個BB會因此爭營養。另外媽媽開刀生產後24小時最好俾BB嘗試啜奶，通常先餵重啲嗰個，因為佢較有體力吸吮母乳，而輕啲嗰個只會餵奶粉。只要細孖飲食同排泄正常，而體重增加到5磅以上的話，就可以出院，呢段時間需時大概1至2星期。」

資深陪月員
冇奶都要試啜
有十多年陪月經驗嘅銀姐表示，一般孕婦都會有奶水從乳頭流出，不過真正可以讓BB啜食，大概係產後第3至4日，因為這時才開始「上奶」。
要令產婦多啲奶水，銀姐推介多款食物，「木瓜花生魚雞腳湯好補奶，仲有多飲水、黑豆漿及鮮奶都可以谷奶。產婦有無奶水，好睇出世頭幾日有冇俾BB啜奶，想多奶唯一辦法係每隔兩小時餵BB一次，就算媽媽冇奶都俾BB啜，咁就好快有奶水。雙胞胎可能會唔夠人奶分，惟有輪流食，或俾唔夠食嘅BB食奶粉。」

大細孖似黎姿多毛髮
約7時30分，黎姿所生的孖女由三樓送到二樓的育嬰室，但氧氣箱完全被白布遮蓋，由兩名保鑣護駕入育嬰房，全程戒備森嚴。15分鐘後黎姿亦被送返豪華私家套房，這時緊張的氣氛才緩和下來。
據知黎姿因為生孖胎，傷口開得比較大，身體較易攰，但她仍堅持試餵人奶。知情人士透露：「頭幾日護士都有抱大孖俾Gigi試餵人奶，不過最初未上奶，BB都係試啜，最後都係飲醫院奶粉。細孖唔夠磅，要留喺育嬰室加倍照顧，亦未可以試啜人奶，所以暫時都係食奶粉。不過細孖健康好好，已經唔使瞓氧氣箱，好叻女。」

黎母每日煲魚湯
為了幫愛女谷奶，黎媽媽周日（25日）下午4時即帶魚湯探女，「Gigi除咗有陪月同看護廿四小時睇住，依家黎媽媽日日都煲魚湯俾Gigi，就算黎媽媽自己唔嚟，早午晚都一定叫工人送去醫院。醫生話就算有人奶都唔會夠孖女一齊食，所以Gigi除咗狂飲魚湯谷奶外，仲要食得好清，每餐主要都係烚魚、白肉同清菜，因為餵人奶，媽媽食咩等如BB食咩，所以要食得好健康。依家大細孖個樣好似，都係皮膚白白頭髮好黑，身上有好多BB毛，好似黎姿。」知情人士說。

孖女一齊食奶
由於黎姿大部分時間都在豪華私家套房內休息，當BB要試餵人奶，她的陪月員便會走到育嬰室叫護士把大孖抱入房。由於每隔兩小時餵一次太頻密，所以大部分時間都由護士餵奶粉。本周一（26日）晚，一名護士便在育嬰室內對另一護士說：「VIP房夠鐘食奶喇！」未幾兩名護士即抱起其中兩名疑似黎姿孖女的BB，在育嬰室內餵奶。由於嘉諾撒只有二樓是產婦病房，黎姿所住的病房亦是唯一的豪華私家套房，因此護士都稱此病房為VIP。

馬生：佢係好媽媽
黎姿仆心仆命為孖女，令老公馬廷強非常感動，他在接受傳媒訪問時更大讚老婆：「佢（Gigi）一定係個賢妻，同我結婚咁耐，做足晒老婆本分，不但止照顧得我好好，對細佬同父母亦照顧得無微不至，名副其實係個好女人。我同得佢結婚，就要好好對佢，俾佢一個幸福家庭。見到佢對家人咁照顧，就知道佢會係個好媽媽。」馬廷強說現時仍未幫愛女改名，會看二人性格才決定，他又說暫時不會再追，「我見佢生女好辛苦，所以暫時唔再追！（送咩禮物？）佢想要咩就送咩！」
黎姿生孖女雖然好辛苦，但有個咁錫佢嘅富豪老公，一結婚就一擲七千萬買下半山蘭心閣送俾愛妻，仲先後送咗千五萬遊艇同一個澳洲豪宅，依家仲話黎姿要咩獎勵都得，黎姿生多幾個都值啦！

黎父黎母笑唔停
向來見到記者都掩面的黎姿父母，周日（25日）見到記者四萬咁口，記者問黎媽媽黎姿情況點，佢不停笑住話：「多謝大家！」

樂易玲話孖女似媽咪
本來身在外地度假的樂易玲，急急腳返港探黎姿。本周三（28日）晚7時許她步出醫院表示：「BB好靚，孖女眼同眉都似黎姿，耳仔就似馬生。細女好健康，依家有成4磅。黎姿精神好好，佢同我講嘢嗰陣仲不停食嘢㖭！（有冇送禮物呀？）未得閒買呀！」

好友齊封口
黎姿好友蔡加敏與丈夫馬鴻銘於本周日（25日）去探黎姿，離開時未肯接受訪問。而梅艷芳前經理人Marianne（王敏慧)亦於本周二（27日）到醫院（右圖），全程唔肯回應半句。

細佬未見影
據知黎姿留港分娩全為了讓細佬黎嬰可以見到BB，不過連日來太多記者在醫院外守候，故要等BB出院返家後，黎嬰先可以親身探姨甥女。

遊艇做獎勵
馬廷強對黎姿非常愛錫，婚後除一擲七千萬買下蘭心閣豪宅外，去年更送了名為「Bonheur」的遊艇給黎姿，有傳孖女出世後馬生打算送多一隻遊艇給愛妻做獎勵。

60萬請保鑣守醫院
黎姿入院後，整間嘉諾撒醫院佈滿便裝保鑣。7月24日孖女出生當日更有約28名保鑣分三更廿四小時駐守，場面誇張勁過特首出巡。據知每名保鑣時薪高達500元，每更8小時，每名保鑣日薪約$4,000。截至本周四（29日）為止，粗略估計單是聘請保鑣6日已花了近60萬。

7月24日
大堂門口 3名
地下後門 1名
二樓私人套房 5名
二樓育嬰室 4名
巡視 5名
早上11時至晚上8時共18人，另加早更及夜更各5人，全日共28人

7月25至29日（5日計）
大堂門口 3名
二樓私人套房 5名
二樓育嬰室 1名
巡視 5名
早上11時至晚上8時共14人，另加早更及夜更各5人，全日共24人

6日豪花共$592,000

孖女旺老竇
黎姿原打算在6月底擇日開刀，後因BB健康及風水問題延期，最後在7月24日7時剖腹。玄學家麥玲玲表示6月尾都有靚日子，但要BB又靚又叻、嫁得好又搵到錢，就要去到7月24日。麥玲玲表示：「呢日正好有晒以上所有嘅嘢，好平均。馬生本身面圓圓，大耳珠，呢種面相係玄學上叫做『雙珠朝口』，生女一定好旺爸爸，所以囡囡出世之後，馬生運勢會更加順暢。而夜晚7點呢個時辰出世嘅孖女，做事有規律，讀書運唔錯，會有機會離鄉別井，可能係會去外國升學。大個會搵到錢，亦會嫁個好老公。」
而玄學家吳佩孚亦表示7月24日是7月中最好的一日，他說：「呢日同年柱天合地合，可以化解晒唔好嘅嘢。晚上7點出世嘅BB就旺財，主要係旺父親。BB人緣好，生得靚，長大後有機會從事演藝事業。」

佢係個賢妻！（真實對白)