iPhone 4今開售 $4,914 上台扮大導演

iPhone 4「天線門」問題引來全城圍插，但弔詭的是，Die Hard Fans還是一邊鬧，一邊通宵排隊買新機。香港行貨今日正式開售，16GB賣$4,988，32GB都只係$5,888，計落已比去年買3GS慳咗一截，若上埋台簽24個月約，放低$4,914就可拎走部iPhone 4，算係好抵！但小記建議用US$4.99買埋個《iMovie》，剪片、特效隨身就做到，連買Mac機嘅錢都可以慳番！

小記試玩咗部iPhone 4兩星期，喺地鐵車廂拎出嚟打機傾電話，身邊乘客都會投以艷羨目光，足見新機雖有天線問題，但潮味一啲都冇減弱，相反係依家價錢合理，到時周街一人一部，反而令iPhone Fans少咗啲虛榮感。

美國App Store有《Case Program》畀用戶免費換Bumpers，但香港暫時未公布換領詳情，但切忌換白色，小記用咗幾日就發覺有少許變黃。

「死亡握法」無錯會令訊號跌格，但其實要好大力才有反應，正常人咁拎電話一定手軟。

放大圖片



《iMovie》剪片好Easy

雖然少咗份虛榮感，但iPhone 4嘅賣點還是值得一提再提。唔講個靚爆Retina Display屏幕，今次新機最正係可拍攝720p高清片，唔單止拍片時可以篤芒揀對焦點，仲可配合《iMovie》一併使用。測試所見，手指Scroll可逐格菲林重播，按幾下就可剪片、揀背景音樂、過場畫面甚至加入GPS位址。雖然實際功能唔算好勁，但勝在User Friendly，花啲心思就剪到靚MV，怪不得外國討論區一致認為它是擁有iPhone 4後必買的第一個App，好似唔買就浪費咗部新機咁大件事。

iPhone 4個芒比iPhone 3GS靚同光好多，而且顏色輸出較準，相反舊機就有少許偏藍。

放大圖片

《iMovie》輸入輸出高清片都好順，而且篤幾下就剪到片，開創隨街Editing嘅先河。

筍價行貨遲買平幾千

售價方面，水貨來港時英國冇鎖版曾炒到2萬元天價，即使SIM Lock版亦要1萬元才有交易，所謂「早買早享受，遲買平幾舊」，但今次仲唔止平幾舊咁少，事關只要今日上Apple官網（http://store.apple.com/hk-zh/），就可分別以$4,988及$5,888買到16GB同32GB版本，計落何止比去年賣$5,388同$6,288嘅3GS平一截，對比依家賣緊$499英鎊的16GB英國版，更係低水成千蚊，唔知當日心急的買家會否肉赤，皆因一部變兩部啊！

跟火牛及耳筒係指定動作，仲可另購Docking，邊叉電邊戙起部機睇片。

音量掣由長變圓，手感更實在。

改用micro SIM，3香港更表示凡申請$398計劃，每月畀多$50即可換多張備用micro SIM，畀iPad無限上網兼任用Wi-Fi。

對應Multi-tasking，連按兩下Home掣就可選擇背景程式。

iOS4追加倉頡、注音同繁體拼音輸入法，入錯英文字仲會有紅色虛線提示。

三軸陀螺儀較少人談論，但呢款《ARPhoto》程式就可以擺動機身來睇相，仲方便過Multi-Touch。

這款《iStrobe》可用來控制閃燈長着或閃爍速度，買機後必裝。

建議裝埋呢個《IM+ Lite with multitasking》，方便跳出Home畫面時都收到MSN訊息。

$398月費上台$0機價

以為淨機買已經好抵，估唔到上台出機仲精明。根據3香港及數碼通公布的月費計劃（CSL於截稿前還未公布），兩台都調低iPhone 4嘅帳面價，例如3香港的iPhone 4 16GB賣$4,480，32GB定價$5,860，若選擇$398月費計劃，兩台都是零機價就換到16GB，但由於3香港多100分鐘通話時間及豁免每月$12行政費，比較起來就較為划算。換言之，客戶要買一部全新16GB iPhone 4，首次使費只需$4,914（$398月費+$36增值服務+$4,480預繳），就算計及2年總成本，亦僅需$10,416，除勻每日$14.2便可無限上網，抵用！