講到鍾情越野車款，印象中以猛男居多。但事實上，不少女性名人、藝人都是越野車粉絲。以模特兒Alia為例，識得揸車但唔識揸越野車，但因為越野車夠型，又聽講四輪驅動會更安全，所以都好想擁有，不過就擔心越野車太大架揸唔掂！咁又唔使驚，試試呢架Land Rover Freelander 2先，佢較細部之餘，操控睇位亦好易，就算女仔揸都可以控制自如。
售價：$450,000
唔係想像中咁難揸
牌齡兩年，之前仲係假日車主，Alia話自己手車只屬一般，但係揸四門私家車一段時間後，感覺好悶挑戰性亦欠奉，所以想轉Feel玩四驅越野車，果然係野性難馴。但係佢又擔心車身太長泊位難，講咁多不如坐上車親身感受一下仲好。
Freelander 2屬體積較細的越野車款，女士亦能輕鬆駕馭。
「揸落之後又唔係想像中咁難，原來車身高視野廣，更加容易睇到前面車尾，兩邊A同B柱唔算粗，盲點少，轉彎時睇得更清楚，但係我就覺得尾玻璃面積比較細，好彩有後波泊車提示咋！」
聽落呢位女車手對汽車有一定認識同要求，既然試揸之後都認為可以控制到，就唔使驚睇位問題，咁其他方面又如何呢？
Alia打算熟習Freelander 2後，會到Off-Road玩玩。
車身較高，駕駛時睇位更容易。
Alia最愛揭背式尾門，而大尾箱更足夠她放置大量物品。
兩幅式天窗睇藍天
過往接觸過的女車主，選擇汽車時在外形、性能和車廂舒適三項中，都會較注重舒適度，而Alia亦唔例外，試了一段路之後就話要試坐後排和睇睇車廂空間，因為閒時佢都愛載朋友遊車河。
「前排中控台有一大堆掣，我知道呢個叫做Terrain Response，可以畀我選擇駕駛模式，但係喺市區應該好少用到，唔……我覺得呢部分好大有少少嘥位。後排方面空間夠晒闊落，而兩幅式天窗設計，前後排都可以睇到藍天。至於尾箱係我最鍾意嘅，因為空間好大，夠晒我用。」
車廂大部分設備都滿意，而細心嘅Alia還留意到，前排座椅屬電子控制，但就欠缺一按式手掣將座椅放平，佢話如果上山頂睇星星時就唔係太方便。
兩幅式天窗設計，前後排都可欣賞風景。
空間夠大，最適合大班朋友去遊車河。
輔助系統增安全性
行車安全方面，Alia甚有要求，而選擇越野車原因之一，係聽講行車可以有更穩定表現。Freelander 2採用四輪驅動，到郊外玩玩Off-Road當然冇問題，而換作On-Road行駛時，面對突如其來的路況改變，如遇上沙石和水漬時，四驅系統的確可避免推頭甩尾。其他方面，Freelander 2配上八安全氣袋、軚環下方安全氣袋、EBD電子制動力系統、EBA緊急煞車輔助系統及RCS車身防翻滾系統等，當然仲有Terrain Response提供不同駕駛模式選擇，讓行車安全度大大提升。
Alia相當喜歡Freelander 2，睇嚟佢都好快落訂。
3.2公升引擎力量恰到好處，但由於屬四輪驅動，所以耗油量會較私家車高。
儀錶板設計簡約，各項資訊清晰易讀。
規格表
車型：五門五座位SUV
引擎：直六
容積：3,192c.c.
最大馬力：230ps/6,300rpm
最大扭力：317Nm/3,200rpm
驅動：前置引擎、四輪驅動
傳動：六前速自動波配加減
懸掛：（前）麥花臣、（後）支柱式
制動：（前/後）通風碟
車身體積：4,500×2,180×1,740mm（長×闊×高）
撰文：林健森
攝影：黎劍華
查詢電話：2713 2383（Land Rover HK）
模特兒：Alia（Pure Models）
留言列表
