今年五月，本刊拍到一直鮮有緋聞的詩雅着住便服素顏與富貴 Kenneth在跑馬地逛傢俬店，睇詩雅個笑容就知兩人行得好開心。
又 SM又援交，先後在電影《前度》和週三上畫的《囡囡》中去到盡，升呢做宅男女神谷到班仔流鼻血。
25歲詩雅公認樣靚有氣質兼且顧家係孝順女，出道三年 keep住零緋聞，但本刊獲悉，其實詩雅身邊早有一位入行前相識的珠寶富商，苦追 5年一早攻破詩雅父母防線，詩雅自己亦說：「預咗俾人影到！」
近日頻頻為新戲做宣傳的詩雅，多次被問到感情狀況，都堅稱入行後未拍過拖，不過本刊早前卻發現素顏詩雅與一位年約三十歲、駕駛平治跑車的青年才俊在跑馬地高級傢俬店 HunterDouglas揀傢俬，詩雅十足女主人一樣上落平治，而選購傢俬過程，男士亦當正詩雅是話事人，樣樣都交頭接耳問意見，話熱戀中都有人信。 
身高 164cm，三圍 32A、 24、 33，身材雖然不算出眾，詩雅勝在氣質獨特、有演戲天分，兩年內已經擔正《囡囡》、《很想和你在一起》等五部電影。
白手興家
據悉，該青年才俊洋名 Kenneth Chan，約三十五歲，與友人在紅磡合資開設珠寶公司，名下更與拍檔共同擁有共四個總值近 5,000萬的物業。 Kenneth有樓有車有公司，詩雅則是在上水天平邨土生土長的屋邨妹，兩人拉得埋原來都關鑽石事。
有意拖
二人並肩穿梭多間高檔傢俬店，不時交頭接耳商量，走在前方的 Kenneth打算入店時，更轉過頭來伸出手意圖幫詩雅拿着小盒。
靚車載
Kenneth揸住架余文樂同梁朝偉都有部、價值約 108萬的平治 C63 AMG跑車接載詩雅， Kenneth仲要着定冷氣，驚死熱親女神。
「陪我爹哋潛水！」
週一（ 30日），詩雅通過電話向記者承認，相識五年嘅 Kenneth確係唔只朋友咁簡單：「入行前做鑽石鑑賞就識佢，佢教我好多嘢，大家又啱傾，唔只朋友，係亦師亦友嗰種。三年前我決定做藝人都係同佢商量，幾個月前拍戲搞到我情緒病都係多得佢開解咋！ Kenneth同我媽咪爹哋都好熟，逢年過節都會送禮又送花畀我媽咪，又陪我爹哋一齊去潛水。兩年前過年，佢送咗一盆一共有八支嘅蘭花畀我媽咪，我後尾至聽講佢前幾日整親腰，仲要一個人抬咁大盆花趕住過年前送上嚟，我好感動！」
入行純
08年兼職做模特兒的詩雅，首次參與劇集選角，已經被無綫相中擔任《盛裝愛作戰》做第一女主角，當年同場仲有咪神趙碩之（右），難怪 32A詩雅影相都要縮埋，驚俾趙碩之比下去。
大突破
外形純情的詩雅，年中為在《前度》中與陳偉霆有多場火辣親熱場面，被各界激讚為最搶眼角色。
朱古力鮮花攻勢
親認 Kenneth經常出入衛家，詩雅就否認自己上過 Kenneth屋企，不過感情又親密到會幫手揀傢俬喎：「佢要換梳化我幫吓眼啫，其實我哋成日都有見面，個個星期都會食飯行街，我都預咗遲早俾人影到。」
唔只行世伯伯母政策，詩雅亦承認 Kenneth為人好細心：「佢知我鍾意食蛋糕同朱古力，喺香港見到好味嘅蛋糕成日會買畀我，無論去到邊度出 trip都會帶好多盒當地最出名嘅朱古力畀我！」有花又有朱古力又有事業基礎，仲唔係追求？「我覺得佢好君子，從來唔會送咩貴重禮物畀我、又唔會計較要回報，但係去到邊都記得我，我遇上困難同唔開心，都一定陪住我，我心目中 Kenneth又叻、事業心重、仲要做每樣嘢都細心，對我父母都好好，真係一個好好嘅男人，佢嫁得過 o架！不過要睇緣分安排，同埋呢一刻係事業搏殺期嚟嘛！」
25歲女啱啱發圍，又剛拍完「央視」偶像劇《青春旋律》，仲有幾套片等佢簽約做女主角， Kenneth要追人真係要畀多兩錢肉緊。
扮援交
本週將上映的新作《囡囡》，被定為三級片。詩雅說因為接連的激情演出飽受精神困擾，亦多得 Kenneth在旁開解支持。
樸素妹
公認是慳妹的詩雅，入行多年仍然與父母、姐姐及弟弟同住上水天平邨舊居，每天以地鐵、巴士做交通工具，生活樸實。
與古巨基、吳浩康合演的偶像劇《青春旋律》下月將於中央電視台首播，詩雅說：「家係事業搏殺期，一定唔會上岸！」
持 5千萬物業
Kenneth是詩雅五年前結識的珠寶界才俊，關係亦師亦友，為人上進、專業知識又豐富。資料顯示 Kenneth與另一位拍檔共同擁有多間註冊公司，其中包括在紅磡的珠寶設計有限公司，公司名下更持有四間共值近 5,000萬物業，就算斬開一半都大把喺手。
奧運站「一號銀海」高層單位︰ 06年買入︰市值 1,700萬
馬鞍山「帝琴灣」中層單位︰ 06年買入︰市值 710萬
西貢「匡湖居」︰ 05年買入︰市值 1,500萬
九龍塘「嘉林園」︰ 08年買入︰市值 850萬
總值： 4,760萬
企街抽
詩雅喺靚車歎冷氣， Kenneth就企埋一邊煲番支煙，食煙都驚攻親女神， Kenneth果然好細心。
Kenneth與拍檔共同擁有的珠寶公司位於紅磡商廈，成立 7年、於公司網頁內自稱業務遍及澳洲、東南亞、中東及非洲，規模不小。
草根孝順女
25歲詩雅， 18歲已經入行做六福珠寶售貨員， 20歲考獲鑽石鑑證資格轉做高檔珠寶買賣， 08年面試成功被無綫揀做《四葉草之盛裝舞步愛作戰》女主角入行後簽約英皇，開戲幾乎無間斷。
不過詩雅曾在專訪中痛哭剖白，自小在上水天平邨長大、父親做地盤雜工養家，出身草根， 8年前姐姐又因為車禍盆骨盡碎一度命危、住足成年醫院，至今仍有輕微殘疾，因此入行最大目標是賺錢養家，心願是幾年後重返珠寶界經商，保證父母及姐姐未來生活無憂。
咁孝順難怪 Kenneth對詩雅情有獨鍾！
上岸潮
詩雅有珠寶才俊做觀音兵，事實上英皇旗下小花好多都搵到好人家上岸，其中戰績最彪炳，莫過於 22歲已經為小小超李澤楷兩年抱三的梁洛施。
梁洛施變港女偶像
12歲簽約英皇、 15歲正式出道、 19歲在楊紫瓊介紹下結識小小超， 08年 3月透過律師與英皇解約，去年 5月為李家誕下李長治，今年 7月再誕孖仔，成為港女偶像。
何嘉莉嫁甜品太子
是英皇第一代小花並最得老闆楊受成寵愛， 02年與英皇和平解約後轉居幕後為英皇藝人設計形象， 06年下嫁發記甜品太子爺黃逸璋。
葉佩雯拖創作紅人
曾經與容祖兒、何嘉莉並列英皇三小花， 00年與歌手郭偉亮（ Eric Kwok）拍拖被雪藏， 02年提前解約，除了 06年曾經復出出碟後，其他時間一概安分守己做郭偉亮背後女人。
留言列表
