有胸大晒，有獎冇用！（設計對白）
今屆港姐到印度拍外景， D cup的彭慧中憑泳衣一鳴驚人，火辣殺出。（《 FACE》圖片）
港姐 38年，開到荼䕷，應屆港姐冠軍陳庭欣、亞軍張秀文及季軍莊思明，被狠封「豬扒港姐」，標榜美貌與智慧的港姐口號，蕩然無存。
事實上，近年無綫已改變策略，當選港姐三甲人選，未必有運行；相反，參選時做到風頭躉是非精，好似應屆有咪神之稱的 8號佳麗彭慧中，雖然大熱倒灶，卻一早被無綫睇中徵召試鏡，並火速簽約無綫八年，率先跑出。
冇獎仲好
四位應屆港姐，左起：亞軍張秀文、冠軍陳庭欣、季軍莊思明及最上鏡小姐李雪瑩被封「豬扒」，完成港姐一年任期後，隨時 bye bye！
擁有 D cup逼爆身材的 8號落選佳麗彭慧中，參選期間被封為「港姐咪神」，在印度外景泳衣環節， D cup上圍成為焦點，搶盡其他佳麗風頭。不過，有關彭慧中的是非新聞同樣多，被讀者爆料指她爛蒲攬仔食煙，更被指是港姐二五仔，向外篤其他候選佳麗背脊。
新聞多見報高，但彭慧中最終大熱倒灶，連一個豬肉獎安慰都無。不入三甲，但彭慧中早前卻成功超越一眾得獎港姐，獲無綫安排秘密試鏡，並火速簽約經理人部門八年，率先做咗無綫親生女，成為今屆港姐真正贏家。
其實近幾年開始，無綫對捧港姐的策略已作出改變，條件最好的，未必順利當選進身三甲。
「攞咗獎要履行港姐職務一年，要出外選美，又有好多親善訪問，就算節目部或戲劇組睇啱想捧，都迫於無奈要讓路！所以呢幾年選得三甲嘅港姐，通常都無乜被捧條件，其實睇呢幾年無綫冇同港姐簽長約都睇得到佢哋變咗政策，好似五年前落選嘅徐淑敏，都係無獎，但就好快同無綫簽長約。」一名無綫員工說。
前途未卜
事實上，港姐決賽當晚，彭慧中即使落選，但在慶功宴上卻表現風騷。
「所有參選嘅佳麗嗰晚都有出席慶功，但係樂易玲同港姐監製何小慧，成晚都照顧住彭慧中，又介紹佢俾現場嘅贊助商認識，所以佢哋一早就睇中佢。」知情者說。
同人唔同命，「豬扒」三甲被狂踩，連已卸任的上屆港姐，同樣前途未卜，被問到會否簽約無綫發展，剛卸任的上屆冠軍劉倩婷亦顯得相當失落：「佢哋仲未簽我呀！」
上月中，彭慧中被安排上《獎門人》節目玩遊戲，應屆三甲人馬則在場邊做觀眾打氣，原來當其時彭慧中已簽約成為無綫親生女。冇獎攞，仲掂！
任攬
彭慧中被讀者爆料，圖文並茂揭開她經常攬仔及俾仔攬的狂野真面目。（《蘋果日報》圖片）
狂啜
食煙本來好濕碎，但彭慧中卻堅持話陳年舊事唔記得。（《蘋果日報》圖片）
篤波
在鬼仔面前，彭更豪放篤胸。（《蘋果日報》圖片）
雖然在港姐決賽晚空手而回，但彭慧中在慶功宴上，神采飛揚滿場飛，更得無綫高層樂易玲傍到實。
入定貨
無綫鍾意喺港姐堆揀蟀，但近年港姐質素下降，大多數三甲佳麗當選後都冇影，相反，不少落選港姐卻有機在娛圈大展拳腳，這種入定貨現象，歷年不衰。
周海媚
同是三甲不入的周海媚，當年亦得無綫力捧，成為當家花旦。
85年參選港姐三甲不入，有指無綫一早睇中海媚中古俱宜，選後即被力捧成為一線花旦，代表作包括《倚天屠龍記》、《義不容情》、《今生無悔》、《大鬧廣昌隆》等，近年轉戰內地拍劇。
陳妙瑛
93年以落選港姐身份簽約無綫， 97年首次擔正拍攝《花木蘭》，收視報捷，入行 8年，拍過近 30套劇集， 01年拍罷《無頭東宮》後，引退從商。
郭可盈
93年，大熱倒灶的郭可盈僅得「最佳演藝潛質」獎，但落選後火速被無綫捧為當家花旦，更夥拍當家小生陶大宇，拍攝《刑事偵緝檔案》，收視高企。
張可頤
94年參選得「最具演藝潛質」獎，即被安排拍劇， 97年拍攝《難兄難弟》飾演「程寶珠」一角，火速走紅。
徐淑敏
○六年只得「旅遊大使」獎的徐淑敏，鬥完靚即獲無綫重用，在九月的《星光熠熠耀保良》為許安伴舞。
06年參選的咪神徐淑敏只分得一個「旅遊大使」獎，落選後隨即亮相《星光熠熠耀保良》與許志安演出歌舞，更主持《最緊要正字》及接拍多部劇集。
留言列表
