廖碧兒因搭上李澤楷表弟、富二代林忠豪而狠撇舊愛陳豪，但有指林疑為失匙夾萬，令一心釣金龜的她只釣得個龜殼，故有傳近日她已火速斬纜。自從傳出分手後，林忠豪昨首度開腔接受本報訪問，他直認與廖碧兒只是朋友關係，似默認 4個月拜金戀玩完；他又揚言「有啲人要奢華生活先叫有錢」，但他認為做人最緊要心中富有。林忠豪的金錢論，廖碧兒收到未？
其他娛樂名人影片
廖碧兒與陳豪秘戀 6年，但一直密冚地下情兼死口唔認拍拖，至去年她搭上小小超李澤楷表弟、富二代林忠豪，立即飛甩陳豪高調晒新歡。不過這段拜金戀峯迴路轉，有傳林是失匙夾萬，與廖拍拖後更被家人閂水喉，同時廖碧兒又因衰拜金致形象插水，更被指拖累主演的《居家兵團》及《依家有喜》收視麻麻。上周她 32歲生日，新歡舊愛冇表示，有傳廖碧兒已速撇林忠豪，企圖力挽奄奄一息的演藝事業。
放大圖片 
廖碧兒因拜金而狠飛拖拉 6年的陳豪，令男方傷透心。
放大圖片 
去年林忠豪（右）曾陪伴戴蘊慧（左）出席戴思聰喪禮，但近日兩人卻因錢財起波瀾。
「我話朋友你哋都唔信」 放大圖片 
林忠豪昨以朋友形容廖碧兒，默認兩人關係有變。資料圖片
據悉，廖碧兒與林忠豪未至絕交，雙方仍有聯絡，但親密程度與昔日大相逕庭。自從傳出二人甩拖後，林忠豪昨首度開腔接受本報記者的電話訪問，他表現大方，但言談間與廖碧兒劃清界線，並以朋友來形容兩人關係，問他現在與廖碧兒的感情是否有別以往？他淡然說：「不嬲都係朋友，冇任何嘢。」廖碧兒上周牛一，林忠豪不回應兩人有否見過面；其實女友生日，男友為她慶祝正常不過，可是林忠豪卻說：「咁我哋係朋友吖嘛，都冇話過拍拖，係雜誌話之嘛。」最近他們可有聯絡？他說：「冇回應，真係冇辦法，我平常心面對呢件事。」林忠豪對廖碧兒的所有問題都避談，問兩人是否拍拖？他只說：「呢個問題好多人問過，我冇回應。私人事我自己知咪得囉，我話朋友你哋都唔信，總之一路都係朋友。」廖碧兒被指貪錢，他有否戥她心痛？林忠豪說：「暫時都唔好回應，有啲報道唔真實，我聽到阿姐汪明荃都支持佢，等佢自己 handle啦。」他以私人事為由拒答現在有沒有拍拖，只說：「你哋咁多人跟住我，其實我有拍拖冇拍拖，你哋都會見到 o架。」
「覺得最緊要心中富有」
有雜誌報道廖碧兒向林忠豪逼婚不成，又指林忠豪送樓縮沙，他對此說：「佢哋鍾意咁寫都冇法。」但又不回答曾否考慮與廖碧兒結婚。記者指林忠豪交代清楚可粉碎謠言，他則說：「我明白，好多謝你哋畀我發揮嘅機會，但呢個時期比較敏感，私人事唔應該畀大眾知道，我已經講多咗啦，我應該不斷唔回應然後禮貌地收線，但係你哋打到嚟，我又冇乜話要好收埋，只不過私人事唔需要大眾評論之嘛。」外界都關心林忠豪和廖碧兒的戀情發展，林忠豪卻輕嘆：「唉，都已經無奈啦，一時話我有錢一時話我冇錢，一時又話佢貪錢一時又話我唔畀錢，我都唔知自己有錢定冇錢。我講一句啦，其實有錢冇錢唔係最緊要，最緊要心中富有啫。有錢冇錢同邊個比 o架啫，乜叫有錢乜叫冇錢呢？我衣食無憂係咪叫做有錢呢？又未必，有啲人唔係咁睇，有啲人可能要奢華生活先叫有錢，我又唔知定義係乜嘢，我覺得最緊要心中富有。」
「希望會有自己嘅家庭」
林忠豪有否遇過為錢而接近他的女性？他說：「我唔清楚，但好老實講，唔同周刊報道好多所謂娛樂圈嘅女士，我唔係咁識，可以話坐低食飯冇，電話亦都冇，我唔點名邊個，大部份係一面之緣，可能 function見過，唔知點解講到我追佢哋。」他交女友，家人會否畀意見？他笑說：「呢啲屋企人嘅事，留番屋企人問我啦，唔需要香港 700萬人知吖，係咪？」問他是否一個會結婚的人？他坦言：「我諗每一個人都希望有一日會有自己嘅家庭。」是否這一、兩年的事？他說：「我自己都唔清楚，唔好意思。」新聞多多的林忠豪，曾揚言會協辦年底舉行的戴思聰慈善音樂會，有指他會斥資 300萬，但戴蘊慧日前卻指他吹水做宣傳，林忠豪昨說：「當中誤會一定有，暫時冇具體回應。但老實講，你覺得我咁多新聞仲需要做宣傳咩？」採訪：夏琴 
廖碧兒和林忠豪的拜金戀成為城中熱話，沒料到這段新戀情只維持短短 4個月，如今她事業愛情雙失，可謂四面楚歌。資料圖片
娛樂資料庫：痛失雙豪
廖碧兒被指背着好好先生陳豪，搭上富二代林忠豪，形象插水兼被指是「貪錢精」。不過，這段戀情見光即死，有指廖碧兒為挽回形象而速撇林忠豪。日期：去年 9月事件：有指廖碧兒冧掂擁有過億身家的林忠豪，並有男方的屋企鎖匙。日期：上月 11日事件：廖碧兒被發現在林忠豪位於淺水灣的億元豪宅逗留至深夜三時，戀情曝光。日期：上月 13日事件：廖碧兒否認戀林忠豪，稱只是朋友關係。日期：上月 17日事件：陳豪接受訪問，稱「過去的已經過去。」日期：上月 19日事件：廖碧兒宣傳新劇，僅以「人哋」來稱呼陳豪。日期：上月 20日事件：廖碧兒暗示陳豪爆料給傳媒：「邊個講我，我心中有數。」日期： 1月 6日 事件：廖碧兒 32歲生日，沒有「雙豪」陪伴，孤獨慶生，有傳她速撇林忠豪挽救形象。日期： 1月 13日事件：有消息指廖碧兒向林忠豪逼婚，但林忠豪的買樓承諾未能兌現，即快速斬纜。資料來源：《蘋果》資料室 
孤獨慶生
林忠豪與廖碧兒撻着後，其緋聞隨即魚貫登場。昨傳林忠豪在搭上廖之前，曾在仁濟總理吳守基介紹下認識同樣是選美出身且具 D cup上圍的高海寧，並一度展開追求，高海寧昨表示認識吳守基，但對林忠豪就毫無印象。高海寧透過電話說：「吳守基冇帶過男仔畀我識，我知廖碧兒呢單新聞，但唔識亦冇聽過林忠豪呢個人，有啲無厘頭。」她先後與林忠豪和少年廚神林澄光扯上關係，似與肥仔特別有緣，她笑說：「我本身鍾意劉青雲，佢識做戲又有好男人形象。不過我揀男朋友外形唔係最大影響，最緊要孝順有愛心，內在會更吸引。」
放大圖片 
諸葛梓岐承認和林忠豪相識多年，但堅決否認曾拍拖。
放大圖片 
甄穎珊昨自爆與林忠豪的星座啱 key，兼兩人曾撐枱腳。
甄穎珊林忠豪撐枱腳
之前有指林忠豪先後與 Freeze前成員甄穎珊、諸葛梓岐、 Ana R.和周秀娜等飯敍，他昨雖強調與不少女星都是一面之緣，但甄穎珊昨稱數年前於蕭定一的生日派對上認識林，雙方一直有聯絡，至於林曾否追求她？她猶豫說：「唔知，唔會 feel亦 feel唔到，但我哋星座 OK，佢雙魚，我天蠍，都幾好朋友，啱傾。」她讚林忠豪 gentleman，曾駕車接送她，至於有否單獨見面？她說：「食飯囉。」曾否到訪林宅？她說：「私人嘢唔想答。」諸葛梓岐昨承認與林忠豪是相識 5、 6年的朋友，「但冇拍過拖，一定冇發展過。」採訪：夏琴 
有樣有身材的女神高海寧，昨被指曾獲林忠豪垂青。
留言列表
