明星靚相大分享☆

對於屢傳分手，Marie慨嘆摸不着頭腦：「可能近排好少見，記者又成日問我幾時結婚生B，我唔知點答，傳傳吓就畀人傳分手啦！我要澄清，我同男朋友冇問題，因為大家早已有默契！」縱使她與男友一周不見一次，每次見面只得半小時，就算吃一頓趕得要命的午餐，她也覺得開心，當然要享受真正的二人世界，辦法只得一個：「真係去旅行，離開香港先可以享受二人世界，總之一定要離開香港！就算結婚，我都希望去一啲靜嘅地方，我唔想搞大龍鳳擺幾百圍！我行得婚紗騷多，亦唔憧憬做一個婚禮女主角，如果要做呢啲嘢，可能只係為咗老人家，最後亦逃離唔出香港呢個框框！」

Marie的未來妯娌陳法拉，盛傳早已秘密與Neway大公子薛世恒有一紙婚約，但Marie是一個很難隱瞞自己的人，就算結婚也希望低調進行，但不願意瞞婚：「喺香港秘密結婚好難，因為香港傳媒真係好勁！況且結婚唔係壞事，外國好多星結婚生埋仔都依然好紅，我結婚係想得到大家嘅祝福，隱瞞係好辛苦！」

法拉與Marie這對Neway「大小新抱仔」的冤家事迹，確實聽得令人打呵欠，究竟她們是別人眼中的敵人，還是本身是Friend底？她說：「因為大家嘅男友關係，我先認識法拉，我同佢嘅認識係講緣分！其實我同佢嘅性格、樣貌同工作都好唔同，佢有佢嘅好處，我有我嘅缺點，唔明點解成日畀人攞嚟比較？雖然我哋唔係真係好熟，不過大家相處冇問題，我哋有偈傾o架！」

公主也是凡人，何況諸葛公主只是被人張冠李戴？為擺脫公主惡名，Marie近年發憤自強，做了廿幾年人後，半年前終於不用攤開手板問父母攞錢：「出嚟做嘢，先知搵錢真係咁難！真係好辛苦！每一蚊都係有血有汗！以前我用錢嘅態度係應使則使，唔應使而我又鍾意嘅都會使，依家就真係我需要嘅先會買，真係量入而出o架！」被譽為全港「公主病」佼佼者的Marie，竟會吐出「量入而出」的四字真言，莫非她遇到神醫？從她所說的一字一句，從前的她根本以為錢是變出來的！

憶起往時的嬌生慣養，Marie不禁臉上一紅：「細個真係想要乜就有乜！父母會用盡辦法幫我完成心願，要買大公仔就有更大嘅公仔；我鍾意乜傢俬就有乜傢俬，我話要一間好似白雪公主咁嘅房，佢哋即刻搵師傅幫我訂造，嗰時我只知幸福係必然！」幸福在她身上似是絕對的必然，縱使身份神秘，除了知道她是諸葛亮的後人外，她只肯講母親是北京政府公務員，爸爸是一個生意人，加上雙親只得她一粒女，名副其實的掌上明珠。

生活富裕，不過父母因工作太忙，未能親自照顧Marie：「11歲父母就踢我去加拿大，當時除咗自己，就只有工人，隔幾個月先可以見佢哋一面！當時我好掛住屋企人，一嬲就玩失蹤，我要父母搵唔到我，專登要佢哋擔心，嚇到佢哋呢……後來媽咪同我解釋、想我獨立，話我大個自然會明，當時點明啫？我只識得喊，不斷講唔明唔明，我開始知道真正嘅幸福唔係必然！」

做了廿多年公主，工人成為Marie最親近的人，父母的愛不是沒有，但一刻相處已彌足珍貴，在她眼中，媽媽是一個易溝通的朋友，爸爸卻是一個嚴肅的大男人：「爹哋係典型嘅山東大男人：嚴肅、極有威嚴、講一唔會話二，所以我有少少驚佢！不過如果冇佢哋，我又點會有錢使，點會成為諸葛梓岐呢？」出來工作後，深明錢不是從多啦A夢的百寶袋隨意拿出來，她知道要孝敬雙親：「依家唔會亂用錢，要養家孝順父母，我半年前冇再問佢哋攞錢喇！仲會請佢哋去旅行添！」

後記：有情煲粥飽

諸葛公主衣食無憂，雖話麵包重要，但她更深信有情飲水飽！跟她做訪問，正值午飯時間，她只顧跟電話中人講不停，完全忘卻醫肚，她笑說：「我飲水已經夠飽！」明晒！