答：忍受到！咁我唔係完美o架嘛！佢望都係平衡吓心理啫！如果周秀娜行出嚟，係人都會望啦！自己都鍾意睇靚嘢，會一齊望，但會睇隻腳先！如果強迫佢唔望，咪遲早分手！

解碼：果然係新一代嘅獨立女性，可以由得男友四圍(目及)女，最重要當然係嗰份自信啦！

問：最着重保養身體或面部邊一個部分？

答：梗係條頸啦！有次阿哥請咗啲朋友返屋企食飯，佢有個朋友個樣好後生，最多都係28、29歲，點知原來40都嚟緊，佢話好多人都會忽略咗條頸嘅保養，但其實最出賣年齡就係頸紋！

解碼：嘩！莫非呢個就係唔少藝人青春不老嘅原因？貼士就畀咗大家喇！以後記得搽面嗰陣搽埋條頸喇！

問：有咩古怪嘅飲食習慣？

答：細個嗰陣咩都玩，將糖同黑胡椒撈埋落啲茄汁度試味，從此以後食薯條都會 咁做，都有成日同朋友推介o架！但未遇到一個人同我一樣。

解碼：阿橋呢個習慣認真「混醬」！問佢係咩味，佢仲要話係「好味」，到底呢個係咪爛Gag嚟o架？

問：係唔係要攬住公仔先瞓得着？

答：又唔會話一定要，但有就最好囉！哈哈！屋企有隻毛巾質地嘅熊公仔，由中三陪到我依家，係個男同學送畀我嘅，唔係因為鍾意佢至攬到今時今日，只係實在太好攬，買唔到第二隻公仔代替。

解碼：唔知阿橋男朋友知道每晚陪住愛人覺覺豬嗰個「枕邊人」係多年「情敵」之後，會唔會趁機會「殺人滅口」呢？