明星靚相大分享☆

上期《壹》仔踢爆Angelababy飛去北京密會黃曉明，仲自出自入「黃宮」兼拍拖睇戲鬼咁sweet，八珍聽聞報導出街後，兩個感情有增無減，要嚟香港做新戲宣傳嘅海綿蛋糕，更秘密提早飛嚟香港慰藉Baby。

原本黃曉明係响五月廿八日到香港宣傳電影《唐伯虎點秋香2四大才子》，點知佢廿六日已經人在香港，更拒絕向電影公司透露住邊間酒店，但就一定會依時現身出席宣傳活動。
男友錫到燶，黃曉明到港當日，咁啱Baby要出席公開活動，明知要俾記者包圍大逼供，Baby依然笑晒，仲不時展示手上嘅心形鑽戒！
話晒「蜜月期」，Baby收到情戒一啲都唔出奇，黃曉明亦自爆鍾意送禮物氹人開心，就連响《唐2》飾演佢娘親嘅朱咪咪，都收過黃曉明親自寫上嘅「愛你！阿娘！」愛心暖包，Baby呢隻心形鑽戒，睇嚟都係海綿蛋糕嘅小小心意！

26/5
知道黃曉明已經响香港，同日Baby出席運動用品活動，全程笑容滿面，無懼記者逼供戀情。

翻查紀錄，Baby平日出席運動用品活動，都唔會穿金戴銀，但當日無論打扮幾九唔搭八，佢都要戴住隻心形戒指，睇嚟應該有特別意思。

28/5
陪足Baby兩日，上週五黃曉明終於開工，先後到按摩店及傢俬鋪接受無綫及有線專訪，見到咁多記者跟住，據知黃曉明多次要求行後門走人，諗盡辦法賣甩記者。

29/5
黃曉明自爆送暖包冧朱咪咪，當日再送多張寫住「愛你」嘅簽名相，問到Baby有咩禮物？黃曉明忽然講廣東話：「無呀！」嘩！咁大話嘅！

黃曉明承認同Baby一齊睇戲，以前亦試過同大班朋友去唱K，舊年十月先認識，所以無可能如外傳般秘密拍拖兩年。