明星靚相大分享☆

Lucas冧廣告商

生完 BB未坐滿月，未收身的栢芝北上探老公謝霆鋒，順道亮相上海國際電影節開幕禮，再拖埋囝囝 Lucas現身周星馳動畫《長江七號救地球》記者會，宣布母子檔合唱主題曲。
Lucas在記者會表現調皮反斗，冧盡在場記者跟 Fans；栢芝賣口乖多謝星爺帶她入行，還說要把 Lucas的第一次送給星爺。
「栢芝生完細仔之後，唔想再咁收埋，會多啲出嚟做嘢，今次帶住 Lucas出嚟見人試反應，睇吓冧唔冧到廣告商，到時母子檔一齊接拍親子產品廣告，開多條財路。」知情人說。
霆鋒和栢芝明知自己一對寶貝仔係公眾焦點，與其左避右避，索性轉守為攻，讓兒子早點適應及與外界接觸。
霆鋒在內地觀眾心目中是好男人，一旦栢芝帶 Lucas接拍親子產品廣告，形象會更「入屋」。「以前廣告商出幾高價錢，佢兩公婆都唔肯幫個仔接廣告，不過呢排口氣變咗。」知情者透露。

周麗淇入華誼

今年的上海國際電影節開幕禮，有兩位產後媽媽張栢芝和趙薇在陣，成為傳媒焦點外，一眾女星包括范冰冰、楊紫瓊、鞏俐、大 S，以及分別來自韓國和日本的李多海和常盤貴子，亦上「行」架生，盛裝赴會。
人同此心，個個扮到隻雀咁，無非為借機認識內地片商和導演，搏一個成為億元票房演員機會；當中包括周麗淇（ Niki），原來她已密謀離開 BMA，而且正與華誼兄弟公司密斟，全面北上掘金。
據 Niki的身邊人透露，她的好姊妹蔡卓妍（阿 Sa）原本打算滿約英皇後轉投華誼兄弟，可惜因為生約未滿而未能成事；由於華誼有意物色香港藝人簽約旗下，阿 Sa於是撥「行」大葵扇，向對方力薦 Niki。早前華誼亦曾邀請 Niki出席上海電影節慰勞宴，雙方順道詳談合作事宜。
「 Niki本來就係拍電影出身，雖然
BMA對佢都幾好，但返大陸發展係大勢所趨，同埋佢其實想主力拍戲，所以今次華誼搵佢傾合作，佢都心郁郁！」
在內地，華誼兄弟公司是目前最大規模的娛樂公司，手底下紅人包括周迅、李冰冰、黃曉明、馮小剛等，公司於九四年由王中軍、王中磊兩兄弟創辦並急速發展，不但沾手藝人管理，亦有開拍電影和電視劇，近年不少大製作如《集結號》、《風聲》等，都是出自華誼兄弟。