馬國明飾演嘅司馬信，有齊現代後生仔嘅缺點，經常亂噏當秘笈。一次意外，將佢送返三國時期，令其脫胎換骨。

有劇追

「高齡」 game友馬國明　穿越時空《回到三國》

2012年07月06日 ~~ 第884期忽然１周

2011年，中台韓嘅電視劇興起玩時空交錯，好似大陸劇嘅《宮鎖心玉》、《步步驚心》；韓國嘅《屋塔房王世子》、《仁醫》等，連 TVB都摻一腳贈興，喺《衝啊﹗瘦薪兵團》後推出穿越時空科幻劇《回到三國》。
《回》內容講已屆 37歲「高齡」，但仍沉迷網上遊戲嘅馬國明，因為一個超怪颱風，將佢吹返去風雲變色嘅三國時代，遇到諸葛亮及劉、關、張、曹操等歷史人物，帶出一個充滿驚喜奇趣嘅新三國時代。

播映日期﹕ 7月 9日起周一至周五晚 8:30pm　翡翠及高清翡翠台

打手機
雖然身在三國時代，但仍不時以手機向細妹樂瞳求助，翻查歷史以助諸葛亮（林峯）出謀獻策。

鋤大 D
為游說孫權（敖嘉年）、周瑜（陳展鵬）結盟，馬竟然教孫權等人鋤大 D，以牌術大力推銷結盟聯軍嘅好處。

講起《回》劇，原來一波三折。先講播映期吖。
本來預咗喺《心戰》時段播，誰不知臨時抽起，改播《心戰》。仲有喺《回》開拍前，網民同 TVB喺 TVB討論區發生過罵戰㗎。為乜會咁呢？
事緣《回到三國》劇集開拍時原本公布吳卓羲飾演穿越時空嘅主角，連節目巡禮片段都係吳唱 K。點知到劇集正式開拍，無綫因見穿越人受歡迎，於是踢走吳唱 K搵林峯頂上，引起網民不滿，認為無綫唔尊重吳唱 K，亦唔尊重民意。

諸葛亮具有雄才偉略，文武兼備，被李國麟三顧草廬邀其出任軍師。

面對心儀宮女桑柔（楊怡），馬繼續使出現代溝女戰術，冧得楊怡暈陀陀。

古惑仔「三國之旅」

馬重返現代後，令佢最難忘嘅，唔係嗰班三國英雄，竟然係宮女楊怡。

最後無綫表面順「民」意，林峯改演諸葛亮，但穿越人一角依然唔係吳唱 K，而係 37歲嘅馬國明。雖然馬國明算係漁人得利，但壓力唔係冇㗎，試想搵個三十到尾做活潑俏皮嘅 gameboy穿梭時空，有啲講唔過去，而林峯則要掛住長鬚做中年諸葛亮又似乎年輕咗，真係有啲不倫不類。既然高層安排，監製劉嘉豪亦無話可說。
搞完一場大龍鳳先拍得成，究竟套劇講乜呢？
一個沉迷網上遊戲嘅現代古惑仔，自稱「 win神」嘅司馬信（馬國明飾）、一個係足智多謀古代人諸葛亮（林峯飾），因為一個怪風令兩人相遇。其間亦與劉備（李國麟飾）、張飛（曾偉權飾）及周瑜（陳展鵬飾）等各路經典人物鬥智鬥力。其實睇落，同十多年前古天樂嘅《尋秦記》異曲同工。大家點睇呢？