Wii遊戲《New Super Mario Bros. Wii》去年12月在日本推出時，首周賣出逾93萬隻，到今年3月底全球總銷量更超過1,470萬隻，世界各地反應熱烈，今日終於推出繁體中文版。今集遊戲新意甚多，兼可應用到Wiimote的體感功能，但更驚喜係香港任天堂安排到真人版Mario同「Mario之父」宮本茂出席一齊玩，呢位神級製作人第一次到港咋！
分享歡樂
25年前在紅白機上推出的初代《Super Mario Bros.》，相信大家都有玩過，本地坊間更稱為《孖寶兄弟》或《頂龜》，亦係「Mario之父」宮本茂其中一套成名作。兩星期前宮本老師在美國E3上台示範將於來年推出的《薩爾達傳說：天空之劍》，今次到港就講開發《New Super Mario Bros. Wii》嘅故事同打機心得。佢話開發遊戲時係想任何玩家都可以開心地享受遊戲同溝通，所以今集加入泡泡功能，在多人模式時唔識玩某一關，就可以匿入泡泡由同伴帶住行，唔怕玩家們的Level高低不同而影響遊戲性。
宮本老師表示未試過由頭到尾打爆《New Super Mario Bros. Wii》，但開發時每關都打過無數次。
如果玩同一版時連續失敗多次，Luigi就會自告奮勇出場教大家玩。
初次近距離見到宮本老師，估唔到佢真人相當玩得。
最多支援到4P，難怪連Mario都要爭住同姐姐齊齊玩。
4P協力
《New Super Mario Bros. Wii》今集支援4人模式，可以4個朋友齊齊玩。同時加入唔少協力模式提升打機樂趣，例如用騎膊馬形式頂磚或在高角度掟雪球，又可以踩在同伴頭上跳得更高，甚至乎當同伴食咗螺旋槳蘑菇時，順道搭「免費機」升天；不過要留意嘅係同伴掟出龜殼會傷到自己，合作時都要小心整傷。另外，今集還有特別設計，如在同一關卡失手８次，Luigi會挺身而出示範到終點的方法；而集齊每關３枚隱藏金幣，更可欣賞到收錄超級技巧的影片，任何Level的玩家都可樂在其中。
體感過關
除咗前面講過嘅螺旋槳蘑菇，今集另外加入兩種新蘑菇提升Mario嘅能力，分別係企鵝蘑菇同冰凍蘑菇。
前者食咗就會化身造型好Cute嘅企鵝Mario，可以在水中或冰上自由行動；而冰凍蘑菇就可以令對手結冰然後掟走，玩落都幾得意。
今集不少情況都應用到Wiimote嘅體感功能，如要發動螺旋槳飛天時，就要先搖一搖Wiimote手掣，如遇到場景上需轉動螺絲或轉動升降台，都靠晒Wiimote，在傳統橫向玩法加入唔少新鮮感，Wii機主冇理由唔買番隻看門口。
《Super Mario Galaxy 2》期待中文化
下一隻中文化Wii遊戲會係邊款？暫時未知，不過宮本老師就話1個月前在日本上市嘅《Super Mario Galaxy 2》就正進行中文化，按今次本地化嘅速度去推斷，應該年底先有得玩。《Super Mario Galaxy 2》比起兩年半前嘅第一集，製作得更成熟，控制Mario騎住Yoshi穿越各行星版圖進行大冒險，在日本甫推出就大獲好評，絕對係值得期待的中文版Wii遊戲。
新推出彩藍及桃紅兩色Wiimote。售價：各$299
彩藍桃紅Wiimote新登場
遊戲支援4打，香港任天堂都順便推出新色Wiimote手掣引你買多兩個。新色Wiimote手掣分別有彩藍同桃紅兩色，跟《New Super Mario Bros. Wii》中文版同日有售，到時一人一個唔同顏色手掣就唔怕撈亂。
遊戲資料
類型：動作
開發：Nintendo
平台：Wii
推出日期：已推出
售價：$399
網址：www.nintendo.com.hk
撰文、攝影：布偉倫
留言列表
